އެމެރިކާ ނޫން އެހެން ހުރިހާ ގައުމުތަކުގެ މީހުން ކެނެޑާއަށް އެތެރެވުން މަނާކޮށްފި

ކޯވިޑް-19 އިތުރަށް ފެތުރުނަނުދިނުމުގެ ގޮތުން، އެމެރިކާ ނޫން އެހެން ހުރިހާ ގައުމުތަކުން، މާޗް 18 އިން ފެށިގެން ކެނެޑާއަށް މީހުން އެތެރެވުން މަނާކޮށްފިއެވެ.

މިކަން އިއުލާންކުރެއްވީ އެ ގައުމުގެ ބޮޑުވަޒީރު ޖަސްޓިން ޓްރޫޑޯއެވެ. އަނބިކަނބަލުން ސޯފީ ގްރެގޮއަރ ޓްރޫޑޯ ކޮވިޑް-19 އަށް ޕޮޒިޓިވްވުމާއި ގުޅިގެން، އެ މަނިކުފާނު ވެސް މި ވަގުތު ހުންނެވީ ސެލްފް އައިސޮލޭޝަންގައެވެ.

އޭގެ އިތުރުން، ކޯވިޑް-19 ގެ އެއްވެސް އަލާމާތެއް ހުންނަ ފަރާތެއް ފްލައިޓަށް އެރުވުން މަނާކުރުމަށް ވެސް ޓްރޫޑޯ ވަނީ އަންގަވާފައެވެ. އަދި މެކްސިކޯ، ކެރީބިއަން އަދި އެމެރިކާ ނޫން ސަރަހައްދުތަކުން އަންނަ އިންޓަރނޭޝަނަލް ފްލައިޓްތައް އައުމަށް އެ ގައުމުގެ ހަތަރު އެއަރޕޯޓެއް ވަނީ ކަނޑައަޅާފައެވެ. އެއި ވެންކޫވަރ، ޓޮރޮންޓޯ، މޮންޓްރިއާލް އަދި ކާލްގަރީއެވެ.

ގައުމުތަކުން މީހުން އައުން މަނާކުރި ނަމަވެސް، ގައުމަށް އެތެރެކުރާ މުދަލަށް މީގެ އަސަރެއް ނުކުރާނެ ކަމަށް ޓްރޫޑޯ ވިދާޅުވިއެވެ.

އެމެރިކާ އިސްތިސްނާކުރަން ނިންމި ސަބަބާއި ގުޅިގެން ނޫސްވެރިން ސުވާލުކުރުމުން ޓްރޫޑޯ ވިދާޅުވީ، މި ވަގުތު ދެ ގައުމުން ފިޔަވަޅުތައް އަޅަމުން ގެންދަނީ ވަރަށް ގުޅިގެން ކަމަށެވެ. އަދި ކެނެޑާއާއި އެމެރިކާގެ އިގްތިސާދަކީ ގުޅިފައިވާ ދެ އިގްތިސާދުކަންވެސް ފާހަގަކުރެއްވިއެވެ. ކެނެޑާއިން ބޭރުކުރާ މުދަލުގެ ތިން ބައިކުޅަ ދެބައި މުދާ ބޭރުކުރަނީ އެމެރިކާއަށެވެ.

މިހާތަނަށް ކެނެޑާއިން ކޮވިޑް-19 އަށް ޕޮޒިޓިވްވެފައިވާ 400 އަށް ވުރެ ގިނަ މީހުން ވަނީ ފެނިފައެވެ. އޭގެ ތެރެއިން ހަތަރު މީހަކު މަރުވެފައިވާއިރު، ބަލި ރަނގަޅުވެގެން 11 މީހަކު ވަނީ ހޮސްޕިޓަލުން ދޫކޮށްލާފައެވެ.