ހުޅުލެ ކައިރިއަށް ޓީއެމްއޭގެ ބޯޓެއް ވެއްޓިއްޖެ
ބޯޓުގައި ތިބި ނުވަ މީހުން
ޓީއެމްއޭގެ ބޯޓް ވެއްޓިފައި
ޓްރާންސް މޯލްޑިވިއަން އެއާވޭސް(ޓީއެމްއޭ) ގެ މޫދަށް ޖައްސާ ބޯޓެއް ވެލާނާ އިންޓަނޭޝަނަލް އެއާޕޯޓް ކައިރިއަށް ވެއްޓިއްޖެ އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ހުޅުލޭ ސީޕްލޭން ޓާމިނަލް ސަރަހައްދަށް ޓީއެމްއޭގެ ބޯޓު ވެއްޓުނީ ޖައްސަން އުޅެނިކޮށެވެ. އެ ބޯޓަކީ ކޮންރެޑް މޯލްޑިވްސް ރިސޯޓުން ފަތުރުވެރިންނާއެކު ހުޅުލެއަށް ދަތުރުކުރި ބޯޓެއް ކަމަށް ވެސް މައުލޫމާތު ލިބެ އެވެ.
ހާދިސާ ހިނގިއިރު ބޯޓުގައި ތިބި ނުވަ މީހުން ވެސް ވަނީ ސަލާމަތް ކޮށްފަ އެވެ. އަދި އެއްވެސް މީހަކަށް ބޮޑު އަނިޔާއެއް ލިބުނު ކަމުގެ މައުލޫމާތެއް ނުލިބެ އެވެ.
މިކަމާ ގުޅޭ ގޮތުން އެމްއެންޑީއެފްގެ ތަރުޖަމާނު ކެޕްޓަން އިބްރާހިމް އާޒިމް ވިދާޅުވީ ޓީއެމްއޭގެ ބޯޓެއް ފުރޮޅާލި ހާދިސާއެއް ހޮނިހިރު ދުވަހުގެ ހެނދުނު ހިނގި ކަމަށާއި، އެ ހާދިސާ ހިނގިތާ މާގިނަ އިރުތަކެއް ނުވަނީސް ބޯޓް ފެންމައްޗަށް ނަގައި އާންމު ހާލަތަކަށް ގެނެސްފައިވާ ކަމަށެވެ.
މި ހާދިސާއާ ގުޅޭ ގޮތުން ޓީއެމްއޭއިން އަދި އެއްވެސް މައުލޫމާތެއް ހާމައެއް ނުކުރެ އެވެ. ޓީއެމްއޭގެ ބަހެއް ހޯދުމަށް ރާއްޖެއެމްވީއިން ކުރި މަސައްކަތް ވެސް ވަނީ ކާމިޔާބުވާގޮތް ނުވެފަ އެވެ.
މީގެ ކުރިން 2015 ވަނަ އަހަރުގެ ތެރޭގައި ވެސް ޓީއެމްއޭގެ ބޯޓެއް ވެއްޓިފައިވެ އެވެ. 15 މީހުންނާއެކު ދަތުރުކުރަމުން ދަނިކޮށް ޓީއެމްއޭގެ ބޯޓް ވެއްޓިފައިވަނީ ޅ. ކުރެއްދޫ ރިސޯޓް ކައިރިއަށެވެ. 2011 ވަނަ އަހަރުގެ ތެރޭގައި ބިޔާދޫ ރިސޯޓް ކައިރިއަށް ވެސް ޓީއެމްއޭގެ ބޯޓެއް ވެއްޓުނެވެ.
