ކޮވިޑް-19 ސިޔާސީ ހަތިޔާރަކަށް ބޭނުން ނުކުރުމަށް ދުނިޔޭގެ ޞިއްޙަތު ޖަމްޢިއްޔާ (ޑަބްލިއުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް އެދެެނޯމް ގެބްރިއޭސަސް ވިދާޅުވެއްޖެއެވެ.

ސްވިޓްޒަލޭންޑުގެ ޖެނީވާގައި ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން، ޓެޑްރޯސް ވިދާޅުވީ ސިޔާސީ ޕާޓީތަކުން ކޮވިޑް-19 ސިޔާސީ ހަތިޔާރަކަށް ބޭނުންކުރާނަމަ އެކަމުގެ ނޭދެވޭ އަސަރު ކުރާނެ ކަމަށެވެ. ރައްޔިތުންނާއި ޤައުމަށް އެހީތެރިވުމަށް އެދޭނަމަ ސިޔާސީ ޕާޓީތަކުން ވެސް ވައިރަސްއާ ދެކޮޅަށް މަސައްކަތް ކުރުމަށް ޓެޑްރޯސް ގޮވާލެއްވިއެވެ.

މީގެ އިތުރުން ޓެޑްރޯސް ވިދާޅުވީ ކޮވިޑް-19ގެ މަސައްކަތުގައި ޙަރަކާތްތެރިވާތީ މަރުގެ އިންޒާރު ލިބިފައިވާ ކަމަށެވެ. އަދި ކަޅު ނަޞްލުގެ މީހަކަށްވާތީ ތަފާތުކުރުންތައް ގެންގުޅޭކަމަށް ވެސް ޓެޑްރޯސް ވިދާޅުވިއެވެ.

ކޮވިޑް-19 ސިޔާސީ ހަތިޔާރަކަށް ބޭނުން ނުކުރުމަށް ޓެޑްރޯސް ގޮވާލެއްވީ ޗައިނާއާ ޑަބްލިއުއެޗްއޯގެ ގުޅުމާމެދު އެމެރިކާގެ ރައީސް ޑޮނަލްޑް ޓްރަންޕް ސުވާލު އުފައްދަވާ ފާޑު ވިދާޅުވުމާ ގުޅިގެންނެވެ. ޑަބްލިއުއެޗްއޯއިން ސަމާލުކަން ދީފައިވަނީ ހަމައެކަނި ޗައިނާއަށްކަމަށް ވިދާޅުވެ، ޓްރަމްޕް ވަނީ ވަރަށް ބޮޑަށް ނުރުހުންފާޅުކުރައްވާފައެވެ. އެގޮތުން ޓްރަމްޕް ވަނީ ކޮވިޑް-19 އާއި ގުޅިގެން ފިޔަވަޅު އަޅަން ޖެހުނު ވަގުތު އެކަން ކުރުމަށް ޑަބްލިއުއެޗްއޯއަށް ނުކުޅެދުނުކަމަށް ވިދާޅުވެ، އެމެރިކާއިން އެ ޖަމްޢިއްޔާއަށް ދެމުންގެންދިޔަ ފަންޑުވެސް ހުއްޓާލައްވާނެ ކަމުގެ އިންޒާރު ދެއްވާފައެވެ.

ޓްރަމްޕް އެހެން ވިދާޅުވެފައިވާއިރު، އެމެރިކާއަކީ ޖެނީވާގައި ޤާއިމު ކުރެވިފައިވާ ޞިއްޙަތު ޖަމްޢިއްޔާއަށް އެންމެ ބޮޑު އެހީތެރިކަމެއް ފޯރުކޮށްދޭ އެއް ޤައުމެވެ. އޭގެ އިތުރުން، އދ އިން މީގެ ކުރިން ބެއިޖިންއާއި ގުޅިގެން މަސައްކަތް ކޮށްފައިވާކަން ފާހަގަ ކުރައްވައި އަންގާރަ ދުވަހު ޓްރަމްޕް ވިދާޅުވީ، ޑަބްލިއުއެޗްއޯއިން ފިޔަވަޅުތައް އަޅާފައިވަނީ ހަމައެކަނި ޗައިނާއަށް ސަމާލުކަންދީގެން ކަމަށެވެ.

ނަމަވެސް ޑަބްލިއުއެޗްއޯއިން ޓްރަމްޕްގެ މި ވާހަކަފުޅުތައް ދޮގުކުރެއެވެ. އެގޮތުން ބުދަ ދުވަހު ޑަބްލިޔުއެޗްއޯއިން ޔޫރަޕަށް ކަނޑައަޅާފައި ހުންނަވާ ރީޖަނަލް ޑިރެކްޓަރ ޑރ ހާންސް ކްލޫގް ވަނީ ޓްރަމްޕްގެ އެ ނިންމެވުމަކީ މިވަގުތަށް ރަނގަޅު ނިންމެވުމެއް ނޫންކަން ފާހަގަކުރައްވާފައެވެ.