އިންޑިއާ ސިއްސުވާލި ނިރްބަޔާ ރޭޕް ކޭސް- 8 އަހަރަށްފަހު ކުށްވެރިން ދަންޖައްސައިފި

މުޅި އިންޑިއާ ސިއްސުވާލި އުމުރުން 23 އަހަރުގެ ޖޯތީ ސިންގް (ނިރްބަޔާ) ގެ ރޭޕް ކޭސްގައި ކުށްވެރިވާ 4 މީހެއް، ހާދިސާ ހިނގިތާ 8 އަހަރު ފަހުން ދަންޖައްސައިފިއެވެ.

މި މައްސަލައިގައި ދައުވާ ސާބިތުވެ ދިއްލީގެ ހައި ސެކިއުރިޓީ ޖަލެއްގައި ހުކުރު ދުވަހު ހެނދުނު ދަންޖައްސާފައިވަނީ އަކްޝޭ ޓާކުރު، ވިނޭ ޝަރްމާ، ޕަވަން ގުޕްތާ އަދި މުކޭޝް ސިންގ އެވެ. އެ 4 މީހުން ދަންޖައްސާފައިވާއިރު، އެމީހުންގެ ފަރާތުން މަރުގެ އަދަބު އުމުރު ދުވަހުގެ ޖަލު ހުކުމަކަށް ބަދަލުކޮށްދިނުމަށްވެސް އެދިފައިވެއެވެ. ނަމަވެސް އެ ޤައުމުގެ ސުޕްރީމް ކޯޓުން ވަނީ އެ ހުށައެޅުންތައް ބަލައި ނުގަތުމަށް ނިންމާފައެވެ.

މީގެ ކުރިންވެސް މި މީހުން މަރަން ދެފަހަރަކު ތާވަލުކޮށް ކެންސަލް ކޮށްފައިވާއިރު، އެ މީހުން ދަންޖެއްސި ވަގުތު ނިރްބަޔާގެ މަންމަ ވަނީ އޭނާގެ ފޮޓޯއަށް ބޮސް ދިނުމަށްފަހު "ދަރިފުޅަށް އިންސާފު ލިބިއްޖެ" ކަމަށް ބުނެފައެވެ.

މި ހާދިސާ ހިނގާފައިވަނީ 2012 ވަނަ އަހަރު ޑިސެމްބަރ މަހު 16 ވަނަ ދުވަހު އޭނާގެ ގެ ރައްޓެހި ފިރިހެން ކުއްޖަކާ އެކީ ފިލްމެއް ބަލަން ގޮސްފައި ގެޔަށް ދިޔަ މަގުމަތީގައެވެ. އެގޮތުން ދިއްލީގެ މަގަކުން ދުއްވާފައި ދިޔަ ބަހެއްގައި 6 މީހުންގެ ގޭންގަކުން ރޭޕް ކޮށް ބޮޑެތި އަނިޔާތަކެއް ދިނުމަށްފަހު ނިރްބަޔާ މަގުމައްޗަށް އެއްލާލާފައި އޮއްވައި ފެނިފައިވަނީ އޭގެ އަނެއް ދުވަހުއެވެ.

މި މައްސަލައިގައި 6 މީހުން ހިމެނޭއިރު، އޭގެ ތެރެއިން އެކަކު ވަނީ މިމައްސަލަައިގައި ޖަލުގައި ބަންދު ކޮށްފައި ހުއްޓާ އަމިއްލައަށް މަރުވެފައެވެ. އަދި މި މައްސަލައިގައި ދެން ހިމެނޭ 18 އަހަރުނުވާ ކުއްޖާވަނީ އަދަބު ފުރިހަމަ ކުރުމަށްފަހު 2015 ވަނަ އަހަރު ދޫކޮށްލާފައެވެ.

ނިރްބަޔާ ރޭޕްކޮށް އޭނަގެ ޖިންސީ ގުނަވަނަށް ބޮޑެތި އަނިޔާ ތަކެއްދިނުމަށްފަހު އެއްލާލާފައިވާއިރު، އޭނާ ބެލި ޑޮކްޓަރުން ބުނެފައިވަނީ އޭނާގެ ޖިންސީ ގުނަވަނަށް ދަގަނޑަކުން ބޮޑެތި އަނިޔާތަކެއް ދީފައިވާކަމަށާއި، އެ އަނިޔާތަކުގެ ސަބަބުން އޭނާގެ ގޮހޮރުވެސް އޮތީ ބޭރަށް ނުކުމެފައި ކަމަށެވެ.

އެ އަނިޔާތަކަށް އިންޑިޔާއިން ފަރުވާ ދިނުމަށް ފަހު ސިންގަޕޫރުގެ ހޮސްޕިޓަލަކަށް ގެންގޮސް އިތުރު ފަރުވާ ދެމުން ދަނިކޮށް އޭނަ މަރުވެފައިވަނީ އެ އަހަރުގެ ޑިސެމްބަރ މަހު 29 ވަނަ ދުވަހު އެވެ.

މިއީ އިންޑިއާގެ ތާރީޚުގައިވެސް ހިނގި އެންމެ ބޮޑު ރޭޕް ކޭސްއެވެ. އަދި ދައުވާ ކުރެވި މިހައި ސީރިއަސް މައްސަލައެއްގެ ގޮތުގައި ބެލުނު ފުރަތަމަ ކޭސްވެސްމެއެވެ. އަދި މި ކޭސްގެ ސަބަބުން އެ ޤަައުމުގައި ރޭޕްއާ ދެކޮޅަށް ވަރުގަދަ ޤާނޫނުތަކެއްވެސް ވުޖޫދުވެގެން ދިޔައެވެ.