މީހުން ގޭގައި ތިބެން ޖެހުނަސް ޑިމޮކްރަސީ ގޭބަންދަކަށް ނުދޭ، މަޖިލިސް ކުރިއަށް ދާނެ: ރައީސް ނަޝީދް
މިއީ ވީޑިއޯ ކޮންފަރެންސް މެދުވެރިކޮށް، ގާނޫނު ހަދާ މަޖިލީހުގެ ޖަލްސާތައް ކުރިއަށް ގެންދާ ދުނިޔޭގެ ފުރަތަމަ ގައުމު
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު
ކޮވިޑް-19 ގެ ސަބަބުން މީހުން ގޭގައި ތިބެން ޖެހުނު ނަމަވެސް ރާއްޖޭގެ ޑިމޮކްރަސީ "ގޭބަންދަކަށް" ނުދާ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ހޯމަ ދުވަހު ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ގޭގައި ތިބެން މަޖުބޫރުވެފައި ތިބި ނަމަވެސް ރާއްޖޭގެ ޑިމޮކްރަސީ އޮތީ ގޭބަންދެއްގައި ނޫން ކަމަށެވެ. އެގޮތުން ރައްޔިތުންގެ މަޖިލީހުގެ މަސައްކަތްތައް ހުއްޓުމެއް ނެތި ކުރިއަށްދާނެކަން ފާހަގަކުރައްވައި ރައީސް ނަޝީދު ވިދާޅުވީ، އޮންލައިންކޮށް މަޖިލިސް ކުރިއަށްދާނެ ކަމަށެވެ.
ރައީސް ނަޝީދު އެހެން ވިދާޅުވެފައިވާއިރު، އޮންލައިންކޮށް ކުރިއަށްދާ މަޖިލީހުގެ ފުރަތަމަ ޖަލްސާ ހޯމަ ދުވަހު ބޭއްވުމަށް ވަނީ ހަމަޖެހިފައެވެ. މަޖިލީހުގެ ހޯމަ ދުވަހުގެ ޖަލްސާ ފެށުމަށް ނިންމާފައިވަނީ ހެނދުނު 11:00 ގައެވެ.
ގާނޫނު ހަދާ މަޖިލީހުން ރައްޔިތުންނަށްޓަކައި ކުރަންޖެހޭ ކަންކަން ކުރުމަށްޓަކައި މަޖިލީހުން ވަނީ ވީޑިއޯ ކޮންފަރެންސް މެދުވެރިކޮށް މަޖިލީހުގެ ޖަލްސާތަކާއި ކޮމެޓީގެ މަސައްކަތްތައް ކުރުމަށް ނިންމާފަ އެވެ. އެގޮތުން ރައްޔިތުންގެ މަޖިލީހުން ވަނީ މަޖިލީހުގެ ރައީސް، ރައީސް ނަޝީދުއާއި މަޖިލީހުގެ މެމްބަރުން ހިމެނިވަޑައިގަންނަވާ ގޮތަށް މަޖިލީހުގެ ޖަލްސާތައް ވީޑިއޯ ކޮންފަރެންސްކޮށް، ކުރިއަށް ގެންދާނެ ގޮތުގެ ރިހާސަލެއް ހޮނިހިރު ދުވަހު ކުރިއަށް ގެންގޮސްފަ އެވެ.
މަޖިލީހުގެ ޖަލްސާތައް ވެބް ކޮންފަރެންސް މެދުވެރިކޮށް، ކުރިއަށް ގެންދާއިރު، މަޖިލީހުގެ މެމްްބަރުންގެ އިތުރުން އިދާރީ ބައެއް މުއައްޒަފުންނާއެކު 92 ބައިވެރިންނަށް ބައިވެރިވެވޭގޮތަށް އުސޫލެއް ރައްޔިތުންގެ މަޖިލީހުގެ އާންމު ކޮމެޓީން ވަނީ ފާސްކޮށްފަ އެވެ.
ރައްޔިތުންގެ މަޖިލީހުން އޮންލައިންކޮށް، ވީޑިއޯ ކޮންފަރެންސް މެދުވެރިކޮށް، މަޖިލީހުގެ ޖަލްސާތައް ބާއްވަން ނިންމާފައިވާތީ، މިއީ ދުނިޔޭގައި މިގޮތަށް ވީޑިއޯ ކޮންފަރެންސް މެދުވެރިކޮށް ބާއްވާ، ގައުމެއްގެ ގާނޫނު ހަދާ މަޖިލީހެއްގެ ފުރަތަމަ ބައްދަލުވުންކަން ހާމަކޮށް ބައިނަލްއަގްވާމީ ބައެއް މީޑީއާތަކުންވެސް އެކަން ފާހަގަކޮށްފައިވެއެވެ.
