އެގްރި ސެންޓަރު އަންނަ މަހު ހުޅުވަނީ

ދަނޑުވެރިކަމުގެ ބާވައްތައް ގަތުމަށް އެސްޓީއީއޯން ހުޅުވާ، އެގްރި ސެންޓަރު އަންނަ މަހު ހުޅުވާނެ ކަމަށް ކޮވިޑް-19ގެ ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.

ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އެސްޓީއޯ އެގްރި ސެންޓަރު މެއި 1 އަކުން ފެށިގެން ހުންނާނެ ކަމަށެވެ. މަބްރޫކް ވިދާޅުވީ މިސެންޓަރުން ރާއްޖޭގައި ހައްދާ ބާވަތްތައް ގަންނާނެ ކަމަށެވެ.

ދަނޑުވެރިކަން ފުޅާކުރަންޖެހޭކަން ފާހަގަކުރައްވައި މަބްރޫކް ވިދާޅުވީ ދަނޑުވެރިކަމަށް އަލަށް ނުކުންނަން ބޭނުންވާ ފަރާތްތަކަށް މިއީ ލިބުނު އިތުރު ފުރުސަތެއް ކަމަށާއި، މިކަމުން ވެސް މަންފާ ލިބޭނެ ކަމަށެވެ.

މަބްރޫކް ވިދާޅުވީ ދަނޑުވެރިކަމާ ގުޅުންހުރި ގިނަ ޕްރޮގްރާމްތައް ވެސް ކުރިއަށް ގެންދާ ކަމަށާއި، ދަނޑުވެރިކަން ކުރުމަށް ސަރުކާރުން ކުއްޔަށް ދޫކުރާ ރަށްތަކުގެ ކުލީގެ އަގު ވެސް ކުޑަ ކުރާ ކަމަށެވެ. އަދި ދަނޑުވެރިކަމަށް ޚާއްސަ ޕްލޭނެއް ފިޝަރީޒް މިނިސްޓްރީން ހަދާފައިވާކަން ވެސް މަބްރޫކް ފާހަގަކުރެއްވިއެވެ.

ދަނޑުވެރިކަން ކުރުމަށް ބާރުއަޅާ، އެ މަގަށް ސިޔާސަތުތައް ބައްޓަންކުރަން ސަރުކާރުން މަސައްކަތް ފަށާފައިވަނީ ކޮވިޑް-19 އާ ގުޅިގެން ކުރިމަތިވެފައިވާ ކާބޯތަކެތި ލިބުމުގެ ދަތިތަކާއި ގުޅިގެންނެވެ.