މުސާރަ ނުނަގަން މޮންޗެންގްލަޑްބެކްގެ ކުޅުންތެރިން ނިންމައިފި

މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން ސަލާމަތްވުމަށް، ޖަރުމަނުގެ ކްލަބު ބޮރޫޝިއާ މޮންޗެންގްލަޑްބެކްގެ ކުޅުންތެރިން މުސާރަ ނުނަގާ ގޮތަށް ނިންމައިފި އެވެ.

މިވަގުތު ދުނިޔޭގެ ފުޓްބޯޅައިގެ ހަރަކާތްތައް ހުއްޓާލާފައި އޮތުމުން، އެކި ކްލަބުތަކަށް މާލީ ގޮތުން ވަނީ ގޮންޖެހުންތަކަކާ ކުރިމަތިލާން ޖެހިފައެވެ. ޖަރުމަން ލީގުގެ ކުޅުންވެސް މިވަގުތު ހުއްޓާލާފައިވާއިރު، އަލުން ލީގު ފެށުމަށް ނިންމާފައިވަނީ އަންނަ އޭޕްރީލް މަހުގެ ތިންވަނަ ދުވަހުއެވެ. އެކަމަކު ބެލެވޭ ގޮތުގައި މެދުކަނޑާލާފައިވާ މުއްދަތު އިތުރު ކުރުމުގެ ފުރުސަތު ބޮޑެވެ.

މިއާއެކު މޮންޗެންގްލަޑްބެކް އަށްވެސް މާލީ ގޮންޖެހުންތަކަކާ ކުރިމަތިލާން ޖެހޭއިރު، އެ ކްލަބުގެ ކުޅުންތެރިން މުސާރަ ނުނަގަން މިހާރު ވަނީ ނިންމާފައެވެ.

މުޅި ދުނިޔޭގެ ފުޓްބޯޅަ ވަގުތީ ގޮތުން ހުއްޓަމަކަށް އައިސްފައިވާއިރުމ ކޮރޯނާވައިރަސް (ކޮވިޑް-19) އިން ސަލާމަތްވުމަށް ފުޓްބޯޅަ އެކި ތަރިން އަންނަނީ އެހީތައް ވަމުންނެވެ. އެގޮތުން ކޮރޯނާވައިރަސް (ކޮވިޑް-19) އާ ދެކޮޅަށް ކުރާ މަސައްކަތަށް އެހީވުމަށް ޖަރުމަން ގައުމީ ފުޓްބޯޅަ ޓީމުގެ ކުޅުންތެރިން ވަނީ 2.5 މިލިއަން ޔޫރޯ ހަދިޔާކޮށްފައެވެ. އަދި ލިވަޕޫލްގެ ފޯވާޑް ސަޑިއޯ މާނޭ ވަނީ އަމިއްލަ ގައުމު ކަމަށްވާ ސެނެގާލްގައި މިހާރު ފެތުރެމުންދާ ކޮރޯނާވައިރަސް (ކޮވިޑް-19) އާ ހަނގުރާމަކުރުމަށް އެ ގައުމުން ކަނޑައަޅާފައިވާ ގައުމީ ކޮމިޓީއަށް 45،000 ޔޫރޯ ހަދިޔާކޮށްފައެވެ.

މީގެ އިތުރުން ކޮރޯނާވައިރަސް (ކޮވިޑް-19) އާއި ހަނގުރާމަކުރުމަށް ފީފާއިން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އަށް 10 މިލިއަން ޑޮލަރުގެ އެހީއެއް ހުށަހަޅާނެ ކަމަށް އެ އިދާރާގެ ރައީސް ޖިއަނީ އިންފަންޓީނޯވެސް ވަނީ ވިދާޅުވެފައެވެ.