ހިތަދޫ ރީޖަނަލް ހޮސްޕިޓަލްގެ ފާޚާނާ މަރަދޫ ކައުންސިލަރަށް ސާފުކުރަންޖެހިއްޖެ
18 އެޕްރީލު 2018 | ބުދަ 18:00އެތަނުގެ ފާޚާނާ ހަޑިކަމުގެ ޝަކުވާ އޮތީ ވަރަށް ބޮޑުވެފަ
ކައުންސިލަރު ފައިސަލް ފާޚާނާ ސާފުކުރަނީ
އައްޑޫ ސިޓީ، ހިތަދޫ ރީޖަނަލް ހޮސްޕިޓަލުގެ ފާހާނާ މުޑުދާރުވެ ސާފުތާހިރުކަން ކުޑަވެފައިވާ ކަމަށް ބުނެ އެތައް ބަޔަކު ސޯޝަލް މީޑިއާގައި ފޮޓޯތައް ޝެއާކޮށް ފާޑު ކިއަމުން ދަނިކޮށް މަރަދޫ ދާއިރާގެ ކައުންސިލަރު ފައިސަލް އިބްރާހިމް އެ ފާހާނާ ސާފުކޮށްފިއެވެ.
އައްޑޫއިން ވާހަކަ ދެއްކި މީހަކު ނަން ނުޖެހުމަށް ޝަރުތުކޮށް ބުނި ގޮތުގައި އެތަނުގެ ފާޚާނާ ހަޑިކަމުގެ ޝަކުވާ އޮތީ ވަރަށް ބޮޑުވެފައެވެ.
ހިތަދޫ ރީޖަނަލް ހޮސްޕިޓަލްގެ ގައިނީ ވޯޑްގެ ފާޚާނާ ކައުންސިލަރު ފައިސަލް ސާފުކުރީ ބުދަ ދުވަހުގެ ހަވީރެވެ. ރާއްޖެއެމްވީއަށް މައުލޫމާތު ދެއްވަމުން ފައިސަލް ވިދާޅުވި، އޭނާ އެ ފާޚާނާ ސާފުކުރަން ޖެހުނީ އެތަން ހަޑިކަމުން ހިތަށް ކެތްނުވެގެން ކަމަށެވެ.
ހިތަދޫ ރީޖަނަލް ހޮސްޕިޓަލްގެ ގައިނީ ވޯޑްގެ ފާހާނާ
"އެއީ ގައިނި ވޯޑް.އަޅުގަނޑަށް ހަމަ ކެއްނުވީ، އަންހެނުން ބަލިވެގެން އެޑްމިޓްކޮށްގެން މި އުޅެނީ މި ވޯޑްގައި. އަޅުގަނޑަކަށް ނޭނގޭ މިތަން މިހާ ހަޑިކޮށް އޮންނަން ޖެހޭ ސަބަބެއް،" ފައިސަލް ވިދާޅުވިއެވެ.
ފައިސަލް އެތަން ސާފުކުރީ އަމިއްލައަށް ސާފުކުރާ ތަކެއްޗާއި ބާލިދީ ފަދަ ތަކެތި ވެސް ގަނެގެންނެވެ.
ހިތަދޫ ރީޖަނަލް ހޮސްޕިޓަލްގެ ގައިނީ ވޯޑްގެ މި ފާޚާނާ ހަޑިވެފައި ހުރި ފޮޓޯތައް ސޯޝަލް މީޑިއާގައި ދައުރުވާތާ ދެތިން ދުވަސްވެއްޖެއެެވެ. ދާދި ފަހުން ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވި ބަސްފުޅަކަށް އަމާޒުކޮށް ބައެއް މީހުން ބުނީ އެ ފާޚަނާ ހުރީ "ޓޯކިޔޯ" ފެންވަރުގައެވެ. އަދި އަނެއް ބައި މީހުން އެއީ ހޮސްޕިޓަލެއްތޯ ވަނީ ސުވާލު އުފައްދާފައެވެ.
