ބަންގްލަދޭޝްގެ ކުރީގެ ބޮޑު ވަޒީރު ޝޭހް މުޖީބް ރަހުމާން އަވަހާރަކޮށްލުމުގައި އެންމެ އިސްކޮށް އުޅުނު ކަމަށް އިއުތިރާފްވެފައިވާ އަބްދުލް މަޖީދް، 20 އަހަރަށް ވުރެ ގިނަ އަހަރު ވަންދެން ފިލައިގެން އުޅެނިކޮށް އަތުލައިގަނެފިއެވެ.

ބަންގްލަދޭޝް އަށް މިނިވަންކަން ހޯދައިދިނުމަށް އިސްކޮށް އުޅުނު މުޖީބް އަވަހަރާ ކޮށްލާފައިވަނީ 1975 އަހަރުގައެވެ. އެމަނިކުފާނު އަވަހާރަ ކޮށްލުމުގައި ބައިވެރިވި އެ ގައުމުގެ އަސްކަރިއްޔާގެ އިސްވެރިޔާ މަޖީދް، 45 އަހަރު ފަހުން އަތުލައިގަނެފައިވަނީ އަންގާރަ ދުވަހުގެ ވަގުތެއްގައި ޑާކާގެ ފުލުހުންގެ ކައުންޓަ ޓެރަރިޒަމް އެންޑް ޓްރާންސްނޭޝަނަލް ކްރައިމް (ސީޓީސީސީ) ޔުނިޓުންނެވެ.

ސީޓީސީސީ ބުނީ، އޭނާ ހައްޔަރު ކޮށްފައިވަނީ ޑާކާގެ ގަބްޓޮލީ ގައި އޮޓޯ އެއްގައި ދަތުރު ކުރަމުން ދަނިކޮށް ކަމަށެވެ.

ޑާކާގެ ކޯޓަށް މަޖީދު ހާޒިރުކުރުމަށް ފަހު އޭނާ ޑާކާ ސެންޓްރަލް ޖަލަށް ވަނީ ގެންގޮސްފައެވެ. މުޖީބް އަވަހާރަކޮށްލުމުގައި ބައިވެރިވި އިތުރު 12 މީހަކު ހިމެނޭ ގޮތަށް މަރަން ހުކުމް ކޮށްފައިވަނިކޮށް މަޖީދު ވަނީ ފިލައިގެން ލީބިޔާ އަށް ގޮސްފައެވެ. އެއަށް ފަހު ޕާކިސްތާނުގައި އުޅުމަށް ފަހު ދާދި ފަހަކުން ޖެހެންދެން އޭނާ އުޅެމުން އައީ އިންޑިއާގައި ކަމަށް ރިޕޯޓްތައް ބުނެއެވެ. ކައުންޓަ ޓެރަރިޒަމްގެ އޮފިޝަލަކު ވިދާޅުވީ، މަޖީދު ބަންގްލަދޭޝް އަށް އެތެރެވެފައިވަނީ މާޗް މަހުގެ 26 ގައި ކަމަށެވެ. މަޖީދު ހައްޔަރު ކުރެވުމާއި އެކު ސަރުކާރުން ދަނީ އޭނާގެ ހުކުމް ތަންފީޒު ކުރުމުގެ މަސައްކަތް ކުރަމުންނެވެ.