އީސީގެ ލޯގޯ އާއި ކުލަ އަންނަ ހޯމަދުވަހު ބަދަލުކުރަނީ
23 ޖެނުއަރީ 2019 | ބުދަ 04:06އީސީން މިހާރު ބޭނުންކުރާ ކުލައަކީ ފެހި ކުލަ
އީސީން މިހާރު ބޭނުންކުރަމުން އަންނަ ފެހި ކުލައިގެ ލޯގޯ
އިލެކްޝަންސް ކަމިޝަން (އީސީ)ގެ ލޯގޯ އާއި ކުލަ ބަދަލުކުރާނީ އަންނަ ހޯމަ ދުވަހު ކަމަށް އެކަމިޝަނުން ބުނެފިއެވެ.
އީސީން ބުނީ ލޯގޯ އާއި ކުލަ ބަދަލުކުރުމުގެ މަޝްވަރާތައް އެކަމިޝަނުގެ މެމްބަރުންނާއެކު ކޮށްފައިވާ ކަމަށެވެ.
އިލެކްޝަންސް ކަމިޝަނުގެ މެމްބަރު އަހުމަދު އަކްރަމް ވަނީ އޭނާގެ ޓްވިޓާގައި ލޯގޯ ބަދަލުކުރަން ފެނޭތޯ ސުވާލު ކުރައްވާ، އާންމުންގެ ކޮމެންޓަށް މީގެ ކުރިން ހުޅުވާލާފައެވެ. އަދި ލޯގޯއަށް އިތުރު ފުރިހަމަ ކަމެއް ގެންނަން ޖެހޭ ކަމަށް ގަބޫލުކުރައްވާ ކަމަށް އޭނާ ވިދާޅުވިއެވެ.
އަކްރަމް ވިދާޅުވި ގޮތުގައި އީސީގެ ކުލަ އާއި ލޯގޯ ބަދަލުކުރަން ނިންމީ މީގެ ދެއަހަރު ކުރިންނެވެ. ނަމަވެސް އެ ކަމިޝަންގެ މަސައްކަތްތައް ހުރި ގޮތުން އޭރު އެކަމަށް ވަގުތު ނުދެވުނީ ކަމަށް އޭނާ ވިދާޅުވިއެވެ.
އީސީން މިހާރު ބޭނުން ކުރަނީ ފެހި ކުލައެވެ. އެކަމިޝަނުގެ ކުލަ ކަނޑައަޅަން ނިންމިއިރު، އެއީ ކޮން ކުލައެއް ކަމެއް އަދި ކޮން ލޯގޯއެއް ކަމެއް ހާމައެއް ނުކުރެއެވެ.
