ކޮވިޑް-19: މައްކާ އާއި މަދީނާގައި 24 ގަޑިއިރު ކާފިއު ހިންގަނީ

ސަޢުދީ ޢަރަބިއްޔާ ސަރުކަރުން މައްކާ އާއި މަދީނާގައި 24 ގަޑިއިރު ކާފިއު ހިންގަން ނިންމާ އެކަން އިޢުލާނުކޮށްފިއެވެ.

ސަޢުދީ ޢަރަބިއްޔާގެ ދާޚިލީ ވުޒާރާއިން ނެރެފައިވާ ބަޔާނެއްގައި ބުނެފައިވަނީ ބުރާސްފަތި ދުވަހުން ފެށިގެން ކާފިއުގެ އަމަުރު ތަންފީޒުކުރަމުންދާނެ ކަމަށެވެ. އަދި ކާފިއުގެ ވަގުތުތަކުގައި، އެދެސިޓީގައި ދިރިއުޅޭ މީހުންނަށް ހެނދުނު 6 ން 3އާއި ދޭތެރޭ ވަގުތުގައި ޒަރޫރީ ބޭނުންތަކަށް ގެއިން ބޭރަށް ނިކުމެވޭނެކަމަށް ސަޢުދީ ސަރުކާރުން ބުނެއެވެ. މި ސިޓީތަކުގައި ކާފިއު އިޢުލާނުކޮށްފައިވާއިރު އެސިޓީތަކުގައި އުޅޭ މީހުންނަށް ސިޓީން ބޭރަށް ނުނިކުމެވޭނެކަމަށާއި އަދި އެހެންސިޓީތަކުގެ މީހުންނަށް އެ ދެ ސިޓީއަށް އެތެރެނުވެވޭނެކަމަށް ސައުދީން ބުނެއެވެ. އެހެންނަމަވެސް ކާފިއުގެ އަމުރުން ސަލާމަތީ، އަސްކަރީ އަދި މީޑިއާގެ ފަރާތްތަކާއި ޞިއްޚީ އެހީތެރިން އިސްތިޘްނާވާނެ ކަމަށްވެސް އެޤައުމުން ބުނެއެވެ.

މަޢުލޫމާތު ލިބޭގޮތުގައި ފިޔަވަޅުތައް އިތުރަށް ވަރުގަދަކޮށްފައި މިވަނީ ސަޢުދީގެ ރަސްމީ ދަރުބާރަށް ވައިރަސް ކޮންޓްރޯލްކުރުމަށް ޞިއްޙީ ފަރާތްތަކުން ދެމުންގެންދާ އިރުޝާދާއެއްގޮތަަށެވެ. ކާފިއު މުޅި ދުވަހު ހިންގުމަށް ހަމަޖެހިފައިވާތީ ބޭންކާއި އޭޓީއެމްގެ ޚިދުމަތް ހޯދުމަށް ކަމާގުޅޭ ފަރާތްތަކާއި ގުޅިގެން މަސައްކަތްކުރުމަށް ވަނީ އެދިފައެވެ. އަދި ބޭރަށް ނިކުތުމަށް ހަމަޖެހިފައިވާ ވަގުތު ބޭރަށް ނިކުމެވޭނީ ހަމައެކަނި ބޮޑެތި މީހުންނަށްކަމަށްވެސް ސަޢުދީން ބުނެއެވެ.

ސަޢުދީ ޢަރަބިއްޔާގެ މައްކާ، މަދީނާ، ޖިއްދާ އަދި ވެރިރަށް ރިޔާޒު ވަނީ ސައުދީ ރަސްގެފާނު އަބްދުލް އަޒީޒުގެ އަމުރުފުޅުގެ މަތިން އަރާ ނުފޭބޭގޮތައް ބަންދުކޮށްފައެވެ.

މިހާތަނަށް އެޤައުމުން 1,720 މީހުންނަށް ވައިރަސް ޖެހިފައިވާއިރު 16 މީހުންވަނީ މަރުވެފަ އެވެ. 264 މީހުންވަނީ ވައިރަސް އިން ރަނގަޅު ކުރެވިފަ އެވެ.