ކޮވިޑް-19: އެއަރ ކެނެޑާގެ އޮޕަރޭޝަންތައް 90 އިންސައްތަ ދަށް ކުރުމަށް ނިންމައިފި

ކޮވިޑް-19އާ ގުޅިގެން އެއަރ ކެނެޑާގެ އޮޕަރޭޝަންތައް 90 އިންސައްތަ ދަށް ކުރުމަށް ނިންމައިފިއެވެ.

ހޯމަ ދުވަހު އެއަރ ކެނެޑާއިން ބުނީ އެ އެއަރލައިންގެ އޮޕަރޭޝަންތައް 90 އިންސައްތަ ދަށްކޮށް، 50 އިންސައްތަ މުވައްޒަފުން ވެސް ވަގުތީ ގޮތުން ވަޒީފާއަށް ނުނެރުމަށް ނިންމާފައިވާ ކަމަށެވެ. އެގޮތުން 15،200 މުވައްޒަފުން އަދި 1300 މެނޭޖަރުގެ ވަޒީފާ ވަގުތީ ގޮތުން އޭޕްރީލް 03 ގައި ގެއްލޭނެ ކަމަށް އެއަރލައިން ބުނެއެވެ.

އެއަރ ކެނެޑާގެ ރައީސް ކެލިން ރޮވިނަަސްކޫ ވިދާޅުވީ މިއީ، ވަރަށް ހިތްދަތި ކަމާއެކު މަޖުބޫރު ހާލަތުގައި އެޅި ފިޔަވަޅުތަކެއް ކަމަށެވެ. އެގޮތުން 500 މިލިއަން ޑޮލަރު ސަލާމަތް ކުރުމަށްޓަކައި ގިނަ މުވައްޒަފުންތަކެއްގެ މުސާރަ ކުޑަ ކުރާނެ ކަމަށް ވެސް އެއަރ ކެނެޑާގެ ރައީސް ވިދާޅުވިއެވެ.

އެއަރ ކެނެޑާއިން ވަނީ ގިނަ ޢަދަދެއްގެ އިންޓަނޭޝަނަލް ފްލައިޓްތައް މިހާރު ހުއްޓާލާފައިއެވެ. އެއަރ ކެނެޑާގައި ގާތްގަނޑަކަށް 36،000 މުވައްޒަފުން މަސައްކަތް ކުރެއެވެ.