ކެޓަލޯނިއާގެ ސަރުކާރުން މިނިވަން ސަރަހައްދަކަށް ވުމަށް ރައްޔިތުންގެ ފެންނަ ނުފެންނަ ވޯޓެއް ނެގުމަށް ކުރި މަސައްކަތުގައި ހިނގި ހަމަނުޖެހުންތަކާ ގުޅިގެން އެފްސީ ބާސެލޯނާއިން ޓޭބަލް އޮފް ޑިމޮކްރަސީގައި ބައިވެރިވެ، އެޓީމުގެ ހުރިހާ ހަރަކާތްތައް ހުއްޓާލައިފި އެވެ.
އާދީއްތަ ދުވަހު ނެގުމަށް މަސައްކަތްކުރި މި ވޯޓުގައި ފުލުހުން އަދި އާންމުންނާ މެދު ވަނީ ބޮޑެތި ހަމަނުޖެހުންތަކެއް ހިނގާފައެވެ. އެގޮތުން އެތައް ބަޔަކު ވަނީ މިކަމާ ގުޅިގެން ޒަހަމްވެފައެވެ.
ހަމަނުޖެހުންތައް ހުއްޓުވުމަށް ބާއްވާ ސުލްހަވެރި އިހުތިޖާޖުގައި ބައިވެރިވުމުގެ ގޮތުން ބާސާ އިން ވަނީ އަންގާރަ ދުވަހު އެޓީމުގެ ސީނިއާ އަދި ޔޫތް ޓީމުގެ އެއްވެސް ފަރިތަކުރުމެއް ކުރިޔަށް ނުގެންދިޔުމަށް ނިންމާ، އެޓީމުގެ އޮފީސްތައްވެސް ބަންދުކުރުމަށް ނިންމާފައެވެ.
ކެޓަލޯނިއާއަށް މިނިވަންކަން ލިބިއްޖެނަމަ ބާސެލޯނާ އިނގިރޭސި ޕްރިމިއާ ލީގަށް ބަދަލުވުމަކީ ވެދާނެ ކަމެއް ކަމަށް ކެޓަލޯނިއާ ސަރަހައްދުގެ ކުޅިވަރާބެހޭ ވަޒީރު ވަނީ ދާދި ފަހުން ވިދާޅުވެފައެވެ.
ބާސެލޯނާ ނިސްބަތްވާ ކެޓަލޯނިއާ ސަރަހައްދަކީ ސްޕެއިންގެ ސަރުކާރުން ވަކިވެ ފުރިހަމަ މިނިވަންކަން ހޯދުމަށް މަސައްކަތް ކުރަމުންދާ ސަރަހައްދެކެވެ.
ކަޓަލޯނިއާގެ ކުޅިވަރާ ބެހޭ ވަޒީރު ވިދާޅުވީ، ކެޓަލޯނިއާއަށް ފުރިހަމަ މިނިވަންކަން ލިބިއްޖެ ހާލަތެއްގައި އެ ސަރަހައްދަށް ނިސްބަތްވާ ލަލީގާގެ ޓީމުތައް ކަމަށްވާ ބާސެލޯނާ، އެސްޕަންޔޯލް އަދި ޖިރޯނާ ކުޅޭނެ ވަކި ލީގެއް ނިންމާނީ އެ ޓީމުތަކުން ކަމަށާއި އެ ޓީމުތަކަށް ލަލީގާގައި ދެމިއޮތުމުގެ ފުރުސަތު ވެސް އޮންނާނެ ކަމަށާއި އަދި އެހެން ގައުމެއްގެ ލީގަށް ބަދަލުވުމަކީވެސް އެ ޓީމުތަކަށް އޮތް ފުރުސަތެއް ކަމަށެވެ.
ކެޓަލޯނިއާގެ ކުޅިވަރާބެހޭ ވަޒީރު އިތުރަށް ބުނެފައިވަނީ ކެޓަލޯނިއާގެ ޓީމުތައް އެހެން ގައުމުތަކުގެ ލީގުތަކުގައި ކުޅެގެން ޔުއޭފާއިން މައްސަލަ ޖައްސަފާނެ ކަމަށް ގަބޫލް ނުކުރެވޭ ކަމަށާއި އެގޮތުން ފްރާންސްގެ ލީގުގައި މޮނާކޯ ކުޅޭ ކަމަށާއި އަދި އިނގިރޭސި ޕްރިމިއާ ލީގުގައި ވޭލްސްގެ ޓީމުތަކުން ވާދަކުރާ ކަމަށެވެ.
