ފުދުންތެރިކަން ހުންނަ މީހާ ދައުލަތަށް އެއްޗެއްދޭންވީ ވަގުތަކީ މިއީ: އީވާ
30 މާރިޗު 2020 | ހޯމަ 11:38މިހާރު އިގްތިޞާދު މިދާ ގޮތް ނޫން އެހެންގޮތަކަށް އިގްތިޞާދު ބައްޓަންކުރަންޖެހޭ ކަަމަށް އީވާ ވިދާޅުވި
ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ
މިއީ އިންކަމް ޓެކްސް ނަގަންވީ ވަގުތުތޯ ބައެއް މީހުން ސުވާލުކުރާ ކަމަށާއި ފުއްދުންތެރިކަން ހުންނަ މީހާ ދައުލަތައް އެއްޗެއް ދޭންވީ ވަގުތަކީ މިއީ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރ އީވާ ޢަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ކޮވިޑް-19 އާއި ގުޅިގެން ލިބޭ ގެއްލުން ކުޑަ ކުރުމަށް ސަރުކާރުން އަޅަން ނިންމާފައިވާ ފިޔަވަޅުތަކާއި ގުޅޭގޮތުން ރައްޔިތުންގެ މަޖިލީހުން ދެކޭގޮތެއް ކަނޑައެޅުމަށް އެމްޑީޕީ ޕީޖީގެ ލީޑަރ އަލީ ޢާޒިމް ހުށަހެޅުއްވި ކުއްލި މައްސަލައަށް ބަހުޘކުރައްވަމުން އީވާ ވިދާޅުވީ އިންކަމް ޓެކްސްއަކީ ގެއަށް ގެންނަ ފައިސާއިން ނަގާ އެއްޗެއް ކަމަށެވެ.
މުސާރައިގެ ގޮތުގައި ލިބޭ ޢާމްދަނީއަކީ 60،000 ރުފިޔާއިން މަތިނަމަ އެމީހުންގެ އަތުން ޓެކްސް ނެގުމަށް ހަމަޖެހިފައިވަނީ މިފެށޭ އޭޕްރީލް މަހުގެ 1 ވަނަ ދުވަހުން ފެށިގެންނެވެ.
ކުއްލި މައްސަލައަށް ވާހަކަ ދައްކަވަމުން އީވާ ވިދާޅުވީ ކޮވިޑް-19 އިން ސަލާމަތްވެ ޞިއްޙީ ގޮތުން ހިންދެމިލެވޭ ދުވަހަކު ދިވެހިރާއްޖެ އިޤުތިޞާދީ ގޮތުން އަލުން އަނބުރާ ތެދުވުމަށްޓަކައި ކުރަންޖެހޭ ހުރިހާ ކަމެއް އަޅަންޖެހޭ ހުރިހާ ފިޔަވަޅެއް މިހާރު އަޅަންޖެހޭކަމަށެވެ. ރައީސް އިބްރާހީމް މުޙައްމަދު ޞާލިޙު އިޢުލާނުކުރެއްވި ޕެކޭޖަށް ތާޢީދުކުރައްވާ އީވާ ވިދާޅުވީ މިއަދުވެސް ޚަބަރު ލިބެނީ 11 ހާސް މުވައްޒަފުންގެ ވަޒީފާ ގެއްލެމުންދާ ވާހަކަކަމަށެވެ. ސަރުކާރުން އިޢުލާނުކުރި ޕެކޭޖުގެ ތެރެއިން ވިޔަފާރިތަކައް އެހީފޯރުކޮށްދޭއިރު އެ އެހީ ވާންޖެހޭނެ މުސާރަދިނުމަށްޓަކައި ފޯރުކޮށްދޭ އެހީއަކަށް ކަމަށް އީވާ ވިދާޅުވިއެވެ.
އީވާ ވިދާޅުވީ ދުނިޔެ މިދަނީ އިޤުތިޞާދީ ގޮތުން ބޮޑުވެގެންވާ ހިލިގަތުމަކަށް ކަމަށެވެ. މާސް ރީމޯބަލައިޒޭޝަނަކަށް ދާއިރު ރާއްޖޭގެ އިޤުތިޞާދުވެސް އޮންނަންޖެހޭނީ މެދުރާސްތާ އަދި ކުރުރާސްތާ އަށް ތައްޔާރަށް ކަމަށް އީވާ ވިދާޅުވިއެވެ. މިހާރު އިޤުތިޞާދު މިދާ ގޮތް ނޫން އެހެންގޮތަކަށް އިޤުތިޞާދު ބައްޓަންކުރަންޖެހޭ ކަަމަށް އީވާ ވިދާޅުވިއެވެ. އެގޮތުން ލާމަރުކަޒުކޮށްގެން ދެމެހެއްޓެނެވި ގޮތަކަށް ތިމާވެއްޓާ ރައްޓެހިގޮތަކަށް އަލުން އިޤުތިޞާދުގެ ބިންގާ އަޅާއިރު ވިސްނަންޖެހޭ ކަމަށް އީވާ ވިދާޅުވިއެވެ.
އީވާ ވިދާޅުވީ އިޤުތިޞާދަށް ވިސްނާއިރު އިޖުތިމާޢީ ފޭރާމަށްވެސް ވިސްނަންޖެހޭ ކަމަށެވެ. އަންހެނުންތަކެއް ނުވަތަ ފިރިންތަކެއް ވަޒީފާ ގެއްލުމުން ގޭތެރޭގައި ދިމާވަނީ ކޮންކަހަލަ މައްސަލަތަކަކަށްތޯވެސް މިވަގުތު ވިސްނަންޖެހޭ ކަމަށް އީވާ ވިދާޅުވި އެވެ.
