ކައުންސިލްތަކަށް އަންނަ ޤާނޫނީ ހުސްކަން ފިލުވުމަށް ހުށަހެޅި ބިލު، ޤާނޫނު އަސާސީއާ ޚިލާފެއް ނޫން: ހަސަން ލަތީފު

މިހާރު ހިނގަމުންދާ ކައުންސިލްތަކަށް އަންނަ ޤާނޫނީ ހުސްކަން ފިލުވުމަށް ހެންވޭރު ހުޅަނގު ދާއިރާގެ އެމްޑީޕީ މެންބަރ ޙަސަން ލަޠީފު ހުށަހެޅުއްވި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު ޤާނޫނީ އަސާސީގެ ރޫޙާ ޚިލާފުނޫންކަމަށް ބިލު ހުށަހެޅުއްވި މެންބަރ ވިދާޅުވެއްޖެއެވެ.

އެބިލާއި ގުޅޭގޮތުން "ރާއްޖެ އެމްވީ" އަށް މަޢުލޫމާތު ދެއްވަމުން ޙަސަން ލަޠީފު ވިދާޅުވީ މި ބިލު ޤާނޫނުއަސާސީއާ ޚިލާފުކަމަށް ބައެއް ބޭފުޅުން ވާހަކަ ދެއްކެވިނަމަވެސް އެކަމާ އެއްބަސްވެ ވަޑައިނުގަންނަވާ ކަމަށެވެ. އެކަމުގެ އެންމެ މުހިއްމު ސަބަބެއްކަމަށް ޙަސަން ލަޠީފު ވިދާޅުވަނީ މިބިލުން ވުޖޫދު ކުރަން ބޭނުންވާ މިޙާލަތަކީ ޤާނޫނުއަސާސީ ތަޞައްވަރުކޮށްފައިވާ ޙާލަތެއް ނޫން ކަމުގައިވުމެވެ. އެއީ، މިއަދު ދިމާވެފައިވާ މިޙާލަތަކީ ޤާނޫނުއަސާސީގައި ބުނެފައިވާ ކުއްލި ނުރައްކަލުގެ ޙާލަތެއް ނޫންކަމަށާއި މިއީ ސިއްޙީ ކުއްލި ނުރައްކަލުގެ ޙާލަތެއް ކަމަށް ޤާނޫނީ ވަކީލުކަންވެސް ކުރައްވާފައިވާ ޙަސަން ލަޠީފު ވިދާޅުވިއެވެ.

މިހާރު ދުނިޔޭގައި ފެތުރެމުންދާ ކޮވިޑް-19 އާއި ގުޅިގެން ރާއްޖޭގައި މިމަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބު ވަނީ ފަސްކޮށްފަ އެވެ. މިހާރު ހިނގަމުންދާ ކައުންސިލްތަކުގެ މުއްދަތު ހަމަވާނީ ޖޫން މަހުގެ 3 ވަނަ ދުވަހަށެވެ. މިހާރު ޤާނޫނު އަސާސީ ބުނާގޮތުންނަމަ، ކައުންސިލްތަކުގެ މުއްދަތަކީ 3 އަހަރެވެ.

ޙަސަން ލަޠީފު ހުށަހެޅުއްވި ބިލުގައިވާގޮތުން ޤާނޫނުއަސާސީއާއި، ޤާނޫނުގައި ބުނެފައިވާ ގޮތުގެމަތީން ލޯކަލް ކައުންސިލްތައް އިންތިޚާބުކުރުމަށްޓަކައި ބާއްވަންޖެހޭ އިންތިޚާބު، ޤާނޫނު ލާޒިމުކުރާ މުއްދަތުގެ ތެރޭގައި ނުބޭއްވޭ ފަދަ ޙާލަތެއް މެދުވެރިވުމަކީ ޤާނޫނުއަސާސީގެ 8 ވަނަ ބާބުގައި ބަޔާންކޮށްފައިވާ އުސޫލަށް ޢަމަލުކުރުން އިސްތިސްނާ ވާނޭކަމެއް ނޫންކަމަށެވެ. އަދި މި ޤާނޫނަށް ޢަމަލުކުރަން ފަށާއިރު ހިނގަމުންދާ ކައުންސިލްތަކަކީ 3 އަހަރު ދުވަހުގެ މުއްދަތަށް އިންތިޚާބު ކުރެވިފައިވާ ކައުންސިލްތަކަކަށް ވީނަމަވެސް، ލޯކަލް ކައުންސިލްތަކުގެ އިންތިޚާބު ބާއްވާ ތާރީޚުގެ ސަބަބުން މިހާރު ހިނގަމުންދާ ކައުންސިލްތަކުގެ ދައުރު ހަމަވެ، އައު ކައުންސިލްތައް އިންތިޚާބު ނުކުރެވުމުގެ ސަބަބުން ޤާނޫނީ ހުސްކަމެއް ކުރިމަތިވެދާނެ ޙާލަތެއްގައި ޢަމަލުކުރާނޭ ގޮތެއް ޤާނޫނުއަސާސީގައި ކަނޑައެޅިގެން ބަޔާންކޮށްފައިނުވާކަން ބިލުގައި ފާހަގަކޮށްފައިވެއެވެ.

ޙަސަން ލަޠީފު ވިދާޅުވީ މިހާރު ތިބި ކައުންސިލަރުން އިންތިޚާބުކޮށްފައި ވަނީ ޤާނޫނުއަސާސީން ކަނޑައަޅާފައިވާ 3 އަހަރުގެ މުއްދަތަށް ވާއިރު އެމުއްދަތު ޤާނޫނަކުން އިތުރުކުރާނީ ކިހިނެއްތޯ ސުވާލުއުފައްދާ ކަމަށެވެ. އެސުވާލުގެ ޖަވާބަކަށް ޙަސަން ލަޠީފު ވިދާޅުވީ އެއީ، ޤާނޫނުއަސާސީގެ އެއް މާއްދާ ކަމަށާއި ޤާނޫނުއަސާސީގެ އެހެން މާއްދާތަކުގައި އެހެން ވާހަކަތައްވެސް އެބަހުރިކަމަށެވެ.

ޙަސަން ލަޠީފު ވިދާޅުވީ ޤާނޫނުއަސާސީގެ މާއްދާތައްކަށް އެކަނި ބެލުމުން މިޙާލަތުގައިވެސް ޤާނޫނުއަސާސީ ބަދަލު ނުކުރެއްވޭނޭ ކަމަކަށް ދެކެވަޑައި ނުގަންނަވާކަމަށެވެ. އެހެންނަމަވެސް މިޙާލަތުގައި ޤާނޫނުއަސާސީ ބަދަލު ކުރުން އެއީ ޤާނޫނުއަސާސީގެ ރޫޙާ ޚިލާފު ކަމަކަށްވުމުން ޤާނޫނަކުން އެ ބަދަލުތައް ގެނައުމަށް މިބިލު ހުށަހެޅުއްވީ ކަމަށް ޙަސަން ލަޠީފު ވިދާޅުވިއެވެ.

މީގެއިތުރުން މިހާރު މިއޮތް ކައުންސިލްތައް ދިގުދައްމާލުމާއި މެދުގައި އެމްޑީޕީގެ ޕީޖީގެ ތެރޭގައި ތަފާތު ޚިޔާލުތަކެއް އުޅޭކަަމަށް ޙަސަން ލަޠީފު ވިދާޅުވި އެވެ. އެގޮތުން ބައެއް މެންބަރުން ދެކެވަޑައިގަންނަވާ ގޮތުގައި ޖޫން މަހުގެ 3 ވަނަ ދުވަހާ ހަމައަށް އައުމުން މިކައުންސިލްތައް އުވި އަލަށް ރައީސުލްޖުމްހޫރިއްޔާ ބަޔަކު އައްޔަނުކުރާ ވިސްނުމެއްވެސް އެމްޑީޕީގެ މެންބަރުންގެ މެދުގައި އެބައޮތް ކަަމަށާއި މިކަންކަމަށް ކުރިޔަށް އޮތްތަނުގައި ޙައްލެއް ލިބިގެންދާނެކަމަށް ޙަސަން ލަޠީފު ވިދާޅުވި އެވެ.