ކ. މާލެ
|
28 މާރޗް 2020 | ހޮނިހިރު 03:50
ޔުވެންޓަސްގެ ފޯވާޑް ޕައުލޯ ޑިބާލާ
ގެޓީ އިމޭޖަސް
ކޮވިޑް-19
އަހަރެންގެ ހާލު ރަނގަޅު: ޑިބާލާ
 
ޔުވެންޓަސްގެ ތިން ކުޅުންތެރިއަކު މިހާރު ވަނީ ކޮވިޑް-19 އަށް ޕޮޒިޓިވްވެފައި
 
ޑިބާލާ އާއި އޭނާގެ ލޯބިވެރިޔާ ކޮވިޑް-19 އަށް ޕޮޒިޓިވްވިކަން ހާމަކޮށްފައިވަނީ މިދިޔަ ހަފުތާގައި

އިޓަލީގެ ޔުވެންޓަސްއަށް ކުޅެމުން އަންނަ އާޖެންޓީނާގެ ފޯވާޑް ޕައުލޯ ޑިބާލާ އޭނާގެ ހާލު ރަނގަޅު ކަމަށް ބުނެފިއެވެ.

26 އަހަރުގެ ފޯވާޑް އަދި އޭނާގެ ލޯބިވެރިޔާ ކޮރޯނާވައިރަސް (ކޮވިޑް-19) އަށް ޕޮޒިޓިވްވިކަން ހާމަކޮށްފައިވަނީ މިދިޔަ ހަފުތާގައެވެ.

ޑިބާލާ ބުނީ އޭނާގެ ހާލު ރަނގަޅު ކަމަށާއި އަދި ކުރިޔަށްވުރެ ވަރުގަދަކޮށް ހުރި ކަމަށެވެ. މީގެ އިތުރުން ޑިބޭލާ ބުނީ ވައިރަހުން ސަލާމަތްވެ ފަރިތަކުރުންތަކުގައި ބައިވެރިވުމަށް ކެތްމަދު ވެފައި ހުރި ކަމަށެވެ.

މިހާތަނަށް ޔުވެންޓަސްގެ ތިން ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފައެވެ. އެއީ ޑިބާލާގެ އިތުރުން ބްލައިސް މަޓުއިޑީ އާއި ޑެނިއަލީ ރުގާނީ އެވެ. އިޓަލީން މިވައިރަހަށް ޕޮޒިޓިވްވި ކުޅުންތެރިންގެ އަދަދު 13 އަށް އަރާފައިވާއިރު، އިޓަލީގައި ކުރިޔަށްދާ ކުޅިވަރު ހަރަކާތްތައް އަންނަ އޭޕްރީލް މަހުގެ ތިންވަނަ ދުވަހުގެ ނިޔަލަށް ހުއްޓާލުމަށް އެގައުމުގެ ސަރުކާރުން ވަނީ ނިންމައިފައެވެ.

އިޓަލީގެ ކުޅުންތެރިންގެ އިތުރުން ސްޕެއިންގެ ވެލެންސިއާގެ ސްކޮޑުގެ 35 އިންސައްތަ ވަނީ މި ވައިރަހަށް ޕޮޒިޓިވްވެފައެވެ. އަދި އިންގްލެންޑުގެ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއިގެ އިތުރުން އިނގގިރޭސި ތިންވަނަ ޑިވިޝަނުގައި ވާދަކުރާ ޕޯޓްސްމަތުގެ ތިން ކުޅުންތެރިއަކުވެސް ވަނީ މި ވައިރަހަށް ޕޮޒިޓިވްވެފައެވެ. މީގެ ތެރެއިން ކަލުމް ހަޑްސަން-އޮޑޯއި ވަނީ ރަނގަޅުވެފައެވެ.

ދުނިޔޭގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ގުޅިގެން ދުނިޔޭގެ ފުޓްބޯޅަ ވަނީ ހުއްޓުމަކަށް އައިސްފައެވެ. އެގޮތުން ޔޫރަޕްގެ އެންމެ މަގުބޫލް ފަސް ލީގުގެ ކުޅުން ވަނީ މެދުކަނދާލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ފްރެންޗް ލީގުގެ އިތުރުން ޖަރުމަން ލީގެވެ. އަދި ޔުއެފާ ޗެމްޕިއަންސް ލީގާއި ޔޫރޮޕާށ ލީގުގެ މެޗުތައް ވެސް ވަނީ ހުއްޓާލާފައެވެ. މީގެ އިތުރުން މިއަހަރު ބެއްވުމަށް ހަމަޖެހިފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޮޅަ މުބާރާތްވެސް ވަނީ އަންނަ އަހަރަށް ފަސްކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް