ޕާކިސްތާނާއި، ފިލިޕީންސްގައި ތައުލީމް ހާސިލްކުރަމުންދާ ދިވެހި ކުދިން ރާއްޖެގެނައުމުގެ މަސައްކަތް ކުރަމުންދާ ކަމަށާއި، މިހާރު ކުރިއަށްދަނީ ރާއްޖެއަށް އާދެވޭނެ ޓްރެވަލް ރޫޓިންތައް ހޯދުމުގެ މަސައްކަތް ކަމަށް ސަރުކާރުން ބުނެފި އެވެ.
ކޮވިޑް-19ގެ އެންމެފަހުގެ މަޢުލޫމާތު ހިއްސާކުރުމަށް ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ތަރުޖަމާން މަބްރޫކް އަބްދުއް އަޒީޒް ވިދާޅުވީ ޕާކިސްތާނުގައި ތިބި ދިވެހިންގެ ތެރެއިން އަންނަ ބޭނުންވާ ފަރާތްތަކަށް ނާދެވެނީ ޕާކިސްތާނަށް ޖައްސާ ފްލައިޓްތަކުގެ ދަތުރުތައް މެދުކަނޑާލާފައިވާތީ ކަމަށެވެ.
އެކުދިން ރާއްޖެއަށް ގެނެއުމަށް ކުރާ މަސައްކަތްތަކާ ބެހޭގޮތުން މަބްރޫކް ވިދާޅުވީ ރާއްޖޭގެ ފޮރިން މިނިސްޓްރީން ޕާކިސްތާނުގައި ކިޔަވަން ތިބި 13 ކުދިންނާއި ގުޅި އެކުދިންގެ ހާލަތު ވަރަށް ގާތުން ބަލަމުންދާ ކަމަށެވެ. އަދި މިކުދިންނަށް ރާއްޖެއަށް އާދެވޭނެ ޓްރެވަލް ރޫޓިންތައް ހޯދުމުގެ މަސައްކަތް ދަނީ ކުރަމުންދާ ކަމަށް މަބްރޫކް ވިދާޅުވިއެވެ.
ފިލިޕީންސްގައި ތިބި ދިވެހި ކިޔަވާ ކުދިންނަށް ރާއްޖެ ނާދެވި ދިމާވެފައިވާ މައްސަލަތަކަށް އަލިއަޅުއްވާލައްވާ މަބްރޫކް ވިދާޅުވީ ފިލިޕިންސްއިން ވައިގެ މަގު ބަންދުކޮށްފައިނުވި ނަމަވެސް ބައެއް ފްލައިޓްތައް ކެންސަލްވުމާއި، ފްލައިޓުން ދިވެހި ކުދިންނަށް ޖާގަލިބުމުގައި ދަތިތައް ކުރިމަތިވާ ކަމަށެވެ.
ޕިންސްއިން ބޭރަށް ބައެއް ފްލައިޓްތައް ފުރާގެން އެބަދޭ. ނަމަވެސް ފިލިޕިންސްގައި ތިބި ރާއްޖެއިން އަންނަން ބޭނުންވާ ދިވެހި ކުދިންނަށް ފްލައިޓުން ޖާގަ ލިބުމުގެ ވަރަށް ބޮޑު ދައްޗެއް އުޅޭކަމުގެ. އަދި ބައެއް ފްލައިޓްތައް ކެންސަލްވަމުންދާތީވެ، ފްލައިޓްތަކަށް އެރޭނެ ގޮތެއް ނުވެގެން އުފުދިފައިވާ ހާސްކަން.ކޮވިޑް-19ގެ ޓާސްކް ފޯހުގެ ތަރުޖަމާނު މަބްރޫކް އަޒީޒް
މަބްރޫކް ވިދާޅުވީ މިކުދިންނަށްވެސް ރާއްޖެއަށް އާދެވޭނެ ޓްރެވަލް ރޫޓިންތައް ހޯދުމުގެ މަސައްކަތް ކުރަމުންދާ ކަމަށާއި، އަދި މިހުރިހާ ކުދިންނާ ވެސް ކޮންޓެކްޓް ކުރެވިފައިވާ ކަމަށެވެ. މީގެއިތުރުން މަބްރޫކް ވަނީ ރާއްޖެއިން ބޭރުގެ ގައުމުތަކުގައި ކިޔަވާ ކުދިންނާއި، ދިރިއުޅެމުންދާ އާއިލާތައް ފޮރިން މިނިސްޓްރީގެ ވެބްސައިޓުގައި ރަޖިސްޓަރވުމަށް އިލްތިމާސްކޮށްފައެވެ.
