ކޮވިޑް-19: މާލެގެ މަގުތައް ކްލޮރިންޖަހައިގެން ސާފުކުރަން ފަށައިފި!
23 މާރިޗު 2020 | ހޯމަ 07:11ޑިސްއިންފެކްޓް ކުރުމުގެ މަސައްކަތް ކުރަނީ އެމްއެންޑީއެފްއާއި މާލެ ސިޓީ ކައުންސިލުން ގުޅިގެން
މާލެ ސާފުކުރުމުގެ މަސައްކަތުގެ ތެރެއިން
މުޅި މާލެ ކްލޮރިން ޖަހައިގެން ސާފުކުރަން ފަށައިފިއެވެ.
މާލޭގެ މަގުތައް ސާފުކުރުން ފެށިގެން މިހާރު ކުރިޔަށް ދާއިރު މިކަމާއި ގުޅޭ ތަފުސީލުތައް ހިއްސާކުރަމުން މާލެ ސިޓީގެ މޭޔަރ ޝިފާ މުހައްމަދު ވިދާޅުވީ، މިވަގުތު 2 ކަމެއް ކުރަމުންދާ ކަމަށެވެ. އެގޮތުން މާލޭގެ ހުރިހާ ސަރަހައްދެއް ފެންޖަހައި ސާފުކުރުމާއި ގިނައިން ކުނި ޖަމާވެފައި ނުނަގައި ގިނަ ދުވަސްވެފައިވާ ތަންތަން ސާފުކުރުމުގެ މަސައްކަތް ފަށާފައިވާކަމަށެވެ. ޝިފާ ވިދާޅުވީ، މި މަސައްކަތުގެ ތެރެއިން ގެތައް ކައިރީ ޖަހާފައި ހުންނަ ޕެލެޓްތައް ނެގުމަށްފަހު ސާފުކުރާނެކަމަށެވެ.
އިތުރަށް ވާހަކަ ދައްކަވަމުން މާލެ ސިޓީގެ މޭޔަރު ވިދާޅުވީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖެއިން ފެނުމާއި ގުޅިގެން ސިޓީ ކައުންސިލުން ކުރަމުންދާ މަސައްކަތަށް ރައްޔިތުންގެ ފުރިހަމަ އެއްބާރުލުން ބޭނުންވާކަމަށެވެ. އެގޮތުން، ހެލްތު ޕްރޮޓެކްޝަން އޭޖެންސީން އަންގާފައިވާ ގޮތަށް ސާފުތާހިރުކަން ދެމެހެއްޓުމަށްޓަކައި މަގުތަކަށް ކުޅު ނުޖުހުމަށާއި ގެއިން އުކާލާ ކުނި މަގުތަކުގައި ނުބެހެއްޓުމަށް މޭޔަރު ވަނީ އިލްތިމާސްކުރައްވާފައެވެ. ހޯމަ ދުވަހު ފަށާފައިވާ މި މަސައްކަތުގައި، ހޮޓާ ރެސްޓޯރަންޓް ސަރަހައްދުގައި ހަޑިވެފައި ހުންނަ ތަންތަން ސާފުކުރުމާއި، ވަކީން ގޮސް ޕެލެޓް ތަކުގެ ދަށުގައި ކުނި ޖަމާވެފައިވާ ތަންތަން ސާފުކުރުން ހިމެނެއެވެ.
ޝިފާ ވިދާޅުވީ، މަގުތަށް ސާފުކުރުމުގައި އެޗްޕީއޭއިން ލަފާދިފައިވާ މިންގަނޑަށް ކްލޮރިން ޖަހާނެކަމަށާއި މިކަމުން އެއްވެސް އުޅަނދަކަށް ގެއްލުން ނުވާނެކަމަށެވެ. އަދި މި ދަނޑިވަޅުގައި ހުރިހާ ފަރާތްތަކުންވެސް ފަރުދީ ޒިންމާ އަދާކޮށް މަގުމައްޗަށް ކުނި އުކާނުލުމަށް ޝިފާ ވަނީ އިލްތިމާސްކޮށްފައެވެ. މާލެ ޑިސްއިންފެކްޓް ކުރުމުގެ މަސައްކަތް ކުރަނީ އެމްއެންޑީއެފްއާއި މާލެ ސިޓީ ކައުންސިލުން ގުޅިގެންނެވެ.
