އިންޑޮނޭޝިއާގައި ދިރިއުޅޭ ދިވެހިން ސަމާލުވުމަށް އިލްތިމާސްކޮށްފި

އިންޑޮނޭޝިއާއަށް ދަތުރުކުރާ އަދި އެގައުމުގައި ދިރިއުޅޭ ދިވެހިންގެ ސަމާލުކަމަށް ފޮރިން މިނިސްޓްރީން އިލްތިމާސްކޮށްފިއެވެ.

ފޮރިން މިނިސްޓްރީން ބުނީ މުޅި ދުނިޔޭގައި ކޮވިޑް-19 ހަލުވިކަމާއެކު ފެތުރެމުން އަންނާތީ، އިންޑޮނޭޝިއާގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، 2 އޭޕްރިލް 2020 ވާ ބުރާސްފަތި ދުވަހުގެ އިންޑޮނީޝިއާ ގަޑިން ދަންވަރު 12:00 އިން ފެށިގެން، ފަތުރުވެރިންނާއި ބިދޭސީން އެ ގައުމަށް ވަނުން ވަނީ މަނާކޮށްފައިވާ ކަމަށެވެ.

Advertisement

ނަމަވެސް، އަންނަނިވި ފަރާތްތައް އެކަމުން އިސްތިސްނާ ވާނެއެވެ.

ނަމަވެސް މިފަރާތްތަކުން އަންނަނިވި ކަންތައްތައް ފުރިހަމަ ކުރަންޖެހެއެވެ. އޭގެތެރޭގައި ހެލްތު ސެޓްފިކެޓެއް ހުށަހެޅުމާއި، އިންޑޮނޭޝިއާއަށް ދަތުރުކުރުމުގެ ކުރިން ކޮވިޑް-19 އެކަށީގެންވާ ވަރަށް ފެތުރިފައިނުވާ ގައުމެއްގައި 14 ދުވަސް ހޭދަކުރުމާއި، އިންޑޮނޭޝިއާއަށް އެތެރެވުމުން އެގައުމުގެ ސަރުކާރުން ކަނޑައަޅާ ތަނެއްގައި 14 ދުވަހުގެ މުއްދަތަށް ކަރަންޓީން ކުރުން ހިމެނެއެވެ.

މީގެ އިތުރުން، ފޮރިން މިނިސްޓްރީން ބުނީ އިންޑޮނޭޝިއާގައި ފިޔަވަޅުތައް ވަރުގަދަކުރަމުން މިދާ ދަނޑިވަޅުގައި އިންޑޮނޭޝިއާއަށް ދަތުރުކުރާ އަދި އެގައުމުގައި ދިރިއުޅޭ ދިވެހިންގެ ސަމާލުވާންޖެހޭ ކަމަށެވެ.

އެގޮތުން އިންޑޮނޭޝިއާއަށް ޓޫރިސްޓް ވިސާ އެއްގައި ދަތުރުކުރި ބިދޭސީން، އެ ވިސާގެ މުއްދަތު ހަމަވާނަމަ، އެޤައުމުގައި މަޑުކުރުމަށް ފޯސް މެޜޯ ސްޓޭ ޕަރމިޓް އެއް ލިބޭނެއެވެ. އަދި އިންޑޮނޭޝިއާގައި ޓެމްޕޮރަރީ ސްޓޭ ޕަރމިޓް ނުވަތަ ޕަރމަނަންޓް ސްޓޭ ޕަރމިޓް ލިބިފައިވާ ބިދޭސީން، އެވިސާތައް ހަމަވާނަމަ، އެޤައުމުގައި މަޑުކުރުމަށް ފޯސް މެޜޯ ސްޓޭ ޕަރމިޓް އެއް ލިބޭނެއެވެ.

ފޮރިން މިނިސްޓްރީން ބުނީ މިދުވަސްތަކުގެ ތެރޭގައި އިންޑޮނޭޝިއާގައި ދިރިއުޅޭ އަދި އެގައުމަށް ދަތުރުކުރާ ދިވެހިން މިކަމަށް ސަމާލުވުމަށް އެދޭ ކަމަށާއި، މިފިޔަވަޅުތަކަށް ބަދަލުއައުން އެކަށީގެންވުމާއެކު، ދަތުރުކުރުމުގެ ކުރިން މައުލޫމާތު ސާފުކުރުމަށްވެސް އެދޭ ކަމަށެވެ.

މި ދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ނުކުރުމަށާއި އިންޑޮނޭޝިއާގައި މި ވަގުތު ދިރިއުޅެމުންދާ ދިވެހި ރައްޔިތުން އެޤައުމުގެ ސަރުކާރުގެ ނިންމުންތަކާއި އެންގުންތަކަށް ސަމާލުވުމަށް ވެސް މިނިސްޓްރީން ވަނީ އިލްތިމާސްކޮށްފައެވެ.

މީގެ އިތުރުން ފޮރިން މިނިސްޓްރީން ބުނީ ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ދިވެހި ރައްޔިތުން، މިނިސްޓްރީގައި ނުވަތަ އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށްވެސް އިލްތިމާސްކުރާ ކަމަށެވެ. އެގޮތުން އިންޑޮނޭޝިއާއަށް ދަތުރުކުރާ އަދި އެގައުމުގައި ދިރިއުޅޭ ދިވެހި ރައްޔިތުން މެލޭޝިއާގައި ހުންނަ ރާއްޖޭގެ ހައި ކޮމިޝަންގައި ރެޖިސްޓަރ ކުރުމަށް އެދޭ ކަމަށެވެ.