ކޮވިޑް-19 ގެ ޓާސްކްފޯސްއާއި ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިހު ބައްދަލުކުރައްވައިފިއެވެ.

އާދިއްތަ ދުވަހުގެރޭ ރައީސް އޮފީހުގައި ބޭއްވި ބައްދަލުވުމުގައި ރައީސުލްޖުމްހޫރިއްޔާގެ އިތުރުން، ކޮވިޑް-19 ވިލަރެސް ކުރުމަށް އެކުލަވާލާފައިވާ ޓާސްކްފޯސްގެ މެމްބަރުން ބައިވެރިވެވަޑައިގެންފައިވާއިރު، ކަމާބެހޭ މަސްއޫލުވެރިންވެސް މި ބައްދަލުވުމުގައި ބައިވެރިވެ ވަޑައިގެންފައިވެއެވެ.

މިބައްދަލުކުރެއްވުމުގައި މަޝްވަރާކުރައްވާފައިވަނި ކޮވިޑް-19 އާއި ގުޅިގެން ސަރުކާރުން އަޅުއްވަމުން ގެންދަވާ ފިޔަވަޅުތައް އިތުރަށް ތަންފީޒުކުރެއްވުމާއި ގުޅޭގޮތުންނެވެ.

ރާއްޖެއިން މިހާތަނަށް ކޮވިޑް-19 އަށް 13 ބިދޭސީން ޕޮޒިޓިވްވެފައިވާއިރު، އޭގެ ތެރެއިން 3 މީހުން ވަނީ ރަނގަޅުވެފައެވެ.

ކޮވިޑް-19 އާ ގުޅިގެން ރާއްޖޭގައި ސިއްޙީ ކުއްލި ނުރައްކަލުގެ ޙާލަތު އިއުލާނުކޮށްފައިވާއިރު، ސިއްޙީ ކުއްލި ނުރައްކަލުގެ ޙާލަތުގެ ދަށުން ލިބިދޭ ބާރުގެ ދަށުން މީހުން އެއްވެ އުޅުން މަދު ކުރުމަށް ދަނީ ބޮޑެތި ފިޔަވަޅުތަކެއް އަޅަމުންނެވެ.