ޕާކިސްތާނުން އިންޑިއާއަަށް ކަނޑައަޅުއްވާފައި ހުންނަވާ ސަފީރު އަނބުރާ ގައުމަށް ގެނެސްފި
18 ފެބުރުއަރީ 2019 | ހޯމަ 16:59އިންޑިއާއިން ވެސް ވަނީ އެ ގައުމުން ޕާކިސްތާނަށް ކަނޑައަޅުއްވާފައި ހުންނަވާ ސަފީރު އަނބުރާ ގެނެސްފައި
ކަޝްމީރުގައި ދިން ބޮމުގެ ހަމަލާގެ މަންޒަރެއް
ކަޝްމީރުގައި އިންޑިއާ ސިފައިންނަށް އަމާޒުކޮށް ދިން ބޮމުގެ ހަމަލާގެ މައްސަލަ ހޫނުވެ، ޕާކިސްތާނުން އިންޑިއާއަށް ކަނޑައަޅުއްވާފައި ހުންނަވާ ސަފީރު އަނބުރާ ގައުމަށް ގެނެސްފިއެވެ.
ޕާކިސްތާނުގެ ހާރިޖީ އޮފީހުގެ ތަރުޖަމާނު މުހައްމަދު ފައިސަލް ވިދާޅުވީ އިންޑިއާއަށް ކަނޑައަޅުއްވާފައި ހުންނަވާ ހައި ކޮމިޝަނަރު މިހާރު ގައުމަށް އަނބުރާ ވަޑައިގަންނަވަން ދަތުރުފުޅު ފަށާފައިވާ ކަމަށެވެ. އިންޑިއާއިން ވެސް ވަނީ އެ ގައުމުން ޕާކިސްތާނަށް ކަނޑައަޅުއްވާފައި ހުންނަވާ ސަފީރު އަނބުރާ ގެނެސްފައެވެ.
ޕާކިސްތާނާއި އިންޑިއާގެ ގުޅުން އެހާ ގޯސްވާން މެދުވެރިވި ބޮމުގެ ހަމަލާގައި އިންޑިއާގެ ޕެރަމިލިޓަރީ ފުލުހުންގެ 42 މީހަކު ވަނީ މަރާލާފައެވެ. ބޮމުގެ ހަމަލާ ދީފައިވަނީ ފުލުހުން ދަތުރުކުރަމުން ދިޔަ ގާފިލާއަކަށެވެ.
މި ހަމަލާގައި އިންޑިއާއިން ޕާކިސްތާނުގެ އަތެއް ވާކަމަށް ބުނަމުން ދިޔަ ކަމުގައިވީ ނަމަވެސް. ޕާކިސްތާނުން ވަނީ މި ތުހުމަތުތަށް ދޮގުކޮށްފައެވެ. ޕާކިސްތާނުގައި ހަރަކާތްތެރިވާ ހަނގުރާމަވެރި ޖަމާއަތެއް ކަމުގައިވާ ޖައޭޝް-އީ-މުހައްމަދު އިން ވަނީ މި ހަމަލާގެ ޒިންމާ ނަގާފައެވެ.
އިންޑިއާއިން ވަނީ ޕާކިސްތާނު ފޮހެލާނެ ކަމުގެ އިންޒާރު ދީފައެވެ. އަދި ބުރާސްފަތި ދުވަހު ދިން ހަމަލާއާއި ގުޅިގެން ވަރުގަދަ ރައްދެއް ދެއްވާނެކަމަށް ވެސް އިންޑިއާގެ ބޮޑު ވަޒީރު މޯޑީ ވެސް ވަނީ ވިދާޅުވެފައެވެ.
އިންޑިއާއިން ކަޝްމީރުގެ މައްސަލައިގައި ޕާކިސްތާނާއި އެކު ގުޅުން ގޯސްވެފައި އޮންނަތާ 60 އަހަރަށް ވުރެ ގިނަ ދުވަސް ވާން ކައިރިވެފައިވާ އިރު، މި ފަހުން ދެވުނު ބޮމުގެ ހަމަލާ މިއީ ފަހުގެ ތާރީހެއްގައި ވެސް ދިން އެއްމެ ނުރައްކާތެރި ހަމަލާއެވެ.
