މަގުތައް ހެދުމުގެ މަސައްކަތް ކުރުމަށް ބަންދުކޮށްފައިވާ ސަރަހައްދުގައި ވެހިކަލް ދުއްވުން މަނާކޮށްފި
21 ޖުލައި 2018 | ހޮނިހިރު 06:10އެ މަސައްކަތަކީ ވަރަށް ބާރު ސްޕީޑުގައި ކުރިއަށް ގެންދާ މަޝްރޫއެއް
ރިންޑް ރޯޑްގެ މަސައްކަތް ކުރިއަށް ގެންދާ މާލޭގެ ބޮޑުތަކުރުފާނު މަގު
މާލެ އާއި ހުޅުލެއާ ދެމެދު ތަރައްގީ ކުރަމުން އަންނަ ސިނަމާލެ ބްރިޖާ ގުޅޭ މާލޭގެ މަގުތައް ހެދުމުގެ މަސައްކަތް ކުރުމަށް ބަންދުކޮށްފައިވާ ސަރަހައްދުގައި ވެހިކަލްތައް ނުދުއްވުމަށާއި، ޕާކް ނުކުރުމަށް ހައުސިން މިނިސްޓްރީން އަންގައިފިއެވެ.
ހައުސިން މިނިސްޓްރީން ކޮށްފައިވާ އިއުލާނެއްގައި ބުނެފައި ވަނީ ރިންގް ރޯޑުގެ މަސައްކަތަކީ އެ މިނިސްޓްރީން ޚާއްސަ އިސްކަމެއް ދީގެން ކުރިއަށް ގެންދާ މަސައްކަތެއް ކަމަށާއި، މި ދުވަސް ވަރަކީ އެ މަސައްކަތް ބާރު ސްޕީޑެއްގައި ކުރިއަށްދާ ދުވަސްވަރެއް ކަމަށެވެ. އެހެންކަމުން ބަންދުކޮށްފައިވާ ސަރަހައްދުގައި ވެހިކަލް ނުދުއްވުމަށާއި ޕާކް ނުކުރުމަށް އިލްތިމާސް ކުރާ ކަމަށެވެ.
ހައުސިން މިނިސްޓްރީން ބުނީ މަގު ހެދުމުގެ މަޝްރޫއުގެ ދަށުން ހުޅުމާލެ ޓާމިނަލް އިން ފެށިގެން މެރީބްރައުނާ ހަމައަށް ބަންދުކޮށްފައިވާ ކަމަށެވެ. އެ މަސައްކަތަށް އެ ސަރަހައްދުގެ ޓްރެފިކަށް ބަދަލު ގެނެސް އެސަރަހައްދުގައި ވެހިކަލްތައް ޕާކް ނުކުރުމަށް ކުރިން ވެސް ޓްރާންސްޕޯޓް އޮތޯރިޓީން އަންގާފައިވާ ކަމަށާއި، ނަމަވެސް އެކަމަށް ހައްލެއް ލިބިފައިނުވާ ކަމަށެވެ.
އެ ސަރަހައްދުގައި އެއްވެސް ވެހިކަލެއް ޕާކް ކުރާނަމަ، އެ ވެހިކަލް އެތަނުން ނެގޭނެކަން ފާހަގަކޮށް މިނިސްޓްރީން ބުނީ ވެހިކަލް ނެގުމުގެ ތެރޭގައި ވެހިކަލަށް ލިބޭ ގެއްލުމަށް ޒިންމާ ނުނަގާނެ ކަމަށެވެ. އަދި ޓްރާންސްޕޯޓް އޮތޯރިޓީން ޓްރެފިކް ފްލޯއަށް ގެނެސްފައިވާ ބަދަލާއި އެއްގޮތަށް އަމަލު ކުރުމަށާއި ފުލުހުންގެ އިރުޝާދުތަކާއި އެއްގޮތަށް އަމަލު ކުރުމަށް ވެސް ވަނީ އިލްތިމާސް ކޮށްފައެވެ.
މަގު ހެދުމުގެ މަސައްކަތާ ގުޅިގެން ދަރުބާރުގެ ކައިރިން ބޮޑުތަކުރުފާނު މަގަށް ނުކުންނަ މަގާއި ފެމެލީ ކޯޓު ކައިރީގެ މަގު ވަނީ ބަންދުކޮށްފައެވެ. މާލޭގެ އިރުމަތީ ފަރާތާއި ދެކުނު ފަރާތުން ބޮޑުތަކުރުފާނުގެ މަގުގައި ހަތަރު ލޭން ހިމެނޭ ގޮތަށް 16 މީޓަރަށް ފުޅާކުރަން ވެސް ވަނީ ނިންމައިފައެވެ. ބްރިޖަށް ދަތުރުކުރާ މައި މަގުތައް ފުޅާ ކުރާ އިރު މަގުގެ ކޮންމެ ފަރާތެއްގައި ދެ މީޓަރުގެ ޕޭވްމަންޓެއް އޮންނާނެ އެވެ.
ބޮޑުތަކުރުފާނުގައި މިހާރު ތާރު އަޅާފައިވާ ހިސާބުން ފެށިގެން ހުޅުމާލެ ފެރީ ޓާމިނަލްއާ ހަމައަށް ތާރު އަޅަން ވަނީ ނިންމާފައެވެ. މި މަގު ތަރައްގީ ކުރުމުގެ މަސައްކަތާ އެކު އާޓިފިޝަލް ބީޗުގެ ސްޓޭޖް ނަގާ އެސަރަހައްދުގެ ހުރިހާ ގަހެއް ވެސް ވަނީ ކަނޑާލާފައެވެ. އެކަމަކު މިމަގުގެ ހެދުމުގެ މަޝްރޫއު ނިމުމުން ގަސް އިންދާނެ ކަމަށް ހައުސިން މިނިސްޓްރީން ވަނީ ބުނެފައެވެ.
