ކޮވިޑް-19: ޕާކިސްތާނުން ބައިނަލްއަޤުވާމީ އުދުހުންތައް މެދުކަނޑާލައިފި

ޕާކިސްތާނުން ކުރިއަތް އޮތް ދެ ހަފުތާއަށް ބައިނަލްއަޤުވާމީ އުދުހުންތައް މެދުކަނޑާލައިފިއެވެ.

އެ ޤައުމުގެ ސަރުކާރުން ނެރުނު ބަޔާނެއްގައި ބުނެފައިވަނީ އުދުހުންތައް އޭޕްރިލް މަހުގެ 4 ވަނަ ދުވަހާއި ހަމައަށް މެދުކަނޑާލާނެ ކަމަށެވެ. ހޮނިހިރު ދުވަހު އެކަނި ވެސް ކޮވިޑް-19 އަށް ޕާކިސްތާނުން 292 މީހަކު ވަނީ ޕޮޒިޓްވެފައެވެ. އެ ޤައުމުން މިހާތަނަށް 733 މީހުން ވައިރަސްއަށް ޕޮޒިޓިވްވެފައިވާއިރު ފަރުވާދީގެން 13 މީހުންވަނީ ރަނގަޅުވެފައިވާއިރު، 3 މިހަކު ވަނީ މަރުވެފައެވެ.

އެ ޤައުމުގެ ބޮޑުވަޒީރުގެ، ޤައުމީ ސަލާމަތާއި ބެހޭ ޚާއްޞަ މުޝީރު މުއީދު ޔޫސުފް ވިދާޅުވީ މިގޮތަށް ސަރުކާރުން ނިންމީ ނެޝެނަލް ކޯޑިނޭޝަން ކޮމެޓީއާ އަދި ކަމާ ގުޅޭ އެެހެން ފަރާތްތަކާއި މަޝްވަރާކުރުމަށް ފަހު ކަމަށެވެ.

މުއީދު ޔޫސުފް އިތުރަށް ވިދާޅުވީ މިގޮތަށް ނިންމާފައިވީ ނަމަވެސް ޔޫރަޕުގެ ޤައުމުތަކާއި އަދި އެހެނިހެން ބައްރުތަކުގެ ޤައުމުތަކުގައި ހުރި ޕާކިސްތާން އެއަރ ލައިންގެ ބޯޓުތައް އަނބުރާ ޤައުމަށް އައުމުގެ ފުރުސަތު ދޭނެކަމަށެވެ. އަދި ސަރުކާރުގެ މި ނިންމުމުން، ކާގޯ ފްލައިޓުތައް އިސްތިސްނާވާނެ ކަމަށާއި މިއީ ވަގުތީ ގޮތުން އަޅާފައިވާ ފިޔަވަޅެއް ކަމަށް އޭނާ ވިދާޅުވިއެވެ.

ޕާކިސްތާނުން ބައިނަލްއަޤުވާމީ އޮޕަރޭޝަންތައް ހުއްޓާލިނަމަވެސް، ޑިޕްލޮމޭޓުން މީގެއިން އިސްތިސްނާވާނެކަން ފާހަގަކުރައްވާ މުއީދު ޔޫސުފް ވިދާޅުވީ ކުރިއަތް އޮތް ދެ ހަފުތާގެ ތެރޭގައި 200 ހާސް މީހުން ޕާކިސްތާނަށް ގެނައުމުގެ މަސައްކަތް އެ ޤައުމުގެ ސަރުކާރުން ކުރަމުންދާ ކަމަށެވެ.

ޕާކިސްތާނުން ވަނީ ކޮވިޑް-19 އަށް ޓެސްޓު ކުރުމަށްޓަކައި 14 ލެބޯރެޓަރީއެއް، އެ ޤައުމުގެ އެކި ޕްރޮވިންސްތަކުގައި ޤާއިމުކޮށްފައެވެ. އަދި ޕާކިސްތާނުގެ ހެލްތު މިނިސްޓްރީގެ ސްޓޭޓް މިނިސްޓަރު ޒަފަރު މިރްޒާ ވިދާޅުވީ ކުރިއަށް އޮތް ދުވަސްތަކުގައި އިތުރު ލެބޯރެޓަރީތަކެއް ޤާއިމުކުރެވިގެންދާނެ ކަމަށެވެ.

ހަލުވިކަމާއެކު ދުނިޔޭގެ އެކިކަންކޮޅުތަކުގައި ކޮވިޑް-19 ފެތުރެމުންދާއިރު މިވައިރަސް އަށް ވެކްސިނެއް ހޯދުމުގެ މަސައްކަތް ވެސް އަންނަނީ ކުރަމުންނެވެ. އެގޮތުން އެމެރިކާއިންނާއި ޗައިނާއިން މިހާރު ވަނީ ވެކްސިންއެއް އުފައްދާ، އަޖުމަ ބެލުމުގެ މަސައްކަތް ފަށާފައެވެ.