މާލެ އާއި ހުޅުލެއާ ދެމެދު ތަރައްގީކުރަމުން އަންނަ ޗައިނާ-މޯލްޑިވްސް ފްރެންޑްޝިޕް ބްރިޖާއި ގުޅޭ މާލޭގެ މަގުތައް ހެދުމުގެ މަސައްކަތް ފަށާފައިވާ ކަމަށް ހައުސިން މިނިސްޓަރު ޑރ މުހައްމަދު މުއިއްޒު ވިދާޅުވެއްޖެ އެވެ.

މާލެ-ހުޅުލެ ބްރިޖާ ގުޅޭ މާލޭގެ މަގުތައް ފުޅާކޮށް ތާރުއަޅައިގެން ހެދުމުގެ މަސައްކަތާއި ބެހޭ ގޮތުން ހައުސިން މިނިސްޓަރު މުއިއްޒު ވިދާޅުވީ މަގުތައް ހަދުމުގެ މަސައްކަތް ކުރަނީ ބްރިޖްގެ މަސައްކަތް ވެސް ކުރާ ޗައިނާގެ ކުންފުނި، ސީސީސީސީއިން ކަމަށެވެ. އެ މަސައްކަތް ޖުލައި 26 އަށް ނިންމާލެވޭނެ ކަމަށް އުންމީދު ކުރައްވާ ކަމަށް ވެސް މިނިސްޓަރު ވިދާޅުވި އެވެ.

މަގުހެދުމުގެ މަސައްކަތާ ގުޅިގެން ދަރުބާރުގެ ކައިރިން ބޮޑުތަކުރުފާނު މަގަށް ނުކުންނަ މަގާއި ފެމެލީ ކޯޓު ކައިރި މަގު ވަނީ ބަންދުކޮށްފަ އެވެ. މާލޭގެ އިރުމަތީ ފަރާތާއި ދެކުނު ފަރާތުން ބޮޑުތަކުރުފާނުގެ މަގުގައި ހަތަރު ލޭން ހިމެނޭ ގޮތަށް 16 މީޓަރަށް ފުޅާކުރަން ވެސް ވަނީ ނިންމައިފަ އެވެ. ބްރިޖަށް ދަތުރުކުރާ މައި މަގުތައް ފުޅާ ކުރާ އިރު މަގުގެ ކޮންމެ ފަރާތެއްގައި ދެ މީޓަރުގެ ޕޭވްމަންޓެއް އޮންނާނެ އެވެ.

ބޮޑުތަކުރުފާނުގައި މިހާރު ތާރު އަޅާފައިވާ ހިސާބުން ފެށިގެން ހުޅުމާލެ ފެރީ ޓާމިނަލްއާ ހަމައަށް ތާރު އަޅަން ވަނީ ނިންމާފަ އެވެ. މި މަގު ތަރައްގީ ކުރުމުގެ މަސައްކަތާ އެކު އާޓިފިޝަލް ބީޗުގެ ސްޓޭޖް ނަގާ އެސަރަހައްދުގެ ހުރިހާ ގަހެއް ވެސް ވަނީ ކަނޑާލާފައެވެ. އެކަމަކު މިމަގުގެ ހެދުމުގެ މަޝްރޫއު ނިމުމުން ގަސް އިންދާނެ ކަމަށް ހައުސިން މިނިސްޓްރީން ވަނީ ބުނެފަ އެވެ.