ކޮވިޑް-19 އިން ރައްކާތެރިވުމަށް ކުރާ މަސައްކަތުގައި ރާއްޖެއަށް އެހީވުމަށް އިންޑިއާގެ މެޑިކަލް ރިލީފް ޓީމްކުރި މަސައްކަތްތައް ފާހަގަކުރައްވައި ފޮރިން މިނިސްޓަރ އަބްދުﷲ ޝާހިދު ތައުރީފު ކުރައްވައިފިއެވެ.

މިނިސްޓަރު ޝާހިދު ކުރެއްވި ޓްވީޓެއްގައި ވިދާޅުވީ މިދަނޑިވަޅުގައި އިންޑިއާއިން ޓީމެއް ރާއްޖެއަށް އައިސް މުހިންމު ބޭނުންތެރި މަސައްކަތްތަކެއް ކޮށްދީފައިވާ ކަމަށެވެ. އަދި ހިއްސާކުރި މައުލޫމާތުތަކާއި ތަމްރީންތަކުގެ މުހިންމުކަމުގެ މައްޗަށް ވެސް އެމަނިކުފާނު އަލިއަޅުއްވާލެއްވިއެވެ.

ކޮވިޑް-19 އާއި ގުޅިގެން ރާއްޖެއަށް އެހީތެރިވުމަށް އިންޑިއާއިން ފޮނުވި 14 މެންބަރުންގެ މެޑިކަލް އިންޑިއާއަށް ދިޔައީ ހޮނިހިރު ދުވަހުގެ ވަގުތެއްގައެވެ. މިޓީމުން ރާއްޖޭގައި ހޭދަ ކުރި ދުވަސްތަކުގައި ވަނީ އެކި ރަށްރަށަށް ގޮސް ވަރކްޝޮޕްތަކާއި ތަމްރީނު ޕްރޮގުރާމުތަކެއް ބާއްވާފައެވެ. އަދި އައިޖީއެމްއެޗުގައިވެސް ޓީމުގެ ބައެއް ބޭފުޅުން ޙަރަކާތްތެރިވިއެވެ.

ކޮވިޑް-19އާ ގުޅިގެން ރާއްޖެއަށް އިންޑިއާއިން ދަނީ ގިނަ އެހީތަކެއް ފޯރުކޮށްދެމުންނެވެ.

މީގެ އިތުރުން ސާރކްގެ މެންބަރު ގައުމުތަކުން އެކުލަވާލާފައިވާ އެމަރޖެންސީ ފަންޑަށް ދިވެހި ސަރުކާރުން ދެލައްކަ ޑޮލަރު ދިނުމާއި ގުޅިގެން އިންޑިއާގެ ބޮޑުވަޒީރު ނަރެންދްރަ މޯދީ ދިވެހި ސަރުކާރަށް ވަނީ ޝުކުރު އަދާކުރައްވާފައެވެ. އެމަނިކުފާނު ވިދާޅުވެފައިވަނީ މީގެ ސަބަބުން ކޮވިޑް-19 ނައްތާލުމަށް ގުޅިގެން ކުރަމުންދާ މަސައްކަތައް އިތުރު ބާރެއް ލިބިގެންދާނެކަމަށެވެ.