ކޮވިޑް-19 އާއި ގުޅިގެން އަންނަ ހަފްތާގައި ޙިދުމަތް ދޭނީ ހަފްތާގެ ތިން ދުވަހު: ދަމަނަ ވެށި
3 އެޕްރީލު 2020 | ހުކުރު 09:45އާދިއްތަ، އަންގާރަ އަދި ބުރާސްފަތި ދުވަހު ދަމަނަ ވެށިން ޚިދުމަތް ލިބޭނެ
ދަމަނަވެށިން ކުރިއަށް ގެންދިޔަ ޕްރޮގްރާމެއްގެ ތެރެއިން
ކޮވިޑް-19 އާއި ގުޅިގެން އަންނަ ހަފްތާގައި ދަމަނަ ވެށިން ޚިދުމަތް ދޭނީ ހަފްތާގެ ތިން ދުވަހު ކަމަށް އެ ސެންޓަރުން ބުނެފިއެވެ.
ދަމަނަ ވެށިން ބުނީ މާރިޗު 2020 އިން ފެށިގެން އިއުލާންކޮށްފައިވާ އާންމު ސިއްހަތު ކުއްލި ނުރައްކަލުގެ ހާލަތުގައި އަޅަމުންދާ ފިޔަވަޅުތަކާއި ގުޅިގެން މި ފެށޭ ހަފްތާގައި ދަމަނަ ވެށިން ޚިދުމަތްތަކަށް ބަދަލު އައިސްފައިވާ ކަމަށެވެ.
އެގޮތުން 18 އަހަރުން ދަށުގެ ކުދިންނަށް ގައުމީ ވެކްސިން ތާވަލުގައި ހިމެނޭ ވެކްސިންތައް ދިނުމާއި އެކުދިންނަށް ޑޮކްޓަރުން ލިޔެދީގެން ޖަހާ އެހެނިހެން ވެކްސިންތައް ޖަހައިދިނުމަށް ހަމަޖެހިފައިވަނީ އާދިއްތަ، އަންގާރަ އަދި ބުރާސްފަތި ދުވަހުގެ ހެނދުނު 10:00 މެންދުރު 13:00 އަށް ކަމަށެވެ.
ފްލޫ ވެކްސިން ޖެހުމަށް ބޭސް ސިޓީ ހައްދައިދިނުމާއި، ފްލޫ ވެކްސިން ޖަހައިދިނުން ވެސް މިގަޑިތަކުގައި ކުރިއަށްދާނެ ކަމަށް ވެސް ދަމަނަ ވެށިން ބުނެއެވެ.
މީގެ އިތުރުން ދަމަނަ ވެށިން ބުނީ ފްލޫ ވެކްސިން ޖެހުމަށް ހަމަޖެހިފައިވަނީ ޑޮކްޓަރު ސިޓިއާއި އެކު ވެކްސިން ގަނެގެން ދިއުމުން ކަމަށާއި، ވެކްސިން ޖެހުމުގެ ފީއަށް ދިވެހިންނަށް 10 ރުފިޔާ އަދި ބިދޭސީންނަށް 20 ރުފިޔާ ނަގާނެ ކަމަށެވެ. އަދި ރޯގާޖެހި ހުންއައިސް ކެއްސާނަމަ، އެފަރާތްތައް ފްލޫ ކްލިނިކަށް ދިއުމަށް ވަނީ އިލްތިމާސްކޮށްފައެވެ.
ދަމަނަ ވެށިން ބުނީ މި ޚިދުމަތްތައް ފިޔަވާ އިތުރު ޚިދުމަތްތައް މިވަގުތު ވަގުތީގޮތުން މެދުކަނޑާލާފައިވާ ކަމަށާއި، ޚިދުމަތްތަކަށް ގެނެވޭ ބަދަލުތައް އިއުލާން ކުރަމުންދާނެ ކަމަށެވެ.
ޚިދުމަތް ހޯދުމަށް ދާއިރު، އައި.ޑީ ކާޑު، އަދި ކުޑަކުދިންގެ ވެކްސިން ޖެހުމަށް ވެކްސިން ފޮތް ގެންދިއުމަށް ސަމާލުވުމަށް ދަމަނަ ވެށިން ވަނީ އިލްތިމާސްކޮށްފައެވެ.
