ދިގު މުއްދަތަށް ބޭސްނަންގަވާ ބޭފުޅުންނަށް މިދުވަސްވަރު އަލުން ޑޮކްޓަރަށް ނުދައްކައި ކުރިން ޑޮކްޓަރު ދީފައިވާ ބޭސް ހުސްވުމުގެ 15 ދުވަސް ކުރިން ފާމަސީތަކަށް ބޭސްހޯދުމަށް ހުށައެޅުމަށް އާސަންދައިން އެދިއްޖެ އެވެ.
އާސަންދައިން ވަނީ ކޮވިޑް-19 އިން ރައްކާތެރިވުމުގެގޮތުން މިދުވަސްވަރު އަލުން ޑޮކްޓަރަށް ނުދައްކައި ކުރިން ޑޮކްޓަރު ލިޔެދެއްވާފައިވާ ބޭސްސިޓީއަކަށް އަލުން ބޭސް ނެގޭނޭ އިންތިޒާމް ހަމަޖައްސާފައެވެ. އެގޮތުން އާސަންދަ "ސްކީމްގެ ޚިދުމަތް ފޯރުކޮށްދޭ، ހޮސްޕިޓަލެއްގެ ނުވަތަ ކްލިނިކެއްގެ ތެރޭގައި ނުހިމެނޭ ހުރިހާ ފާމަސީއަކުންވެސް" މިޚިދުމަތް ހުކުރު ދުވަހުން ފެށިގެންލިބޭނެއެވެ.
އާސަންދައިން ބުނީ ބޭސް ސިޓީ ލިޔެފައިވާ ތާރީޚުން ފެށިގެން 3 މަސްދުވަސްވެފައި ނުވާ އެންމެ ފަހުގެ ބޭސްސިޓީ ހިފައިގެން ފާމަސީއަށް ދިއުމަށެވެ. އަދި ސްކީމްގެ ޚިދުމަތްދޭ ބޭރުގެ ހޮސްޕިޓަލަކުން ލިޔެފައިވާ ބޭސް ސިޓީއެއްނަމަ، 6 މަސްދުވަސްވެފައި ނުވާ އެންމެ ފަހުގެބޭސްސިޓީ ފާމަސީއަށް ގެންދިއުމަށް އިލްތިމާސްކޮށްފައެވެ. މިވަގުތު ހުރި ބޭސް ހުސްވުމުގެ 15 ދުވަސް ކުރިން ފާމަސީތަކަށް ބޭސްހޯދުމަށް ހުށައެޅުމަށްވެސް އެކުންފުނިން ވަނީ އެދިފައެވެ.
އާސަންދައިން ބުނީ އެ ބޭސްސިޓީއަކީ ދިގުމުއްދަތަށް ފަރުވާކުރާ ބައްޔަކަށް ދޫކުރެވިފައިވާ ބޭސްސިޓީއަކަށްވާންޖެހޭ ކަމަށާއި ބޭސްސިޓީގައި ހުންނަންވާ ހުރިހާ މަޢުލޫމާތުތަކެއް ފުރިހަމައަށް ހުންނަން ޖެހޭކަމަށެވެ. އަދި ބޭސްނަގަންދާއިރު، ބަލިމީހާގެ އައި.ޑީ.ކާޑު އަދި ބޭސްސިޓީ ގެންދިއުމަށްވެސް އިލްތިމާސްކޮށްފައިވެއެވެ. އާސަންދަ އިން ހުނި އެފަދަ ބޭސްސިޓީއެއްގައި ކުރިން އެހެންކަމަކަށް އެވަގުތަށް ފަރުވާ ނަގާފައިވާ އެހެނިހެން ބޭސްތައް އަލުން ދޫނުކުރާނެކަމަށެވެ.
