އެއްވެސް ފަރާތެއްގެ ޒާތީ މައުލޫމާތު ހާމަނުކުރުމަށް އިލްތިމާސްކޮށްފި
17 މާރިޗު 2020 | އަންގާރަ 19:17ޑރ. ނަޒްލާ ވިދާޅުވީ އެއްވެސް ފަރާތެއްގެ ޒާތީ މައުލޫމާތު ހާމަކުރުމަކީ ވަރަށް ބޮޑު ކުށެއް ކަމަށް
ޑރ. ނަޒްލާ ރަފީގް
އެއްވެސް ފަރާތެއްގެ ޒާތީ މައުލޫމާތު ހާމަނުކުރުމަށް ޑރ. ނަޒްލާ ރަފީގް އިލްތިމާސް ކުރައްވައިފިއެވެ.
ޑރ. ނަޒްލާ ވިދާޅުވީ އެއްވެސް ފަރާތެއްގެ ޒާތީ މައުލޫމާތު ހާމަކުރުމަކީ ވަރަށް ބޮޑު ކުށެއް ކަމަށެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ ވިދާޅުވީ އެއްވެސް ޒާތީ ސިއްހީ މައުލޫމާތުތައް ހާމަވާ ލިޔުންތަކެއް ސޯޝަލް މީޑިއާގައި ދައުރުވަމުންދިޔަކަން ފާހަގަކުރެވުނު ކަމަށެވެ. އަދި އެފަދަ މައުލޫމާތެއް ލިބުނު ނަމަވެސް އިތުރަށް 'ފޯރވަރޑް' ނުކުރުމަށް އިލްތިމާސްކުރެއްވިއެވެ.
ޑރ. ނަޒްލާ ވިދާޅުވީ ގާނޫނުން މިފަދަ މައުލޫމާތުތައް ހާމަކުރާ މީހުންނަށް އަދަބު ކަނޑައެޅިފައިވީނަމަވެސް މުހިއްމީ އަދަބު ދިނުން ނޫން ކަމަށެވެ.
ޞިއްޙީ ޚިދުމަތް ދިނުމުގެ ޤާނޫނުގައި ވާގޮތުން ޞިއްޙީ ޚިދުމަތް ލިބިގަންނަ ފަރާތުގެ ޞިއްޙީ ޙާލަތާއި، އޭނާއަށް ދީފައިވާ ނުވަތަ ދެވޭނެ ފަރުވާ އާއި، އެނޫންވެސް އޭނާގެ ޞިއްޙީ ޙާލަތާއި އޭނާ ލިބިގަތް ޚިދުމަތާ ގުޅުންހުރި އެންމެހައި މަޢުލޫމާތަކީ، ސިއްރު އަދި އިމްތިޔާޒު ލިބިފައިވާ މަޢުލޫމާތެވެ.
އެފަދަ ކުށެއް ކޮށްފި މީހެއްގެ އަދަބަކީ ދިހަ ހާސް ރުފިޔާ އާއި އެއްލައްކަ ރުފިޔާއާ ދެމެދުގެ ޢަދަދަކުން ޖޫރިމަނާކުރުމެވެ. އަދި މިކުށް ތަކުރާރު ކޮށްފިނަމަ ޖޫރިމަނާ ކުރުމުގެ އިތުރުން، އެމީހަކު އެއް އަހަރަށްވުރެ ދިގު ނޫން މުއްދަތަކަށް ޖަލަށްލުމުގެ އިޚްތިޔާރު ފަނޑިޔާރަށް ލިބިގެންވާކަމަށް ވެސް ގާނޫނުގައިވެއެވެ.
