ސްރީލަންކާއިން 10 ޓަނުގެ ކާގޯއާއެކު މޯލްޑިވިއަންގެ ބޯޓެއް އަތުވެއްޖެ
30 މާރިޗު 2020 | ހޯމަ 02:40އިތުރު ގައުމުތަކަށް ކާގޯ ފްލައިޓްތައް ބޭއްވުމަށް ވަނީ ހަމަޖެހިފައި
މޯލްޑިވިއަންގެ ކާގޯ ފްލައިޓް ލަންކާގެ ކޮލްމްބޯ އެއާޕޯޓުގައި
އަވަށްޓެރި ސްރީލަންކާއިން 10 ޓަނުގެ ކާގޯއާއެކު މޯލްޑިވިއަންގެ ފްލައިޓެއް ރާއްޖެ އަތުވެއްޖެއެވެ.
މޯލްޑިވިއަންގެ ޕަބްލިކް ރިލޭޝަންސް މެނޭޖަރ މޫސާ ވަސީމު ވިދާޅުވީ، އާދިއްތަ ދުވަހު ސްރީލަންކާއިން އައި ކާގޯ ބޯޓުން ގެނައީ، އަވަހަށް ހަލާކުވާ ޒާތުގެ ކާބޯތަކެއްޗާއި، ބޭސްވެރިކަމުގެ ސާމާނާއި، އިތުުރުން މޭވާއާއި، ތަރުކާރީގެ ބާވަތްތައް ކަމަށެވެ.
މޯލްޑިވިއަނުން ވަނީ ރާއްޖެއަށް މުދާ އެތެރެކުރުމަށް ހަތަރު ޤައުމަކަށް ޚާއްޞަ ކާގޯ ފްލައިޓްތައް ބާއްވާ ގޮތަށް ނިންމާފައެވެ. އެ ޤައުމަތަކީ އިންޑިއާ، ސްރީލަންކާ، ތައިލޭންޑުގެ އިތުރުން ޔޫއޭއީއެވެ. އެ އެއަރލައިނުން ވަނީ ކާގޯ ފްލައިޓުގެ ޝެޑިއުލްތައް ޢާންމުކޮށްފައެވެ.
އިންޑިއާއިން ވަނީ، އެ ޤައުމު ލޮކްޑައުންގައި އޮތުމުގެ ސަބަބުން އެ ޤައުމުން މުދާ ބޭރުކުރުމުގައި ދަތިތަކެއްހުރި ނަމަވެސް، މެދުކެނޑުމެއް ނެތި ރާއްޖެއަށް ބޭނުންވާ އަސާސީ ބާވަތްތައް ފޯރުކޮށްދޭނެ ކަމުގެ ޔަޤީންކަން ދީފައެވެ.
އެގޮތުން އިންޑިއާގެ ޓުޓިކޮރިން ބަނދަރުން ބަރުކޮށްގެން ގެނައި 500 މެޓްރިކް ޓަނުގެ ހަކުރު އަދި 993 މެޓްރިކް ޓަނުގެ ހަނޑޫ ވަނީ ރާއްޖެއަށް ގެނެސްފައެވެ.
އަދި އިތުރު 1500 މެޓްރިކް ޓަނުގެ ހަނޑުލާ 500 މެޓްރިކް ޓަނުގެ ހަކުރުގެ ޝިޕްމަންޓެއް ރާއްޖެ އައުމުގެ މަގުމަތީގައިވާކަމަށް އިންޑިއާ ސަރުކާރުން ވަނީ ހާމަކޮށްފައެވެ.
