އުޒްބެކިސްތާނުގެ ޑޮކްޓަރުންގެ އަގުވަޒަން ކުރުމަށް މުސާރަ ބޮޑުކޮށް، ވައިރަސް ޖެހިއްޖެ ނަމަ އިތުރު 10،000 ޑޮލަރު!

ކޮވިޑް-19 އިން ރައްކާތެރިވުމަށް ކުރަމުންދާ މަސައްކަތްތަކަށް ހިތްވަރު ދިނުމަށް މެދުތެރޭ އޭޝިއާގެ ޤައުމެއް ކަމަށްވާ އުޒްބެކިސްތާނުގައި ޑޮކްޓަރުންގެ މުސާރަ ބޮޑުކޮށްފިއެވެ.

ހުކުރު ދުވަހު އެ ޤައުމުގެ ގިނަ އަވަށްތަކާއި ސަރަޙައްދުތައް ލޮކްޑައުން ކޮށް ބޯޑަރުތައް ބަންދުކޮށްފައިވާއިރު، މުހިއްމު ފިޔަވަޅެއްގެ ގޮތުން އެ ޤައުމުގެ ޑޮކްޓަރުންނާއި މެޑިކަލް ވޯކަރުންގެ މުސާރަ ވަނީ ބޮޑުކޮށްފައެވެ. އެގޮތުން މުސާރަ ބޮޑުކޮށްފައިވަނީ ކޮވިޑް-19 ފެތުރުން ހުއްޓުވުމަށް އެ ފަރާތްތަކުން ކުރަމުންދާ އަގުހުރި މަސައްކަތަށް ހިތްވަރުދީ އަގުވަޒަން ކުރުމުގެ ގޮތުން ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާގޮތުން ޑޮކްޓަރުންނަށް ކޮންމެ 2 ހަފްތާއަކުން 2500 އެމެރިކާ ޑޮލަރު ދިނުމަށް ނިންމާފައިވާއިރު، ނަރުހުންނާއި ލެބޯޓަރީ މުވައްޒަފުންނަށް 1500 އެމެރިކާ ޑޮލަރު އަދި މެޑިކަލް ވޯކަރުންނަށް 1000 އެމެރިކާ ޑޮލަރު ދިނުމަށް ވަނީ ނިންމާފައެވެ. އެއީ މި ހުރިހާ ފަރާތްތަކަށްވެސް ކުރިން ލިބެމުންއައި މުސާރައަށްވުރެ އެތައް ގުނައެއް އިތުރު އަދަދެކެވެ.

އޭގެ އިތުރުން، ކޮވިޑް-19 އާއި ގުޅިގެން ކުރަމުންދާ މަސައްކަތްތަކުގެ ތެރެއިން މެޑިކަލް ވޯކަރެއްގެ ގަޔަށް ވައިރަސް ފެތުރިއްޖެނަމަ އެއިން ކޮންމެ ފަރާތަކަށް 10،000 އެމެރިކާ ޑޮލަރު ދިނުމަށްވެސް ވަނީ ނިންމާފައެވެ.

އުޒްބެކިސްތާނުން ކޮވިޑް-19 ފެތުރެމުންދާއިރު، ހުކުރު ދުވަހު އެ ޤައުމުން ވަނީ 72 އަހަރުގެ މީހަކު މަރުވެފައެވެ.