ކޮވިޑް-19 އަށް ޝައްކުވާ އަލާމާތްތަކެއް ފެނިގެން އަންނަތަރަ ދިގު މޯލްޑިވްސް ރިސޯޓުގެ ތިން މީހެއްގެ ސާމްޕަލް ނެގުމުގެ މަސައްކަތް ފަށައިފިއެވެ.

ރާއްޖޭގައި ކޮވިޑް-19 ޖެހުނު މީހުންގެ ތެރެއިން ދެ މީހަކީ އެ ރިސޯޓުން ޕޮޒިޓިވްވި ދެ މީހުންނެވެ. އެ ދެމީހުންނަށް ގުޅުންހުރި މީހުން ހޯދާ އޭގެ ތެރެއިން ބައެއް ފަރާތްތަށް ވަނީ މީގެ ކުރިން އެކަހެރި ކޮށްފައެވެ. އަދި އެ ރަށަށް އަރާ ފޭބުން ބަންދުކޮށްފައި އޮތުމަށް ފަހު ރަށް ވަނީ އަލުން ހުޅުވާފައެވެ.

އާދީއްތަ ދުވަހު ނެޝަނަލް އެމަރޖެންސީ އޮޕަަރޭޝަން ސެންޓަރުގައި ނޫސްވެރިންނަށް މަޢުލޫމާތު ދެެއްވަމުން ކޮވިޑް-19 އަށް ސަރުކާރުން ކަނޑައަޅުއްވާފައިވާ ތަރުޖަމާނު މަބްރޫކް އަޒީޒް ވިދާޅުވީ، އަނަންތަރާ ދިގުން ބަލީގެ އަލާމާތްތައް ފެނިގެން އިތުރު ދެ ބިދޭސިންނާއި، ދިވެއްސެއްގެ ސާމްޕަލް ނަގާ އެމީހުންގެ ޓެސްޓު ހެދުމުގެ މަސައްކަތް ކުރަމުންދާ ކަމަށެވެ. އެ ތިން މީހުންވެސް އެކަހެރި ކޮށްފައިވާއިރު، އެ ރަށް މޮނިޓަރިންގެ ޙާލަތަައް ގެނެވިފައިވާ ކަމަށް މަބްރޫކް ވިދާޅުވިއެވެ. މަބްރޫކް ވިދާޅުވީ، ލަންކާގެ އަދާރަން ކުންފުނިން ރާއްޖޭގައި ހިންގަމުން އަންނަ އަދާރަން ކްލަބް ރަންނާޅިން ނެގި ސާމްޕަލާއި، ސެންތާރާ ގްރޭންޑްގެ އިތުރުން ''އަލިއޮން'' ކާގޯ ބޯޓުން ނެގި ފަޅުވެރިމީހާގެ ސާމްޕަލްވެސް ނެގެޓިވް ކަމަށެެވެ.

އެ މީހާ މިހާރު ހުރީ ދާދި ފަހުން ކަރަންޓީނު ފެސިލީޓީއެއްގެ ގޮތުގައި ބޭނުންކުރަން ފެށި ހުޅުލޭ އައިލެންޑް ހޮޓަލް (އެޗްއައިއެޗް) ގައެވެ. މިހާރު މޮނިޓަރިންގެ ހާލަތުގައި އޮތީ، ސިނަމަން ހަކުރާހުރާ އަދި ވެލިގަނޑު އައިލެންޑް ރިސޯޓް އެންޑް ސްޕާއެވެެ. ރާއްޖެއިން ކޮވިޑް-19 އަށް 13 މީހަކު ޕޮޒިޓިވްވި އެވެ. އޭގެ ތެރެއިން ތިން މީހަކު ވަނީ ބަލިން ރަނގަޅުވެފައެވެ. ބަލި ޖެހުނު އެންމެންނަކީވެސް ބިދޭސީންނެވެ. ކޮރޯނާވައިރަސް އަށް އަދި މިހާތަނަށް އެއްވެސް ދިވެއްސަކު ޕޮޒިޓިވްނުވެއެވެ.