މިފްކޯއަށް މަސް ގަންނަ އަގު ބޮޑުކޮށްފި
މިބަދަލު ގެނައީ ބާޒާރަށް އައި ބަދަލަކާއި ގުޅިގެން
މާލޭގެ މަސްވާރުކޭޓް ސަރަހައްދު
މަސްވެރިންގެ އަތުން މަސް ގަންނަ އަގު ކިލޯއަކުން އެއް ރުފިޔާ މިފްކޯއިން ބޮޑުކޮށްފިއެވެ.
މިކަން ހާމަކޮށްފައިވަނީ އާދިއްތަ ދުވަހު އެސްޓީއޯގައި ބޭއްވި ނޫސްވެރިންގެ ބައްދަލުވުމެއްގައެވެ.
އެގޮތުން މިއީ ދުނިޔޭގެ މަސްގަންނަ އަގަށް ގެނައި ބަދަލާ ގުޅިގެން ކަމަށް އެކުންފުނިން ވަނީ ހާމަކޮށްފައެވެ.
މިފްކޯ އިން މިހާރު މަސް ގަންނަނީ ފިނިކުރި ކަނޑުމަސް ކިލޯއެއް 19ރ. އަށް އަދި ފިނި ނުކުރާ މަސް ކިލޯއެއް 17ރ. އަށެވެ.
އެސްޓިއޯގެ މެނޭޖިންގ ޑައިރެކްޓަރ އަހުމަދު ޝަހީރު ވިދާޅުވި، މާދަމާއިން ފެށިގެން މަސްވެރިންގެ އަތުން މަސްގަންނަ އަގަށް ބަދަލު ގެނެސްފައިވަނީ ބޭރު ދުނިޔޭގެ މާކެޓްތަކުން މިހާރު މަހަށް ލިބޭ އަގުތައް ރަނގަޅުވަމުން ދާތީ ކަމަށާއި މިބަދަލު ގެންނަން ނިންމީ މިއަދު ބޭއްވި ބޯޑު މީޓިންއަކުން ކަމަށެވެ.
ޝަހީދު ވިދާޅުވީ އެކުންފުނީގެ އަބަދުގެވެސް ވިސްނުމަކީ މިގޮތަށް ލިބޭ ކޮންމެ ބަދަލެއް މަސްވެރިންނާއި ހިއްސާކުރުން ކަމަށާއި މިވޭދުވެދިޔަ ދުވަސްތަކުގައި މިފްކޯ އިން ވާނީ ވަރަށް ރަނގަޅު ބަދަލުތަކެއް މަސްވެރިންނަށް ދޭ އަގުތަކަށް ގެނެސްފައި ކަމަށެވެ.
އެގޮތުން ވޭތުވެ ދިޔަ މަސްތަކުގައި ދުނިޔޭގެ ބާޒާރުގައި މަހުގެ މާކެޓްތައް އުފުލި، އަގު ވަކިވަރެއްގައި ހިފެހެއްޓިފައިވާކަމަށެވެ.
އަދި މަސްވެރިންނަށް ދޭ ހިދުމަތްތައް މިހާރަށް ވުރެ ރަނގަޅު ކުރުމަށް އެ ކުންފުނި މަސައްކަތް ކުރަމުން އަންނަ ކަމަށާއި އެގޮތުން ފައިނޭންސް މިނިސްޓްރީއާއި، ފިޝަރީޒް މިނިސްޓްރީ އާއި މިފްކޯ އާއި ގުޅިގެން ޕްރޮޖްކްޓްތަކެއް ރޭވި އެއަށް ބޭނުންވާ ފައިސާވެސް ހުރީ ހަމަޖެހިފައި ކަމަށް ޝަހީރު ވިދާޅުވިއެވެ.
