ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އަހަރީ ބައްދަލުވުން މުއްދަތެއް ނެތް ގޮތައް ފަސްކޮށްފިއެވެ.

އެފްއޭއެމް އަހަރީ ބައްދަލުވުން ކުރިން ބާއްވަން ނިންމާފައި އޮތީ ހުކުރު ދުވަހުގެރޭ 20:30 ގައެވެ. އެކަމަކު އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް (ޖަވާ) ރާއްޖެ.އެމްވީ އަށް މައުލޫމަތު ދެއްވަމުން ވިދާޅުވީ މިހާރު ރާއްޖޭގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން އެފްއޭއެމްގެ އަހަރީ ބައްދަލުވުން ފަސްކުރަން ނިންމައިފައިވާ ކަމަށާއި އަދި އަލުން އަހަރީ ބައްދަލުވުން ބޭއްވޭނެ ދުވަހެއް އަންގާނެ ކަމަށެވެ. މީގެ އިތުރުން ޖަވާ ވިދާޅުވީ އަހަރީ ބައްދަލުވުން ބާއްވާނެ ތާރީހެއް އިއުލާން ކުރާނީ ސަރުކާރު ހުޅުވުމުން ކަމަށެވެ.

އެފްއޭއެމްގެ އަހަރީ ބައްދަލުވުމުގައި އެ އިދާރާގެ އިންތިޚާބު ބޭއްވުމަށް ވެސް ވަނީ ނިންމައިފައެވެ.

އެފްއޭއެމް އިންތިޚާބުގައި 9 ކްލަބުގެ ތާއިދާއެކު ހަމައެކަނި ވާދަކުރާނީ އެފްއޭއެމްގެ މިހާރުގެ ވެސް ރައީސް ބައްސާމް އަދީލް ޖަލީލެވެ.

ބައްސާމް ޓީމުގައި ހިމެނޭ މެންބަރުންނަކީ:

ރައީސް: ބައްސާމް އަދީލް ޖަލީލް

ސީނިއާ ވައިސް ޕްރެސިޑެންޓް: އަލީ އުމަރު

ވައިސް ޕްރެސިޑެންޓް: ހުސެއިން ޝާފިއު

މެންބަރު: އަހުމަދު ޝަކީބް

މެންބަރު: މުހައްމަދު ޝިފާއު

މެންބަރު: މުފާވިޒް ހާފިޒް

މެންބަރު: އައިމިނަތު ޝާނީޒް

މެންބަރު: އަހުމަދު ނަޝީދު

މެންބަރު: މުއާވިޔަތު ޚަލީލް

ފުރަތަމަ ޑިވިޝަނުގެ ވޯޓުލެވޭ 6 ކްލަބުން ވަނީ ބައްސާމަށް ތާއީދުކުރާނެކަން ހާމަކޮށްފައެވެ. އެއީ ދަ ގްރާންޑޭ ސްޕޯޓްސް ކްލަބާއި، ޔުނައިޓެޑް ވިކްޓަރީ އާއި، ޓީސީ ސްޕޯޓްސް ކްލަބާއި، ކްލަބު ގްރީން ސްޓްރީޓްސް އާއި، މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން ކްލަބު އީގަލްސް އެވެ. މީގެ އިތުރުން ދެވަނަ ޑިވިޝަނުގައި ވާދަކުރާ ޕީކޭ އާއި ޖޭޖޭ ސްޕޯޓްސް ކްލަބުގެ އިތުރުން ފުރަތަމަ ޑިވިޝަނަށް ކޮލިފައިވޮ ކްލަބު ވެލެންސިއާވެސް ވަނީ ބައްސާމަށް ތާއީދުކުރާކަން އިއުލާންކޮށްފައެވެ.