ދުނިޔޭގެ އެކި ކަންކޮޅުތަކުގައި ހަލުވިކަމާއިއެކު މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓްބޯޅަ ހުއްޓިފައިވާ މިދަނޑިވަޅު ދުނިޔޭގެ ފުޓުބޯޅައިގެ މައި އިދާރާ ފީފާގެ ޔޫޓިއުބް ޗެނަލް މެދުވެރިކޮށް ފުޓްބޯޅަ އާއިލާއަށް ހަދިޔާއެއްދީފިއެވެ.

ފީފާއިން ބުނީ ފީފާގެ ޔޫޓިއުބް ޗެނަލް، ފީފާ ޓީވީ މެދުވެރިކޮށް ކުރީގެ ފީފާ ވޯލްޑް ކަޕް މެޗުތަކާއި ތާރީޚީ މެޗުތަކުގެ ތެރެއިން ކޮންމެ ދުވަހަކުވެސް ކޮންމެވެސް އެއް މެޗެއް ލަމުން ގެންދާނެ ކަމަށެވެ.

ފީފާއިން ބުނީ އެ އިދާރާގެ ޔޫޓިއުބް ޗެނަލް މެދުވެރިކޮށް ތާރީޚީ މެޗުތައް ދެއްކުމަށް ނިންމީ މި ދުވަސްވަރަކީ ދުނިޔޭގެ އެކި ކަންކޮޅުތަކުގައި ހަލުވިކަމާއިއެކު ކޮވިޑް-19 ފެތުރެމުން އަންނަ ދުވަސްވަރަކަށް ވުމާއެކު، ގިނަ މީހުން ގޭގައި ވަގުތު ހޭދަކުރުމަށް ބާރު އެޅުމުގެ ގޮތުން ކަމަށެވެ. ފީފާއިން އިތުރަށް ބުނީ ކޮންމެ މެޗެއްގެ ހާފްޓައިމްގައި މަޝްހޫރު ފުޓުބޯޅަ ކުޅުންތެރިޔެއް ނުވަތަ ކޯޗެއް ނުވަތަ އެއިދާރާގެ އެންމެ މަތީ ފަންތީގެ ފަރާތެއް ކޮވިޑް-19 އިން ރައްކާތެރިވުމަށް ކުރެވިދާނެ ކަންކަން ކިޔައިދެމުން ގެންދާނެ ކަމަށެވެ.

ފީފާއިން ވަނީ މީގެ ކުރިން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާ ގުޅިގެން އާންމުން ހޭލުންތެރިކުރުމުގެ ގޮތުން ވީޑިއޯއެއް ނެރެފައެވެ. އަދި ފީފާއިން ވަނީ ޑަބްލިއުއެޗްއޯ އަށް 10 މިލިއަން ޑޮލަރުގެ އެހީއެއް ވެފައެވެ.

ކޮވިޑް-19 ގެ ސަބަބުން ފުޓްބޯޅަ ހުއްޓުމަކަށް އައިސްފައިވާއިރު، މިހާތަނަށް މިވައިރަހުގެ ސަބަބުން ބައެއް ފުޓްބޯޅަ ކުޅުންތެރިންނާއި ކޯޗުންގެ އިތުރުން ކްލަބުތަކުގެ އޮފިޝަލުން ވަނީ މިވައިރަހަށް ޕޮޒިޓިވްވެފައެވެ. މީގެ އިތުރުން ޔޫރަޕްގެ ބޮޑު ފަސް ލީގު ފަސްކޮށްފައިވާއިރު، ޗެމްޕިއަންސް ލީގާއި ޔޫރޮޕާ ލީގުވެސް ވަނީ ފަސްކޮށްފައެވެ.