ފަގީރުންނަށް މުސާރަ ހަދިޔާކުރި ޓީޗަރަށް އެއް މިލިއަން ޑޮލަރުގެ އިނާމެއް

ލިބޭ މުސާރައިގެ 80 އިންސައްތަ ފަގީރު ދަރިވަރުންގެ އާއިލާތަކަށް ހަދިޔާކުރި ކެންޔާގެ ޓީޗަރަކަށް، 2019ވަނަ އަހަރުގެ ދުނިޔޭގެ އެއްމެ މޮޅު ޓީޗަރުގެ އެވޯޑާ އެކު އެއް މިލިއަން ޑޮލަރު ލިބިއްޖެއެވެ.

މެތްސް އާއި ފިޒިކްސް ކިޔަވަދޭން އުޅޭ ޕީޓަރ ތަބީޗީއަށް ދުނިޔޭގެ އެއްމެ މޮޅު ޓީޗަރުގެ އެވޯޑު ލިބުމަށް ފަހު ދެއްކި ވާހަކާގައި އޭނާ ބުނީ، އެވޯޑު އެއްމެ ހައްގު ފަރާތަކީ އޭނާ ކިޔަވައިދޭ ކުދިން ކަމަށެވެ. އޭނާ ބުނީ އޭނާއަށް މިހިސާބަށް އާދެވުނީ ކިޔަވައިދޭ ދަރިވަރުން ހާސިލްކޮށްފައިވާ ކަންކަމުން ކަމަށެވެ. އަދި މި އެވޯޑުން އަންގައިދެނީ އެކުދިންނަށް ކޮންމެ ކަމެއް ވެސް ކުރެވިދާނެ ކަން ކަމަށް ބުނެ އޭނާ ވަނީ އޭނާގެ ދަރިވަރުންނަށް ވަރަށް ބޮޑަށް ޝުކުރުއަދާކޮށްފައެވެ.

މި އެވޯޑު ދޭ ފަރާތް ކަމުގައިވާ ދުބާއީގައި ހަރަކާތްތެރިވާ ވަރކީ ފައުންޑޭޝަނުން ވަނީ ތަބީޗީ މަސައްކަތަށް ބަހައްޓާ ފަރުވާތެރިކަމާއި، ބުރަ މަސައްކަތް އަދި ދަރިވަރުންގެ ހުނަރަށް ކުރާ އިތުބާރަށް ތައުރީފްކޮށްފައެވެ. އަދި އޭނާގެ ސްކޫލްގައި ހުރި މަދު ވަސީލަތްތަކާއި އެކުވެސް ކެންޔާގެ ގައުމީ ފެންވަރުގައި ބޭއްވި ސައިންސް މުބާރާތްތަކުގައި ހޯދި ކާމިޔާބީތައް މިކަމަށް ހެކިވާކަމަށް ވެސް އެ ފައުންޑޭޝަނުން ނެރުނު ބަޔާނެއްގައި ވަނީ ބުނެފައެވެ.

ދުބާއީގައި އޮތް ހަފުލާއެއްގައި ތަބީޗީއާ އެވޯޑު ހަވާލުކުރީ ހޮލީވުޑްގެ މަޝްހޫރު އެކްޓަރު ހިއު ޖެކްމަންއެވެ. އޭނާއަށް އެވޯޑު ލިބުމުން ކެންޔާގެ ރައީސް އުހޫރޫ ކެންޔައްޓާ ވަނީ ވީޑިއޯ މެސެޖަކުން މަރުހަބާ ކިޔާފައެވެ.

ތަބީޗީ ކިޔަވައިދޭ ސްކޫލަކީ ކެންޔާގެ ރަށްފުށުގައި ހުންނަ ސްކޫލެކެވޭ. ސްކޫލަށް ކިޔަވަންދާ ބައެއް ކުދިން ހަތް ކިލޯމީޓަރުގެ ދިގު ރާސްތާއެއް ހިނގަން ޖެހޭ އިރު، ވިއްސާރަ މޫސުމުގައި ބައެއް މަގުތައް ބޭނުން ނުކުރެވޭ ވަރަށް ޗަކަވެއެވެ. ތަބީޗީ ކިޔަވައިދޭ ސްކޫލުގައި އެއްމެ ކޮމްޕިއުޓަރެއް ހުންނަ އިރު އޭނާގެ ގިނަ ފިލާވަޅުތަކުގައި އައިސީޓީ 80 އިންސައްތައަށް ބޭނުންކުރެއެވެ.