ކޮވިޑް-19 އާ ދެކޮޅަށް ރާއްޖެއިން ކުރާ މަސައްކަތުގައި އެހީވުމަށް ވަރލްޑް ބޭންކުން ރާއްޖެއަށް 7.3 މިލިއަން ޑޮލަރު (112.57 މިލިިއަން ރުފިޔާ) ގެ އެހީދިނުމަށް ނިންމައިފިއެވެ.
ވަރލްޑް ބޭންކުގެ އެގްޒެކެޓިވް ޑިރެކްޓަރުންގެ ބޯޑުން ވަނީ އެ ފައިސާ ރާއްޖެއަށް ދޭން ފާސްކޮށްފައެވެ. މި ފައިސާއަކީ ކޮވިޑް-19 ބަލި ހުރި ފަރާތްތައް ދެނެގަނެ، އެ ބަލިން ރައްކާތެރިވުމަށާއި، މި ބަލިން ސަލާމަތްވުމަށް އާންމު ސިއްހީ ނިޒާމު ހަރުދަނާކުރުމަށް ދެވުނު ފައިސާގެ އެހީއެކެވެ.
އަވަސް އެހީގެ ގޮތުގައި ދެވޭ 7.3 މިލިއަން ޑޮލަރުގެ ޕެކޭޖުގެ ދަށުން، ކޮވިޑް-19 ބަލި ޖެހޭ ފަރާތްތަކަށް އެކަށީގެންވާ ފަރުވާ ދިނުމަށާއި، އަމިއްލަ ސަލާމަތާއި ރައްކާތެރިކަމަށް ބޭނުންކުރެވޭ އާލާތްތަކާއި ޞިއްހީ ފަރުވާ ދިނުމަށް ބޭނުންކުރެވޭ ތަކެތި ހޯދުމަށް މަސައްކަތްކުރެވޭނެއެވެ.
އޭގެ އިތުރުން، ބާރުބޮޑުވާ ހާލަތްތަކުގައި ވެސް ކޮންމެހެން ދޭންޖެހޭ ޚިދުމަތްތައް ދެވޭކަން ކަށަވަރުކުރުމުގައި ހޮސްޕިޓަލްތަކަށް އެހީތެރިވުމާއި، ކޮރޯނާވައިރަސް ދެނެގަތުމަށްޓަކައި މާލެ އާއި އަތޮޅުތަކުގައި ހުރި ލެބޯޓްރީތަކުގެ ޤާބިލްކަން އިތުރުކުރުމަށާއި، އަދި ކޮވިޑް-19 ޖެހޭ މީހުންނަށް ފަރުވާދިނުމުގައި ހަރަކާތްތެރިވާ ސިއްހީ ހިދުމަތްތެރިން ތަމްރީންކުރުމުގައި ދިވެހިރާއްޖެއަށް އެހީތެރިވެދެވޭނެއެވެ.
މި މަޝްރޫއުގެ ތެރެއިން މާލެ އަށް ޚާއްސަ ސަމާލުކަމެއް ދީގެން، ޢާންމު ހޭލުންތެރިކަން އިތުރުކުމާއި، މުޖުތަމަޢުގެ މެދުގައި އެއްބާރުލުން އިތުރުކުރުމާއި، އަދި މި ބަލިން ރައްކާތެރިވެ ތިބުމަށްޓަކައި ދިރިއުޅުމުގެ އާދަތަކަށް ގެންނަންޖެހޭ ބަދަލުތަކަށް މީހުން އަހުލުވެރިކުރުމުގެ މަސައްކަތް ވެސް ކުރިއަށް ގެންދެވޭނެއެވެ. މާލެއަށް ހާއްސަ ސަމާލުކަމެއް ދިނުމަށް ހަމަޖެހިފައިވަނީ، ތޮށްޖެހިފައިވުމުގެ ސަބަބުން ބަލި ފެތުރިގެންދިއުމުގެ ފުރުސަތު އެންމެ ބޮޑު ސަރަޙައްދު ކަމަށްވުމުންނެވެ.
މި މަޝްރޫޢުގެ އިތުރުން، ކުރިމަތިވާ ކާރިޘާތަކާއި ކުއްލި ޙާލަތްތަކުގައި މާލީ ގޮތުން އެހީތެރިވުމަށްޓަކައި ދިވެހިރާއްޖެއާ އެކު 2019 ވަނަ އަހަރު ސޮއިކޮށްފައިވާ، ޑިޒާސްޓާ ރިސްކް މެނޭޖްމަންޓް ޑިވެލޮޕްމަންޓް ޕޮލިސީ ފައިނޭންސިން ވިތު އަ ކެޓެސްޓްރޮފީ ޑިފާޑް ޑްރޯޑައުން އޮޕްޝަން (ކެޓް ޑީޑީއޯ) ގެ ދަށުން، 10 މިލިއަން ޑޮލަރު (154.42 މިލިއަން ރުފިޔާ) ގެ މާލީ އެހީތެރިކަން ވެސް ދިވެހިރާއްޖެއަށް ވަނީ ހަމަޖައްސައިދެވިފައެވެ.
ވަރލްޑް ބޭންކުގެ މި މަޝްރޫއަކީ، ތަރައްގީވަމުން އަންނަ ގައުމުތަކަށް އެހީވުމުގެ ގޮތުން އެ ބޭންކުން އުފައްދާފައިވާ އިންޓަރނޭޝަނަލް ޑިވެލޮޕްމަންޓް އެސޯސިއޭޝަން (އައި.ޑީ.އޭ) އިން ފަންޑުކުރާ މަޝްރޫއެކެވެ. މިހާރު ވެސް ރާއްޖޭގައި ކުރިއަށްދާ ވަރލްޑް ބޭންކުގެ މަޝްރޫއުތަކުގެ އެހީއާއެކު މި މަޝްރޫއު ކުރިއަށް ގެންދާނީ މިނިސްޓްރީ އޮފް ހެލްތުންނެވެ.
