ހުޅުމާލޭގައި ހުންނަ ބަސް ސްޓޭންޑްތަކާއި، އާންމުން އެއްވެ އުޅޭ އެހެން ސަރަހައްދުތައް ޑިސްއިންފެކްޓް ކުރުމުގެ މަސައްކަތް އެޗްޑީސީން ފަށައިފިއެވެ.
އެޗްޑީސީން މި މަސައްކަތް ފަށާފައިވަނީ، ކޯވިޑް-19 އާ ގުޅިގެން އާންމުން އެއްވެ އުޅޭ ސަރަހައްދުތަކުގެ ސާފުތާހިރުކަން ކަށަވަރުކުރުމަށް ދުނިޔޭގެ ސިއްހަތު ޖަމިއްޔާއިންނާއި ސިއްހީ މާހިރުން ގޮވާލަމުން އަންނަ ދަނޑިވަޅެއްގައެވެ.
ޑިސްއިންފެކްޓު ކުރުމުގެ މަސައްކަތާ ގުޅުވާ އެޗްޑީސީން ކުރި ޓްވީޓެއްގައި ބުނެފައިވަނީ، އެންމެ ބޮޑު އަހައްމިއްޔަތެއް ދެނީ މުޖުތަމައުގެ ސިއްހީ ރައްކާތެރިކަމާއި ދުޅަހެޔޮކަމަށް ކަމަށެވެ.
އެޗްޑީސީގެ އިތުރުން, އާއްމު ދަތުރުފަތުރަށް ބޭނުންކުރާ ބަހާއި ފެރީގެ ހިދުމަތްދޭ ކުންފުނިތަކުން ވެސް އަންނަނީ ގެންގުޅޭ އުޅަނދުފަހަރާއި ގިމަތަތައް ޑިސްއިންފެކްޓް ކުރުމުގެ މަސައްކަތް ކުރަމުންނެވެ. އެގޮތުން އެމްޕީއެލް އަދި އެމްޓީސީން ވަނީ މި މަސައްކަތް ކުރިއަށްދާކަން އިއުލާންކޮށްފައެވެ.
ސިއްހީ ކުއްލި ނުރައްކަލުގެ ހާލަތާއި ގުޅިގެން، މާލޭ ސަރަހައްދުގައި ހުންނަ ހުރިހާ ޕާކުތަކެއް ބަންދުކުރަން އެޗްޕީއޭއިން ވަނީ އަންގާފައެވެ. އަދި އެޗްޕީއޭގެ މި އެންގުމާއި ގުޅިގެން އެޗްޑީސީން ވަނީ ހުޅުމާލޭގައި ހުންނަ ހުރިހާ ޕާކުތަކެއް ވަގުތީ ގޮތުން ބަންދުކޮށްފައެވެ.
