އޮލިމްޕިކުން ރަން މެޑަލް ހޯދާފައިވާ ވެން ޑަ ބާގް ކޮރޯނާވައިރަހަށް ޕޮޒިޓިވްވެއްޖެ

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް އޮލިމްޕިކް ގޭމްސްގެ ފެތުމުގެ ބައިން ރަން މެޑަލް ހޯދާފައިވާ ވެން ޑަ ބާގް ޕޮޒިޓިވްވެއްޖެ އެވެ.

މި ވައިރަހަށް ޕޮޒިޓިވްވިކަން ވެން ޑަ ބާގް ވަނީ ޓްވިޓާ މެދުވެރިކޮށް ހާމަކޮށްފައެވެ. ސައުތު އެފްރިކާއަށް އަށް އުފަން ބުނީ މި ވައިރަހާ ހަނގުރާމަކުރާތާ މިހާރު 14 ދުވަސްވެފައިވާ ކަމަށާއި، މިއީ މިހާތަނަށް އޭނާ ތަހައްމަލުކުރަން ޖެހުނު އެންމެ އުދަނގޫ އެއް ބަލި ކަމަށެވެ.

އުމުރުން 31 އަހަރުގެ ވެން ޑަ ބާގް ވަނީ 2012 ވަނަ އަހަރު ލަންޑަނުގައި ބޭއްވި އޮލިމްޕިކްސްގެ ފެތުމުގެ 100މ ބްރެސްޓްސްޓްރޯކް ބައިން ރަން މެޑަލް ހޯދާފައެވެ. އަދި އޭނާ ވަނީ 2016 ވަނަ އަހަރު ރިއޯ ޑި ޖެނީރޯގައި ބޭއްވި ސަމާ އޮލިމްޕިކްސްއިން ރިހި މެޑަލްވެސް ހާސިލުކޮށްފައެވެ. އޭނާ ފެތުމުން ރިޓަޔާ ކޮށްފައިވަނީ 2018 ވަނަ އަހަރު އެވެ.

ކުރީގެ ފެތުންތެރިޔާ ވެން ޑަ ބާގް ކޮވިޑް-19 އަށް ޕޮޒިޓިވްވިއިރު، ދުނިޔޭގެ ގިނަ އެތުލީޓުންތަކެއް މިހާތަނަށް ވަނީ މި ވައިރަހަށް ޕޮޒިޓިވްވެފައެވެ. އަދި ކޮވިޑް-19ގެ ސަބަބުން އެކި ކުޅިވަރު މުބާރާތްތައް ފަސްކޮށްފައިވާއިރު، މިއަހަރު ޖަޕާނުގެ ވެރިރަށް ޓޯކިޔޯގައި ބޭއްވުމަށް ހަމަޖެހިފައިވާ އޮލިމްޕިކް ގޭމްސް 2020 ފަސްކުރުމަށް އަންނަނީ މަސައްކަތް ކުރަމުންނެވެ. މިއަހަރުގެ އޮލިމްޕިކްސް ޓޯކިޔޯގައި ބޭއްވުމަށް ތާވަލުކޮށްފައިވަނީ ވަނީ ޖުލައި 24 އިން އޮގަސްޓް 9 އަށެވެ. އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ވަނީ އޮލިމްޕިކްސް ބާއްވާ ތާރީޚު ފަސްކުރަން ޖަޕާން ސަރުކާރަށް ހަތަރު ހަފުތާގެ މުހުލަތެއް ދީފައެވެ.