ވައިބަރ މެދުވެރިކޮށް ބޭސް ސިޓީ ފޮނުވުމުގެ އިންތިޒާމް ހަމަޖައްސައިފި
ހުރިހާ ފާމަސީއަކުން ބޭސް ލިބޭގޮތަށް ހަމަޖެއްސުމުގެ މަސައްކަތް ދަނީ ކުރަމުން
ފާމަސީއެއް
އެސްޓީއޯ ފާރމަސީ އަދި އޭޑީކޭ ފާމަސީން ޚިދުމަތް ފޯރުކޮށްދިނުމަށްޓަކައި ވައިބަރ މެދުވެރިކޮށް ބޭސް ސިޓީ ފޮނުވުމުގެ އިންތިޒާމް އާސަންދައިން ހަމަޖައްސައިފިއެވެ.
އާސަންދަ އިން ބުނީ ކޯވިޑް-19 އިން ރައްކައުތެރިވުމުގެގޮތުން މިވަގުތު ދިވެހިރާއްޖޭގައި އިއުލާން ކުރެވިފައިވާ ސިއްޚީ ކުއްލި ނުރައްކަލުގެ ހާލަތުގައި މީހުން ސިއްޚީ ޚިދުމަތް ފޯރުކޮށްދޭ މަރުކަޒްތަކަށް ދިއުން މަދުކުރުމުގެގޮތުން، މިނިސްޓްރީ އޮފް ހެލްތްގެ ލަފާގެމަތިން އާސަންދަ ސްކީމްގެ ތެރެއިން މިފަދަ ބޭފުޅުންނަށް މިދުވަސްވަރު އަލުން ޑޮކްޓަރަށް ނުދައްކައި ކުރިން ޑޮކްޓަރު ލިޔެދެއްވާފައިވާ ބޭސް ސިޓީއަކަށް އަލުން ބޭސް ނެގޭނެ އިންތިޒާމް ހުރިހާ ފާމަސީއަކުން ލިބޭގޮތަށް ހަމަޖައްސައިދުނުމުގެ މަސައްކަތް އެކުންފުނިން ކުރަމުންދާ ކަމަށެވެ. އެހެންނަމަވެސް އޭގެކުރިއަށް މިވަގުތު އެސްޓީއޯ ބޭސްފިހާރަތަކުން އަދި އޭޑީކޭ ބޭސްފިހާރަތަކުން މިފަދަ ބޭސް ސިޓީއަށް ބޭސްލިބޭނެ އިންތިޒާމް ހަމަޖައްސައިދެވޭނެ އިންތިޒާމް ވަނީ މިހާރު ހަމަޖެހިފައި ކަމަށެވެ.
އެސްޓީއޯ ފާރމަސީ އަދި އޭޑީކޭ ފާމަސީން ޚިދުމަތް ފޯރުކޮށްދިނުމަށްޓަކައި ވަނީ ވައިބަރ މެދުވެރިކޮށް ބޭސް ސިޓީ ފޮނުވުމުގެ އިންތިޒާމް ހަމަޖައްސައިދީފައިވާއިރު މި ޚިދުމަތް ފޯރުކޮށްދޭން ހަމަޖެހިފައިވާ ފާމަސީތަކާއި ވައިބަރ މެދުވެރިކޮށް ބޭސް ސިޓީ ފޮނުވާނެ ނަމްބަރުތަކަކީ އެސްޓީއޯ ހެންވޭރު އަދި ހުޅުމާލެ ފާމަސީން 7922035، އޭޑީކޭ ފާމަސީ –މާލެ 7258555، އޭޑީކޭ ފާމަސީ ހުޅުމާލެ-10 7258559 އަދި ޓެބްލެޓް-2 ވިލިމާލެ 7258557 އެވެ.
އާސަންދަ ސްކީމްގެ ޚިދުމަތް ފޯރުކޮށްދޭ މަރުކަޒަކުން ކުރިން ދޫކުރެވިފައިވާ ބޭސް ސިޓީއަކަށް ބޭސް ދެވޭނީ ބޭސް ސިޓީ ލިޔެފައިވާ ތާރީޚުން ފެށިގެން ހަ މަސްދުވެސް ވެފައި ނުވުމާއި، މިވަގުތު ހުރި ބޭސް ހުސްވުމުގެ ހަފްތާއެއް ކުރިން ފާމަސީތަކަށް ބޭސް ހޯދުމަށް ހުށަހެޅުމުންނާއި، ބޭސް ސިޓީ އަކީ ދިގުމުއްދަތަކަށް ފަރުވާކުރާ ބައްޔަކަށް ދޫކުރެވިފައިވާ ބެސް ސިޓީއަކަށް ވުމާއި، ބޭސް ސިޓީގައި ހުންނަންވާ ހުރިހާ މައުލޫމާތު ތަކެއް ފުރިހަމައަށް ހުރުމުންނެވެ.
