ހުޅުމާލޭ މެޖިސްޓްރޭޓް ކޯޓު އުވާލުމުގެ މަސައްކަތް ފަށައިފި
18 މާރިޗު 2020 | ބުދަ 13:50ކޯޓެއް ހިންގުމަކީ ގާނޫނު ހުއްދަ ކުރާކަމެއް ކަމާމެދު ހިޔާލު ތަފާތުވެފައިވޭ
ހުޅުމާލޭ މެޖިސްޓްރޭޓް ކޯޓް
ހުޅުމާލޭ މެޖިސްޓްރޭޓް ކޯޓު އުވާލުމަށް ކުރަންޖެހޭ މަސައްކަތްތައް ކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.
ޖޭއެސްސީން ބުދަ ދުވަހު ނެރުނު ބަޔާނެއްގައި ބުނީ، ހުޅުމާލޭ މެޖިސްޓްރޭޓް ކޯޓު އުވާލުމަށްޓަކައި ކުރަންޖެހޭ މަސައްކަތްތައް ކުރުމަށް ކޮމިޝަނުގެ ޖަލްސާގައި ނިންމާފައިވާ ކަމަށެވެ.
ޖޭއެސްސީން މި ނިންމުން ނިންމާފައިވަނީ ސުޕީރިއާ ހަތަރު ކޯޓުގެ ޑިވިޝަންތައް މާލޭގައި ގާއިމްކޮށްފައިވާއިރު މާލޭގެ އަވަށެއް ކަމަށްވާ ހުޅުމާލޭގައި ކޯޓެއް ހިންގުމަކީ ގާނޫނު ހުއްދަ ކުރާކަމެއް ކަމާމެދު ޖޭއެސްސީއާއި ޤާނޫނީ ދާއިރާގައި މަސައްކަތްކުރާ ގިނަ ފަރާތްތަކާމެދު ފާއިތުވި އަހަރުތަކުގައި ބޮޑެތި ހިޔާލުތަފާވުންތަކެއް އުފެދިފައިވާ ދަނޑިވަޅެއްގައެވެ. އެގޮތުން ކުރީގެ ރައީސް މުހައްމަދު ނަޝީދުގެ މައްސަލަ، ހުޅުމާލެ މެޖިސްޓްރޭޓް ކޯޓަށް ހުށަހަޅައި ބަލަން މަސައްކަތް ފެށި ހިސާބުންވެސް އެ މައްސަލަ ފެންމަތިވެ، ޤާނޫނީ ގިނަ ސުވާލުތަކެއް އުފެދިފައިވެއެވެ.
ޖޭއެސްސީގެ ބަޔާނުގައި އިތުރަށް ބުނީ، ކޮވިޑް-19 އާ ގުޅިގެން މިހިިނގާ މާރޗު މަހުގެ 19 އިން ފެށިގެން 26 ގެ ނިޔަލަށް ސަރުކާރު ބަންދުކުރަން ނިންމާފައިވީ ނަމަވެސް ކޮންމެހެން ލިބެންޖެހޭ ޚިދުމަތްތަކުގެ ތެރޭގައި ޝަރުއީ ކޯޓުތަކުގެ ޚިދުމަތްތައް ހިމެނިފައިވާ ކަމަށެވެ. އެގޮތުން އާންމު އުސޫލުން ސަރުކާރު ބަންދު ނޫން ދުވަސްތަކުގައި ފަނޑިޔާރުން ކޯޓަށް ނުކުންނަވަން ޖެހިވަޑައިނުގަންނަވާނެ ކަމަށާއި، ނަމަވެސް ކޮންމެހެން ޝަރީއަތެއް ބާއްވަން ޖެހިއްޖަނަމަ ނުވަތަ މައްސަލައިގެ ބާވަތުން ކޮންމެހެން ކުރިއަށްގެންދަންޖެހޭ މައްސަލައެއް ކޯޓަށް ހުށައެޅިއްޖެނަމަ ކޯޓަށް ނުކުންނަވައިގެން އެ މައްސަލަ ކުރިއަށް ގެންދިއުމަށް ނިންމާފައިވާ ކަމަށެވެ.
