ކޮވިޑް-19: އެޗްއައިއެޗް އައިސޮލޭޝަން ފެސިލިޓީއަކަށް ބަދަލުކުރަނީ
25 މާރިޗު 2020 | ބުދަ 03:44ހޮޓެލްގައި ތިބި ފަރާތްތައް އެހެން ކަރަންޓީން ފެސިލިޓީތަކަށް ބަދަލުކުރުމުގެ މަސައްކަތް ކުރިޔަށް އެބަދޭ
ކޮވިޑް-19 އާއި ބެހޭ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގެ ތެރެއިން | ރައީސް އޮފީސް
ހުޅުލޭ އައިލެންޑް ހޮޓެލް އައިސޮލޭޝަން ފެސިލިޓީއަކަށް ބަދަލުކުރުމަށް ނިންމާފައިވާކަމަށް ސަރުކާރުން ހާމަކޮށްފިއެވެ.
ކޮވިޑް-19 އާ ގުޅޭ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ކޮވިޑް-19 އާ ގުޅިގެން ސަރުކާރުން އުފައްދަފައިވާ ޓާސްކްފޯސްގެ ތަރުޖަމާނު މަބްރޫކް އަޒީޒް ވިދާޅުވީ ހުޅުލޭ އައިލެންޑް ހޮޓެލް ނުވަތަ ހުޅުލޭ ކަރަންޓީން ފެސިލިޓީގައި ތިބި ފަރާތްތައް ކައިރީ އެހެން ކަރަންޓީން ފެސިލިޓީތަކަށް ބަދަލުކުރުމުގެ މަސައްކަތް ކުރަމުންދާ ކަމަށެވެ.
މަބްރޫކް ވިދާޅުވީ، މި ގޮތަށް ނިންމުމުގެ ބޭނުމަކީ މިހާރު ކަރަންޓީން ފެސިލިޓީއެއް ގޮތުގައި އެ ހޮޓެލް ބޭނުންކުރަމުން އަންނަ އައުން ނިމުމަކަށް ގެނެސް އައިސޮލޭޝަން ފެސިލިޓީއެއްގެ ގޮތުގައި ބަދަލުކުރުން ކަމަށެވެ. މަބްރޫކް ވިދާޅުވީ ހޮޓެލްގައި ތިބި ފަރާތްތައް މާލެ ކައިރީ ސަރަހައްދުގައި ހުރި ކަރަންޓީން ފެސިލިޓީތަކަށް ބަދަލުކުރެވޭނެ ކަމަށާއި އެކަން ކުރުމުގައި ދިގުމުއްދަތަކަށް ބޭސްފަރުވާކުރާ ކުދިންނާއި އުމުރުން ދުވަސްވީ މީހުންނާއި ކުޑަކުދީން މާލެ އާއި ވިހާވެސް ކައިރި ކަރަންޓީން ފެސިލިޓީއަކަށް ބަދަލުކުރުމަށް އިސްކަންދޭނެ ކަމަށެވެ.
ކޮވިޑް-19 ރާއްޖެއިން ފެނުމާއި ގުޅިގެން، އެ ބަލި ފެތުރިޔަނުދިނުމަށްޓަކައި ސަރުކާރުން ހަރުދަނާ ފިޔަވަޅުތަކެއް އަޅަމުން އަންނައިރު، މިހާތަނަށް ރާއްޖެއިން ކޮވިޑް-19 އަށް ޕޮޒިޓިވްވި 13 މީހުންގެ ތެރެއިން ފަސް މީހަކު ވަނީ ބަލިން ރަނގަޅުވެފައެވެ.
