ހޯލް އޮފް ފޭމްގައި ކޯބީ ބްރަޔަންޓް ހިމަނައިފި

ހެލިކޮޕްޓަރު އެކްސިޑެންޓެއްގައި މަރުވި ބާސްކެޓްބޯޅަ ލެޖެންޑް ކޯބީ ބްރަޔަންޓް، ނައިސްމިތު މެމޯރިއަލް ބާސްކެޓްބޯލް ހޯލް އޮފް ފޭމްގައި ހިމަނައިފި އެވެ.

ނައިސްމިތު މެމޯރިއަލް ބާސްކެޓްބޯލް ހޯލް އޮފް ފޭމްއަކީ ދުނިޔެއަށް ބާސްކެޓްބޯޅަ ތައާރަފުކުރި ޑރ. ޖޭމްސް ނައިސްމިތުގެ ނަމުން ނަން ދެވިފައިވާ އެމެރިކާގެ ދާރުލްއާސާރެކެވެ.

އުމުރުން 41 އަހަރުގެ ކޯބީ މަރުވީ މިއަހަރުގެ ޖެނުއަރީ މަހުގެ ފަހުކޮޅު ހެލިކޮޕްޓަރު އެކްސިޑެންޓެއްގައެވެ. މި ހާދިސާގައި ހެލިކޮޕްޓަރުން ދަތުރުކުރި އެންމެން މަރުވެފައިވާއިރު، އޭގެތެރޭގައި ކޯބީގެ 13 އަހަރުގެ ދަރިފުޅު، ޖިއާނާ އާއި އިތުރު ހަތް މީހަކުވެސް ހިމެނެއެވެ.

އުމުރުން އެންމެ 18 އަހަރުގައި އެމެރިކާގެ ނެޝަނަލް ބާސްކެޓްބޯލް އެސޯސިއޭޝަން (އެންބީއޭ) އަށް ކުޅެންފެށި ކޯބީ ރިޓަޔާ ކޮސްފައިވަނީ 2-16 ވަނަ އަހަރު އެވެ. އޭނާގެ މުޅި ބާސްކެޓްބޯޅަ ހަޔާތް ހޭދަކޮށްފައިވަނީ އެލްއޭ ލޭކާސް އާއެކުއެވެ. އަދި އޭނާގެ އެހީތެރިކަމާއެކު ލޭކާސްއިން 5 ފަހަރު އެންބީއޭ ޗެމްޕިއަންޝިޕް ކާމިޔާބުކޮށްފައިވާއިރު، އޭނާ ވަނީ ދެ ފަހަރު މަތިން އެންބީއޭ ފައިނަލްސްގެ މޮޅު ކުޅުންތެރިޔާގެ މަގާމު ހޯދާފައެވެ. އަދި 2008 ވަނަ އަހަރުގެ މުޅި އެންބީއޭގެ މޮޅު ކުޅުންތެރިއަކަށްވެސް އޭނާ ހޮވުނެވެ. ބާސްކެޓްބޯޅަ ކުޅުމުން ރިޓަޔާ ވުމުގެ ކުރިން ކޯބީ ވަނީ އެންބީއޭގެ 18 އޯލް ސްޓާ ގޭމް ކުޅެފައެވެ.

އެންބީއޭގެ ކޮމިޝަނަރު އެޑަމް ސިލްވާ ވިދާޅުވީ ކޯބީގެ މަރާ ގުޅިގެން އެންމެނަށްވެސް ސިހުން ގެނުވި ކަމަށާއި، އެހެންކަމުން ހޯލް އޮފް ފޭމްގައި ކޯބީ ހިމަނަން ނިންމާފައިވާ ކަމަށެވެ.

ބާސްކެޓްބޯޅައިގައި ވިދާލި ކޯބީއަކީ އެމެރިކާއިން 2008 އަދި 2012 ވަނަ އަހަރު އޮލިމްޕިކް ގޭމްސްއިން ރަން މެޑަލް ހޯދިއިރު، އެ ޓީމުގައި މުހިންމު ދައުރެއް އަދާކުރި ކުޅުންތެރިއެކެވެ.