ކޮވިޑް-19: އެޗްޑީއެފްސީގެ ލޯނުތައް ދެއްކުމަށް ލުޔެއް
1 މަރޗް އިން 31 އޮގަސްޓާ ހަމައަށް ފައިސާ ދެއްކުން ފަސްކޮށްދިނުމަށް ނިންމާފައިވާ ކަމަށް އެކުންފުނިން ބުނޭ
އެޗްޑީއެފްސީގެ އަހަރީ އާންމު ޖަލްސާގެ ތެރެއިން
ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) ގެ ހައުސިން ސްކީމްތަކަށް ފައިސާ ދެއްކުން ހަ މަސްދުވަހަށް ފަސްކޮށްފި އެވެ.
އެކަމުގެ ތަފްސީލު ހާމަކޮށް އެކުންފުނިން ނެރެފައިވާ ބަޔާނުގައި ބުނެފައިވަނީ ސަރުކާރުން ރާވައި ކުރިޔަށް ގެންދާ އިކޮނަމިކް ރިކަވަރީ ޕްލޭންގެ ދަށުން އެޗް.ޑީ.އެފްސީ އިން ވަނީ އެކުންފުނީގެ އިސްލާމިކް ވިންޑޯ، އެޗް.ޑީ.އެފްސީ އަމްނާ މެދުވެރިކޮށް ހައުސިންގ ފައިނޭންސް ފެސިލިޓީ ނަގާފައިވާ ފަރާތްތަކުގެ ތެރެއިން ބޭނުންވާ ފަރާތްތަކަށް މަހުން މަހަށްފައިސާ އަނބުރާ ދެއްކުމުގެ މުއްދަތު 6 މަސްދުވަހަށް ފަސްކޮށްދިނުމަށް ނިންމާފައިވާ ކަމަށެވެ.
އެގޮތުން 1 މަރޗް އިން 31 އޮގަސްޓާ ހަމައަށް ފައިސާ ދެއްކުން ފަސްކޮށްދިނުމަށް ނިންމާފައިވާ ކަމަށް އެކުންފުނިން ބުނެއެވެ. މިގޮތުން 6 މަސް ދުވަހުގެ މުއްދަތައް ފަސްކުރަން އެދޭ ފަރާތްތަކުން މިފެށޭ އެޕްރީލް މަހުގެ 15 ގެ ކުރިން ލިޔުމުން ނުވަތަ އީމެއިލް އިން ހުށަހެޅުމަށް އެކުންފުނިން އެދެއެވެ. އީމެއިލް މެދުވެރިކޮށް ހުށަހެޅުމަށް amna@hdfc.com mv އީމެއިލްކުރުމަށް އެޗްޑީއެފްސީން އެދެއެވެ. އީމެއިލް މެދުވެރިކޮށް ހުށަހެޅުމުން މިގޮތުންދެވޭ 6 މަސްދުވަހުގައި ފެސިލިޓީއިން ފައިނޭންސް ކޮށްފައިވާ އެސެޓުތަކުން ކުލި އަދި މަހުން މަހަށް އަނބުރާ ދައްކަންޖެހޭ ފައިސާގެ ޢަދަދު ފަސްކޮށްދެވޭނެ ކަމަށް އެޗްޑީއެފްސީން ބުނެއެވެ.
ނަމަވެސް މި 6 މަސް ދުވަސް ފެސިލިޓީގެ ޖުމްލަ މުއްދަތުގެ ތެރެއަށް އިތުރު ކުރެވޭނެ ކަމަށް އެކުންފުނިން ބުނެއެވެ. 6 މަސްދުވަހަށް ފަސްކޮށްދިނުމުގެ ފުރުސަތު ދެވޭނީ ފެސިލިޓީ ނަގާފައިވާ ފަރާތްތަކުގެ ތެރެއިން ގަވާއިދުން ފައިސާ ދައްކަމުން ދާ ފަރާތްތަކަށް ކަމަށް އެޗްޑީއެފްސީން ބުނެއެވެ. އަދި ގްރޭސް ޕީރިއަޑްގައި ހުރި ފެސިލިޓީތަކުން މި މުއްދަތުގައި އިތުރު ޕޭމަންޓެއް ނުނަގާކަމުގައިވާނަމަ ފަސްކޮށްދިނުމަށް އެދެވިދާނެ ކަމަށް އެކުންފުނިން ބުނެއެވެ.
ކޮވިޑް-19 އާއި ގުޅިގެން ދިރިއުޅުމުގެ އާންމު ހާލަތަށް ކުރިމަތިވެފައިވާ އިގްތިޞާދީ ދަތިތަކުން އަރައިގަތުމުގެ ގޮތުން ބޭންކް އޮފް މޯލްޑިވްސް އިން ވެސް ވަނީ ސަރުކާރުގެ އިކޮނޮމިކް ޕެކޭޖުގެ ތެރެއިން ޕާސަނަލް، ހައުސިން އަދި ވިޔަފާރި ލޯނުތައް ދެއްކުން ހަ މަސް ދުވަހަށް ފަސްކޮށްދީފައެވެ.
