ރާއްޖޭގައި ތިބި ޔޫރަޕް ފަތުރުވެރިން ފޮނުވާލުމުގެ އިންތިޒާމްތަކަށް ބޭރުގެ ފަރާތްތަކުގެ ތައުރީފް

ކޮވިޑް-19 އާ ގުޅިގެން ރާއްޖޭގައި ތިބި ޔޫރަޕް ފަތުރުވެރިން އެނބުރި ޤައުމަށް ފޮނުވާލުމުގެ އިންތިޒާމްތައް ރޭވިގެންދިޔަ ގޮތާމެދު ބޭރުގެ ފަރާތްތަކުން ތައުރީފުކޮށްފިއެވެ.

ޔޫރޮޕިއަން އެކްސްޓަރނަލް އެކްޝަން ސަރވިސަސް (އީއީއޭއެސް) އިން ރިޕޯޓް ކޮށްފައިވާގޮތުން ރާއްޖޭގައި ތިބި ޔޫރަޕްގެ ޤައުމުތަކުގެ ފަތުރުވެރިން އަނބުރާ ޤައުމަށް ފޮނުވާލުމުގައި ރާއްޖެއިން އަމަލުކޮށްފައިވާ ގޮތަކީ ބޭރުގެ ޤައުމުތަކާއި ރާއްޖޭގެ އިދާރާތަކުގެ މެދުގައި އޮތް އެއްބާރުލުމާއި ގުޅުން ދައްކުވައިދޭ ލާމަސީލު މިސާލެކެވެ.

އެގޮތުން ރާއްޖޭގައި އެ ޤައުމުތަކުގެ އެމްބަސީއެއް ނެތް ނަމަވެސް ރާއްޖެއިން ފޯރުކޮށްދިން އަވަސް ޚިދުމަތާއި އެހީތެރިކަން އެ ފަރާތުން ވަނީ ފާހަގަކޮށްފައެވެ.

އީއީއޭއެސްއިން ރިޕޯޓްކޮށްފައިވާ ގޮތުން ރާއްޖެއިން ކޮވިޑް-19 އާ ގުޅިގެން އަޅާފައިވާ ފިޔަވަޅުތައް އިތުރަށް ހަރުދަނާ ކުރަން ނިންމިއިރު، ރާއްޖޭގައި 34،000 އަށްވުރެ ގިނަ ބޭރުގެ ފަރާތްތައް ތިއްބެވެ. އޭގެ ތެރެއިންވެސް ގިނައީ ޔޫރަޕްގެ ޤައުުތަކުގެ މީހުންނެވެ. އެގޮތުން ރާއްޖެއާއި ޔޫރަޕާ ދެމެދު ކޮމަރޝަލް ފްލައިޓްތައް ބާއްވައި، ފަތުރުވެރިން އަނބުރާ ފޮނުވާލުމާއި، އެ ފަރާތްތަކަށް ބޭނުންވާ މައުލޫމާތުތައް ފޯރުކޮށްދިނުމުގައި މާލޭގައި ހުންނަ އިނގިރޭސިވިލާތުގެ ހައި ކޮމިޝަނުގެ އެއްބާރުލުން ލިބިގެން ދިޔަކަން ވަނީ ފާހަގަކޮށްފައެވެ.

އޭގެ އިތުރުން، ރާއްޖޭގެ ޝައްކު ކުރެވޭ ކޭސްތަކާއި، ކޮވިޑް-19 ގެ ޙާލަތު ޤަވާއިދުން އެ ފަރާތްތަކަށް އަޕްޑޭޓް ކުރަމުން ދިޔަކަން ފާހަގަކޮށް އީއީއޭއެސްއިން އިތުރަށް ބުނީ، ރާއްޖޭގައި އައިސޮލޭޝަންއާއި ކަރަންޓީންގެ ކަންކަން ބެލެހެއްޓިގެން ދިޔަ ގޮތުން މި ވައިރަސް އިތުރަށް ފެތުރުނަ ނުދީ ކޮންޓްރޯލް ކުރެވިގެންވެސް ދިޔަ ކަމަށެވެ.