ކަރަންޓީން ފެސިލިޓީގެ ގޮތުގައި 2288 އެނދު ހަމަޖައްސައިފި

ކަރަންޓީން ފެސިލިޓީގެ ގޮތުގައި 2288 އެނދު ކަނޑައަޅާފައިވާކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

އަލީ ވަހީދު ކުރެއްވި ޓްވީޓެއްގައި ވިދާޅުވީ ކަރަންޓީން ފެސިލިޓީގެ ގޮތުގައި ޖުމުލަ 1158 ކޮޓަރި ކަނޑައެޅިފައިވާ ކަމަށެވެ. އަދި އެއީ އެނދުގެ ނިސްބަތުން ބަލާނަމަ 2288 އެނދު ކަމަށްވެސް އަލީ ވަހީދު ވިދާޅުވި އެވެ.

ކަރަންޓީން ފެސިލިޓީ އަދި އައިސޮލޭޝަން ފެސިލިޓީގެ ގޮތުގައި ޖުމުލަ 10 ތަނެއް ކަނޑައަޅާފައިވާއިރު، އެތަންތަނުގެ ފޯކަލް ޕޮއިންޓްގެ ގޮތުގައި ޓޫރިޒަމް މިނިސްޓަރީގެ ބައެއް އޮފިޝަލުންވެސް ވަނީ ކަނޑައަޅުއްވާފައެވެ.

ޓޫރިޒަމް މިނިސްޓްރީގެ ފަރާތުން ކަނޑައަޅާފައިވާ ކަރަންޓީން އަދި އައިސޮލޭޝަން ފެސިލިޓީސްތަކުގެ ތެރޭގައި ހިމެނެނީ، ބިޔާދޫ އައިލެންޑް ރިސޯޓް، ހުޅުލޭ އައިލެންޑް ހޮޓެލް، ވެލިދޫ އައިލެންޑް ރިސޯޓް، ފަން އައިލެންޑް ރިސޯޓް، މަލަހިނި ކުޑަ ބަނޑޮސް، ދިއްގިރި ޓޫރިސްޓް ރެސޯޓް، ހޮލިޑޭ އައިލެންޑް، އެނބޫދޫ ވިލެޖް، ރޯޔަލް އައިލެންޑް އަދި ވަރު ބައި އެޓްމޮސްފިއާ ހިމެނެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެންމެފަހުން މައުލޫމާތު ދީފައިވާ ގޮތުގައި ކަރަންޓީން ފެސިލިޓީގައި 302 މީހަކުވެއެވެ. އަދި އައިސޮލޭޝަން ފެސިލިޓީގައި 16 މީހަކު އެބަތިއްބެވެ.

މުޅި ދުނިޔޭގައި ހަލުވިކަމާާއެކު ފެތުރެމުންދާ ކޮރޯނާވައިރަސް (ކޮވިޑް-19)އަށް ޕޮސިޓީވް ވެފައިވަނީ 13 މީހެކެވެ. އޭގެތެރެއިން ތިން މީހަކު އެ ބަލިން ރަނގަޅު ވެފައިވެއެވެ.