އެސްޑީއެފްސީން ލޯނު ނަގާފައިވާ ފަރާތްތަކަށް ހަ މަސް ދުވަހުގެ ލުޔެއް!

އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ލޯނު ދޫކޮށްފައިވާ ފަރާތްތަކުން ލޯނު އަނބުރާ ދެއްކުން ހަ މަސް ދުވަހަށް ފަސްކުރަން ނިންމައިފިއެވެ.

ލޯނާއި ލޯނުގެ އިންޓްރެސްޓް އަނބުރާ ދެއްކުން ހަ މަސް ދުވަހަށް ފަސްކުރުމުގެ އިތުރަށް، އެ މުއްދަތުގެ ތެރޭގައި ލޯނުގެ އިންޓްރެސްޓް ރޭޓަކީ %4 ކަމުގައި ވަނީ ހަމަޖައްސާފައެވެ. މި ނިންމުމަކީ ކޮވިޑް-19 އާ ގުޅިގެން، ކުދި އަދި މެދު ފަންތީގެ ވިޔަފާރިތަކަށް އެހީތެރިވުމުގެ ގޮތުން އެސްޑީއެފްސީން ނިންމި ނިންމުމެކެވެ.

Advertisement

އެސްޑީއެފްސީއަކީ ރާއްޖޭގައި ހަރަކާތްތެރިވާ މާލީ އިދާރާތަކުގެ ތެރެއިން މިފަދަ ނިންމުމެއް ނިންމި ފުރަތަމަ އިދާރާއެވެ. އެސްޑީއެފްސީއަކީ ދައުލަތުގެ 100 އިންސައްތަ ހިއްސާވާ ކުންފުންޏެކެވެ. އޭގެ ތެރޭގައި ފުވައްމުލަކު ސިޓީ، އައްޑޫ ސިޓީ އަދި މޭލ ސިޓީގެ 15 އިންސައްތަ (ކޮންމެ ސިޓީއަކަށް %5) ހިއްސާ ހިމެނެއެވެ.

މި ކޯޕަރޭޝަނަކީ ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީ އާއި ފަންނީ ލަފާދިނުމުގެ ގޮތުން މިދިޔަ އަހަރުގެ މާޗް މަހުގެ ތެރޭގައި ހުޅުވިގެން ދިޔަ ކުންފުންޏެކެވެ. މިހާތަނަށް އެސްޑީއެފްސީން 120 މިލިއަން ރުފިޔާ ލޯނުގެ ގޮތުގައި ދޫކޮށްފައިވާއިރު، މީގެ ތެރެއިން ގިނަ އަދަދެއްގެ ފައިސާ ދޫކޮށްފައިވަނީ ގެސްޓްހައުސް ތަކަށެވެ.

ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ގޮތުން މި އަހަރުގެ ބަޖެޓުގައި ވެސް ވަނީ ގިނަ އަދަދަކަށް ފައިސާ ހިމަނާފައެވެ. އެގޮތުން 2020 ވަނަ އަހަރަށް ފާސްކުރި ބަޖެޓުގައި އެސްޑީއެފްސީއަށް 450 މިލިއަން ރުފިޔާ ކަނޑައަޅާފައިވެއެވެ.