އެލައިޑްގެ އޮފީސް ބަންދު، ހިދުމަތްތައް އޮންލައިންކޮށް ލިބޭނެ!
އޮފީސް ބަންދުކުރަން ހަމަޖެހިފައިވަނީ މާޗް މަހުގެ 26 އާ ހަމައަށް
އެލައިޑް އިންޝިއުރެންސްގެ އޮފީސް
ކޮވިޑް-19 އާ ގުޅިގެން އެލައިޑް އިންޝިއުރެންސްގެ އޮފީސް ބަންދުކޮށް, ކުންފުނިން ފޯރުކޮށްދޭ ހިދުމަތްތައް އޮންލައިންކޮށް ލިބޭގޮތަށް ހަމަޖައްސައިފި އެވެ.
ބުދަ ދުވަހު އެލައިޑުން ނެރެފައިވާ ބަޔާނެއްގައި ބުނީ، ބުދަ ދުވަހުން ފެށިގެން 26 މާޗްގެ ނިޔަލަށް އެ ކުންފުނީގެ އޮފީސް ބަންދުވާނެ ކަމަށެވެ. ނަމަވެސް އެ ކުންފުނީގެ ހިދުމަތްތައްވެބްސައިޓްއަދި އީމެއިލް މެދުވެރިކޮށް ލިބޭނެ ކަމަށެވެ. އެލައިޑުން ބުނީ، އެލައިޑްގެ އިސްލާމިކް ވިންޑޯ އަޔާދީ ތަކަފުލްގެ ޚިދުމަތްތަކަށްވެސް ބަދަލުތަކެއް ގެނެވިފައިވާ ކަމަށެވެ.
އެލައިޑްގެ ހިދުމަތްތަކަށް ގެނެސްފައިވާ ބަދަލުތައް:
ބިދޭސީންގެ އިންޝުއަރަންސް ޕޮލިސީތައް، ކަސްޓަމަރުންނަށް އޮންލައިކޮށް ނެގޭނެ އިންތިޒާމް 15 މާރޗް 2020 އިން ފެށިގެން މިހާރު ވަނީ ހަމަޖެހިފައެވެ. ބިދޭސީންގެ އިންޝުއަރަންސް ނެެގުމަށް އެލައިޑްގެ އޮންލައިން ޕޯރޓަލް myallied.mv އަށް ލޮގިން ކުރުމުން ލިބޭނެއެވެ.
އެ ކުންފުނީގެ މޮބައިލް އެޕް އަދި އިންޝުއަރަންސް ޕޯރޓަލް މެދުވެރިކޮށް މޮޓޯ އިންޝުއަރަންސް، ޓްރެވެލް އިންޝުއަރަންސް، ކާރގޯ އިންޝުއަރަންސް އަދި ހޯމް ކޮންޓެންޓް ތަކަފުލް އޮންލައިންކޮށް ކަސްޓަމަރުންނަށް ލިބޭނެއެވެ.
އެލައިޑުން ބުނީ، އެލައިޑް މޮބައިލް އެޕް އަދި އޮންލައިން ޕޯޓަލްގައި ނުހިމެނޭ ހިދުމަތެއް ހޯދުމަށް ކުންފުނީގެ ހިލޭ ގުޅޭ ނަންބަރު 1600 އަށް ގުޅާ sales@allied.mv; sales@ayady.mv އަށް އީމެއިލް ކުރުމުން ޕޮލިސީ ނެންގެވުމުގެ ހުރިހާ އިންތިޒާމެއް ހަމަޖައްސައިދޭނެ ކަމަށެވެ. މިސާލަކަށް އޮޑި ދޯނި ފަހަރުގެ އިންޝުއަރަންސްއެއް ނަގަން ބޭނުން ވެއްޖެނަމަ، ކުންފުނީގެ ހިލޭ ގުޅޭ ނަންބަރަަށް ގުޅައި މި އީމެއިލް އެޑްރެސްތަކަށް އިމެއިލް ކުރުމަށް ވަނީ އިލްތިމާސް ކޮށްފައެވެ.
އެލައިޑުން ދެޭ ގޮތުގައު މި ހާލާތުގައި ބިލްތަކަށް ފައިސާ ދޫކުރުމަށް އެންމެ ރައްކާތެރިގޮތަކީ އެކައުންޓް ޓްރާންސްފަރ މެދުވެރިކޮށް ކަސްޓަމަރުންގެ އެކައުންޓަށް ފައިސާ ޖަމާކުރުން ކަމަށެވެ. މިގޮތުން ކްލެއިމް އަދި މިނޫންވެސް އިތުރު ބިލްތަކަށް އެލައިޑުން ފައިސާ ދައްކާނީ ކަސްޓަމަރުންގެ އެކައުންޓަށް ފައިސާ ޖަމާކޮށްގެންނެވެ. އަދި ޕްރިމިއަމް ނުވަތަ ކޮންޓްރިބިއުޝަން ފައިސާ ބަލައިގަންނާނީ ވެސް ބޭންކް އެކައުންޓް ޓްރާންސްފަރ މެދުވެރިކޮށެވެ. އެކައުންޓް ޓްރާންސްފަރ ހެދުމަށް ޕޮލިސީ ނަންބަރާއި، ޖަމާކުރެވުނު އަދަދާއި (އެއް ޕޮލިސީއަށް ވުރެ ގިނަ ޕޮލިސީއަށް ފައިސާ ދައްކަވާނަމަ) އެކު ބޭންކް އެކައުންޓް ޓްރާންސްފަރ ސްލިޕް treasury@allied.mv އަށް އީމެއިލް ކުރުމުން ޕޭމަންޓް ބަލައިގަނެވި ޕޭމަންޓް ރިސިޕްޓް އީމެއިލް މެދުވެރިކޮށް އެކަސްޓަމަރަކަށް ލިބޭނެ ކަމަށް އެލައިޑުން ބުންޏެވެ.
ސިއްހީ ކުއްލި ނުރައްކަލުގެ ހާލަތުގައި ހިދުމަތްތައް މުޅިންހެން އޮންލައިންކޮށް ދިނުމުގައި ބައެއް ފަހަރު ދިމާވެދާނެ ދަތި އުދަގޫތަކަށް އެލައިޑުން ވަނީ މައާފަށް އެދިފައެވެ. ނަމަވެސް މި ހާލަތުގައިވެސް އަދި ލޮކް ޑައުން ހާލަތަކަށް ދިވެހިރާއްޖެ ދިޔަކަމުގައިވިޔަސް ކުންފުނިން ދެމުންގެންދާ ހިދުމަތްތައް، ކުންފުނީގައި ގާއިމްކުރެވިފައިވާ ޒަމާނީ ވަސީލަތްތައް މެދުވެރިކޮށް، މެދުކެޑުމެއްނެތި ފޯރުކޮށްދޭނެ ކަމުގެ ފުރިހަމަ ޔަގީންކަން އެލައިޑުން ވަނީ ކަސްޓަމަރުންގެ އިތުރުން ހުރިހާ ރައްޔިތުންނަށްވެސް ޔަގީންކަން ދީފައެވެ.
