ކޮވިޑް-19: އިމަރޖެންސީ މެޑިކަލް ރެސްޕޮންސް އެންޑް ކޯރޑިނޭޝަން ޓީމެއް ރާއްޖެ އަތުވެއްޖެ
18 މާރިޗު 2020 | ބުދަ 16:07ޓީމު އައިސްފައިވަނީ ބުދަ ދުވަހު
އިމަރޖެންސީ މެޑިކަލް ރެސްޕޮންސް އެންޑް ކޯރޑިނޭޝަން ޓީމް
ދުނިޔޭގެ ފެންވަރުގެ އިމަރޖެންސީ މެޑިކަލް ރެސްޕޮންސް އެންޑް ކޯރޑިނޭޝަން ޓީމެއް ރާއްޖެ އަތުވެއްޖެއެވެ.
ޓުއަރިޒަމް މިނިސްޓްރީން ބުނީ ކޮވިޑް-19 އާއި ގުޅިގެން، ރައީސުލްޖުމްހޫރިއްޔާ އުފައްދަވާފައިވާ "ނޭޝަނަލް ޓާސްކްފޯސް" ގެ މަޝްވަރާގެ މަތިން ފަތުރުވެރިކަމުގެ ޞިނާޢަތުގެ އެހީތެރިކަމާއެކު ދުނިޔޭގެ ފެންވަރުގެ އިމަރޖެންސީ މެޑިކަލް ރެސްޕޮންސް އެންޑް ކޯރޑިނޭޝަން ޓީމެއް ބުދަ ދުވަހު ރާއްޖެ އައިސްފައިވާކަމަށެވެ.
އެގޮތުން މިޓީމުގައި ނެޝަނަލް އެމަރޖެންސީ އޮޕަރޭޝަންސް ސެންޓަރގެ ޓެކްނިކަލް އެޑްވައިޒަރީ ގްރޫޕަށް އެހީތެރިވެދޭނެ ތަޖުރިބާކާރު 2 ޑޮކްޓަރުންނާއި، ނޭޝަނަލް ޑިޒާސްޓަރ މެނޭޖްމަންޓް ސެންޓަރަށް މި ބައްޔާއި ގުޅިގެން ކުރަންޖެހޭ މަސައްކަތްތައް ވިލަރެސް ކޮށްދިނުމުގައި އެހީތެރިވެ ދިނުމަށް އެފަދަ އޮޕަރޭޝަންތަކުގެ ތަޖުރިބާ ލިބިފައިވާ ކޯރޑިނޭޓަރެއް ހިމެނެއެވެ. އަދި ކ. ވިލިވަރުގައި ޤާއިމު ކުރެވިފައިވާ އަދި އއ. ވެލިދޫގައި ޤާއިމު ކުރެވެމުންދާ ކަރަންޓީން ފެސިލިޓީތަކުގައި ހަރަކާތްތެރިވުމަށް ތަޖުރިބާކާރު 2 ނަރުހުންނާއި އަދި ބަލި ދެނެގަނެވޭ ހާލަތުގައި އެ ފަދަ ތަންތަނަށް ފަސްޓް ރެސްޕޮންސްގެ ގޮތުގައި ދަތުރުކުރާނެ އެމަރޖެންސީ މެޑިކަލް ޓެކްނީޝަނެއް ޓީމުގައި ހިމެނޭ ކަމަށް ޓުއަރިޒަމް މިނިސްޓްރީން ބުންޏެވެ.
މިނިސްޓްރީން ބުނީ މިޓީމުގައި ހިމެނެނީ އެމެރިކާ، ސައުތު އެފްރިކާ އަދި އިނގިރޭސިލާތުގެ ތަޖުރިބާކާރުން ކަމަށެވެ. ކޮވިޑް-19 އަށް ރައްކާތެރިވުމުގެ ގޮތުން މިހާތަނަށް ޓޫރިޒަމް މިނިސްޓްރީއާއި ޓޫރިޒަމް އިންޑަސްޓްރީއާއި ގުޅިގެން ވިލިވަރުގައި 30 ކޮޓަރީގެ އައިސޮލޭޝަން ފެސިލިޓީއެއް ޤާއިމްކޮށް، ރާއްޖޭގެ އެއަރޕޯޓުތަކުގައި ތަރމަލް ކެމެރާ ވަނީ ހަރުކޮށްފައެވެ. އަދި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީއަށް ބޭނުންވާ މާސްކާއި، އިތުރު މެޑިކަލް އިކުއިޕްމަންޓްސް ހޯދާދެވިފައިވާކަމަށް ވެސް މިނިސްޓްޓްރީން ވަނީ ބުނެފައެވެ.
