އެމެެރިކާ އާއި ބަންގްލަދޭޝްގެ އޮފިޝަލުން، ރޮހިންޖާ މުސްލިމުންގެ މައްސަލަ ހިމެނޭ ގޮތުން އެމެރިކާގެ ވޮޝިންޓަންގައި ބައްދަލުކުރެއްވުމަށް ހަމަޖެހިއްޖެއެވެ. 

އޮކްޓޯބަރު 3 ގައި ބާއްވާ މިބައްދަލު ކުރެއްވުމުގައި ޑެޕިއުޓީ ޔޫއެސް އެސިސްޓަންޓް ސެކްރެޓަރީ އޮފް ސްޓޭޓް ފޯ ޕޮލިޓިކަލް-މިލިޓަރީ އެފެއާޒް މައިކަލް މިލާ އާއި ބަންގްލަދޭޝް ޑައިރެކްޓާ ޖެނެރަލް ފޯ ދަ އެމެރިކާސް އެޓް ދަ މިނިސްޓްރީ އޮފް ފޮރިން އެފެއާޒް އާބިދާ އިސްލާމް ބައިވެރިވެވަޑައިގަންނަވާނެއެވެ. ބައްދަލުވުން ޗެއާ ކުރައްވާނީ މި ދެބޭފެޅުންނެވެ. އެމެރިކާ އިން ބަންގްލަދޭޝް އަށް ކަނޑައަޅުއްވާފައި ހުންނަވާ އެމްބެސެޑަރު މާސިޔާ ބާރނިކެޓް ވެސް މި ބައްދަލުކުރެއްވުމުގައި ބައިވެރިވެ ވަޑައިގަންނަވާނެއެވެ. 

އެމެރިކާގެ ސްޓޭޓް  ޑިޕާޓްމަންޓުން ދާދިފަހުން ބުނެފައި ވަނީ މިޔަންމާގެ ރަކައިން ސްޓޭޓް ދޫކޮށްދާ ރޮހިންޖާ މުސްލިމުންނަށް 32 މިލިއަން ޑޮލަރު ދޭން ނިންމައިފައިވާ ކަމަށެވެ. 

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ  މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާ އިން ފަށާފައިވާ  އޮޕަރޭޝަނާ ބެހޭގޮތުން އދ އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 500،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަކޮށްފައި ވެއެވެ.

މިޔަންމާގައި 1.1 މިލިއަން ރޮހިންޖާ މުސްލިމުން އުޅެއެވެ. ގާތްގަނޑަކަށް އެހުރިހާ ރޮހިންޖާ މުސްލިމުން ދިިރިއުޅެނީ މިޔަންމާގެ ހުޅަނގު އައްސޭރިފަށުގެ ސްޓޭޓެއް ކަމަށްވާ ރަކައިން ސްޓޭޓުގައެވެ.