އުސޫލުގެ ދަށުން ދެ ފަތުރުވެރިން ޓެސްޓުކުރާކަށް ނުޖެހޭ

ރާއްޖެއިން ފުރައިގެން އިޓަލީ އަށް ދަތުރުކުރަނިކޮށް ކޮވިޑް-19 އަށް ޕޮޒިޓިވްވި ދެ ފަތުރުވެރިންގެ ޓެސްޓު ހެދީ ރިސާޗް ބޭނުމަކަށް ކަމަށާއި، 14 ދުވަހުގެ ކަރަންޓީނު މުއްދަތު ފުރިހަމަ ކުރުމަށް ފަހު ބަލީގެ އަލާމާތްތައް ނުފެންނަ ކަަމަށްވާނަމަ ބައްޔަށް ޓެސްޓުނުކުރާ ކަމަށް ސަރުކާރުން ހާމަކޮށްފިއެވެ.

އައިލެންޑް ސަފާރީގައި ޗުއްޓީ ހޭދަކުރުމަށް ފަހު ފުރައިގެން ދިޔަ އިޓަލީގެ ދެ ފަތުރުވެރިޔަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތް މިނިސްޓަރު އަބްދުﷲ އަމީން ވަނީ ހުކުރު ދުވަހު ހާމަކުރައްވާފައެވެ.

Advertisement

އެކަމަކު އެ ފަތުރުވެރިން ފުރުވާލީ 14 ދުވަހުގެ ކަރަންޓީނުގެ މުއްދަތު ފުރިހަމަނުކޮށް ކަމަށް ރާއްޖޭގެ ބައެއް މީޑިއާތަކުން ވަނީ ރިޕޯޓްކޮށްފައެެވެ. ހުކުރު ދުވަހުގެރޭ ދަރުބާރު ގޭގައި ގާއިމްކޮށްފައިވާ ނެޝަނަލް އެމެޖެންސީ ސެންޓަރުގައި ރައީސް އޮފީހުގެ އަންޑަރ ސެކެރެޓަރީ މަބްރޫކް އަޒީޒް ވަނީ އެ އެ ސަފާރިން ކޮވިޑް-19 އަށ ޝައްކު ކުރެވިގެން މީހަކު ފެނުނު ހިސާބުން ހުކުރު ދުވަހާ ހަމަޔަށް ކަން ހިނގާފައިވާ ގޮތުގެ މައުލޫމާތު ނޫސްވެރިންނާ ހިއްސާކުރައްވާފައެވެ. އައިލެންޑް ސަފާރީން ވަނީ މީގެ ކުރިން ކޮވިޑް-19 ދެ މީހަކު ޕޮޒިޓިވްވެފައެވެ.

މަބްރޫކް ވިދާޅުވީ، އައިލެންޑް ސަފާރީގައި ތިބި ބައެއްގެ ގައިން ކޮވިޑް-19 އަށް ޝައްކުކުރެވޭ އަލާމާތްތައް ފެނިގެން ރިޕޯޓްކޮށްފައިވަނީ މާޗް މަހުގެ 13 ވަނަ ދުވަހު ކަމަށެވެ. މާޗް މަހުގެ 14 ވަނަ ދުވަހު އެމީހުން ބޯޓުން ބާލުވައިސާމްޕަލް ނަގައި އެ ބޯޓު މޮނިޓަރިންގެ ހާލަތަށް ގެނެވުނުވެ. އަދި އެއާއިކު މާޗް މަހުގެ 15 ވަނަ ދުވަހު އެ ސަފާރިން ނެގި ސާމްޕަލްގެ ތެރެއިން ދެ ސާމްޕަލް ކޮވިޑް-19 އަށް ޕޮޒިޓިވްވިއެވެ.

މަބްރޫކް ވިދާޅުވީ، ޕޮޒިޓިވްވުމާއި އެކު އެ ދެ ފަތުރުވެރިން އެކަހެރިކޮށް ދެ މީހުން ފަރުކޮޅުފުށި އަށް ގެންދެވުނު ކަމަށެވެ. މާޗް މަހުގެ 17 ވަނަ ދުވަހު އެ ސަފާރީ ވިލިވަރަށް ކައިރިކޮށް ބޯޓުގައި ތިބި ހުރިހާ ފަތުރުވެރިން އެ ރަށަށް ފޭބި ކަމަށް މަބްރޫކް ވިދާޅުވިއެވެ. އޭނާ ވިދާޅުވީ، ބޯޓުގައި ބާކީ ތިބި ފަޅުވެރިންގެ ތެެރެއިން ތިން ފަޅުވެރިއަކު މާޗް މަހުގެ 19 ވަނަ ދުވަހު ވިލިވަަރަށް ފައިބާފައިވާ ކަމަށެވެ. އޭނާ ވިދާޅުވީ، ސަފާރީ މޯނީޓަރިންގެ ހާލަތަށް ގެންދިޔައަސް ބޯޓުގައި ދެ ކައްޕިން ތިބި ކަމަށެވެ. ސަބަބެއް ކަމަށް އޭނާ ވިދާޅުވީ، އެއީ އަގުބޮޑު ބޯޓަކަށްވާތީވެ އެ ކައްޕިން ބޯޓުގައި ތިބެން ބޭނުންވާކަން އެންގުމުން ކަމަށެވެ.

މާޗް މަހުގެ 13 ވަނަ ދުވަހުން ފެށިގެން 27 ވަނަ ދުވަހާ ހަމަޔަށް 14 ދުވަސްވެފައިވާއިރު، އެމީހުން އިޓަލީ އަށް ފުރައިގެން ގޮސްފައިވަނީ އިޓަލީ ސަރުކާރުން ފޮނުވި ފްލައިޓެއްގައި ހުކުރު ދުވަހު އެވެ. މަބްރޫކް ވިދާޅުވީ، އައިލެންޑް ސަފާރީން ނެގި ދެ މީހެއްގެ ސާމްޕަލް ޕޮޒިޓިވްވިކަން އެނގުނީ ފްލައިޓް ވައިގެ ތެރޭގައި ދުއްވަމުން ދަނިކޮށް ކަމަށެވެ.

އެ ދެ ފަތުރުވެރިންގެ ޓެސްޓުގެ ނަތިޖާ ނުލިބެނީ ފުރުވާލީ ކީއްވެގެންތޯ ނޫސްވެރިއަކު ސުވާލުކުރުމުން މަބްރޫކް ވިދާޅުވީ، އެޗްޕީއޭ އިން އަމަލު ކުރަމުންދާ އުސޫލުގެ ދަށުން އެ ދެ ފަތުރުވެރިންވެސް ހިމެނޭ ގޮތަށް ހުކުރު ދުވަހު ފުރި ފްލައިޓުން އެއްވެސް ފަތުރުވެރިއެއްގެ ކިބައިން ކޮވިޑް-19 ގެ އަލާމާތެއް ފެންނަން ނެތް ކަމަށެވެ. އެޗްޕީއޭ އިން އަމަލުކުރަމުންދާ އުސޫލުގެ ދަށުން 14 ދުވަހުގެ ކަރަންޓީނު މުއްދަތު ފުރިހަމަކުރުމަށް ފަހު އެމީހެއްގެ ފަރާތުން ކޮވިޑް-19 އަށް ޝައްކުވާ އަލާމާތެއް ނުފެންނަނަމަ އެމީހަކަށް ފުރުމުގެ ހުއްދަ ދެއެވެ.

''އަޅުގަނޑު ސާފުކޮށްދޭން ބޭނުން މި ބޯޓުން ފުރައިގެން ދިޔަ އެއްވެސް މީހެއްގެ ކިބައިން ބަލީގެ އަލާމާތެއް ފެންނާކަށް ނެތް.''މަބްރޫކް ވިދާޅުވިއެވެ.

އެ ޕްރެސްކޮންފަރެންސް ގައި ބައިވެރިވެ ވަޑައިގެންނެވި ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުުރު ވިދާޅުވީ، އެ ފަތުރުވެރިން ފުރަވާލުމަކީ އެއީ ކަންތައްތައް ހަރުދަނާ ކުރުމަށް ލިބުނު ފިލާވަޅެއް ކަމަށް ބަލައިގަންނަ ކަމަށެވެ. އަދި މި ބަލި ދިވެއްސެއްގެ ފަރާތުން ފެނުމާއި އެކު މިހާރު މިވަނީ ބަލީގެ އާ މަރުހަލާއަކަށް އާދެވިފައި ކަމަށް ވިދާޅުވިއެވެ. ކޮވިޑް-19 ޖެހުނު ދިވެހި މީހާ އަކީ އިނގިރޭސިވިލާތުން އައި މީހެެކެވެ. އެމީހާ ކޮވިޑް-19 އަށް ޕޮޒިޓިވްވިއިރު އޭނާހުރީ ކަރަންޓީނުގައެވެ. އެކަމަށް އިޝާރާތްކުރައްވާ މައިމޫނާ ވިދާޅުވީ، އެއިން ފާހަގަވެގެންދަނީ ކަރަންޓީނު ކުރަންޖެހޭ ކަމުގެ މުހިއްމުކަން ކަމަށެވެ.